Read Mayangna Apastil Balna Warknina 17 Bible Online

Apastil Balna Warknina 17 - Mayangna bible

Apastil Balna Warknina 17

¹Pal dawak Sailas karak uina kidika Anfípolis dawak Apolonia munah bayayakna, kidika kaupak Tesalónica yakat uiwi kakana, kidika yakat ju balna sumalnin ūni as duduwādai.

²Pal, witing nining yamwakaput, sumamalwa ūni yakat kiuna, urupnin mani balna kaiwa kidika bitik laih kiuna dai, sandi bās praisni, witingnakarak yulbabauna, Ulna balna kidika kaupak.

³Disumalna, Mesías kidika laih daunin dai, kaunah dauna kaupak yaklaunin dai. Kaput diyulna: —Sihm adika Jisas, yang manna yakat manayultayang kidika laih Mesías.

⁴Ju buas laih kukulna dai, dawak kalpapakna Pal dawak Sailas balna karak. Kaput bik laih Grik balna Papang kau ayangni tanit nuhni yayamwadai kidika bik kulyang kalalahna, dawak yayal sat sat balna bik.

⁵Kaunah kidika yaklauwi yamwak ju muihni kukulwas balna kidika kulninna daukakalna, dawak muih dudutni di as bik yayamwas tapas yakat tulutulu balna kidika ududuhna, tawan nuhni kidika yakat kiriyaklaunin as yamna atnin. Baisa minit yakat Jasón ūni yakat uiwi dutni yayamna, Pal dawak Sailas kidika balna muryakwi muih balna tingnina yakat āna atnin;

⁶kaunah, yakwas dadana bahang, Jasón yakat laihwi murwi yayakna, dawak wirah ūk balna bik, tawan nuhni kau la muihni balna muhnina yakat sarahwinah: —¡Adika ahalni balna, sau bitik yakat kulnin dutni ahana kidika, akat bik aina,

⁷dawak Jasón laih witing ūni yakat āwi duna! ¡Witingna bitik laih king tanit nuhni lāni kidika daukakalwi, witingna yuyulwi king ūk sakki, kidika laih Jisas!

⁸Kidika yulni dakawi, muih balna dawak lā muihni balna kidika bik yamni kukulwasdai.

⁹Kaunah Jasón dawak ūk balna kidika laih, muih ūk yaklauwi tunanina minit kakawak yayakna dai silak kaupak, dawi uluhmumukna.

¹⁰Pukta, wirah balna yaklauwi Pal dawak Sailas yakmumukwak mahka uina Berea yakat. Uiwi kawi mahka bayakwi uina ju balna sumalnin ūni duduwa yakat.

¹¹Kidika ju balna laih kulninna yamni dai Tesalónica muihni balna karak dawakat, sumamalwa kidika yamni duduna dai, ma bitik Ulna balna kidika kaupak lan kakalwādai, kat witingna amanglakih diawadai, muih yuyulwak dakakawa kidika rahmpa.

¹²Kaput laih muih manas kulyang kalalahna, grik muihni balna bik manas kulyang kakalna dai, ahal dawak yayal sat sat balna bik.

¹³Tesalónica kau ju balna kidika dakakana kat, Pal kidika Berea yakat bik Papang yulni kidika sumalwi atwak, kidika yakat uina, muih balna yakat uswi dulauwak ban pini kiriyaklauna atnin.

¹⁴kaunah wirah balna kidika yaklauwi yayamwak Pal kidika sirihni kalahna dai, kumakung niningyakat, kaunah Sailas dawak Timoti karak laih ban Berea yakat wawatna dai.

¹⁵Pal karak kalpakwi uina balna kidika laih Atenas tawanni nuhni kat uina dai. Kidika kaupak diyulwak nawatwi uina dai, kidika laih Sailas dawak Timoti kidika balna sirihni palni witing yakat uina atnin.

¹⁶Pal, witing Atenas yakat, Sailas dawak Timoti kidika balna tanina tahawassakkat, witing talna kidika pāni laih dawan dauh wayani balna kidika manas bahngna dai.

¹⁷Kidika bahang ju balna karak kidika yulnibauna dai, ūk balna Papang yakat minitnayuyulwa balna karak kalpakwi, dawak ma bitik yakat kalududuhwa pāni yakat kaluduhwi yulbabauwādai.

¹⁸Kaput bik laih sau sinsni duyang balna epicúreo dawak estoico balna karak parasni yulbabauna dai. Buas yuyulna: —¿Kungmak muihni kidika ais yulbauwih? Dawak ūk balna yuyulna: —Pa ūk daniwan dauh kat yulni yulwa kapatki. Witingna kidika yuyulna kat Pal laih yul yamni kidika sumalwabahang, Jisas yulni, dawak dauna kaupak yaklauna kidika yulni bik.

¹⁹Kaput laih Areópago yakat duwi uina, dawak kalyulwi dakakana: —¿Sipyah amanglanin, aisyah sumalnin wisam as duaitaman kidika?

²⁰Di taldas dini kidika yultaman, amanglakih mayawi ais tanka yah.

²¹Atenas muihni balna, dawak pa ūk kaupak muihni balna yakat yalalahwa kidika, yul wisam kalahwi kidika manah biri biri yulwi dakakawādai.

²²Pal witing Areópago yakat muih balna bangkidika paskaupak yaklauwi yulna: “Atenas muihni balna, yang talayang kidika laih, manna laih dawan balna yakat kulyangmana.

²³Manna prias yamtamana pāni yakat talingkat, sakripais busnin pāni as yakat aput ulna dai: ‘Papang as amangnilawas kidika’. Yamni ki, manna witing yakat mamatnayultamana amangnilatasmana kaunah, bahang kidika kuduh manna yakat manayulna aiwanayang adika.

²⁴“Papang sau akat di balna bitik yamna kidika, witing kuduh makau kisang kidika dawak sau adika bik Daniwan. Muih ahal makatyulnin ūni pakna yakat yalahwaski,

²⁵witing nid awaski muih balna yaklauwi dini yayamwarang, kat witing kuduh masangkika mayawa kidika, wing, dawak di ūk balna bik.

²⁶“Muih al as kaupak nisan balna bitik yamna, kaput laih witingna sau akat yalahna atnin kidika; dawak bik ma balna kaiwa kidika niningnakana, dawak angdika pāni yakat yalahninna kidika bik,

²⁷kaput laih Papang yakat walna atnin, sipkat, bakatwi walwi yayakwarang, rahm kidika laih Papang kidika mayang kaupak naikau awaski.

²⁸Kat Papang yakat sangkamayang, lapakdi dawak bangbang mayang; manna kaupak yul damni ulyang balna yuyulna kaput: ‘Mayang laih Papang sulani mayang.’

²⁹Mayang Papang sulani mayang kat, kulnin awaski Papang kidika laih gol, lalah, kidika awaskat kipala kau wayani yamna kapat ki, muih balna yaklauwi witingna amput kukulwa kat kaput.

³⁰Ma bayakna balna yakat, Papang, witing muih di amanglalawas balna kidika dikulwas kat bayakna, kaunah waradika laih pakwi pa bitik balna yakat, witing yakat nawatwi kiuna atnin.

³¹Kat Papang yaklauwi ma as yakna sakki, kidika mani kaiwi kawakat, sau adika lani yamwarang ki, muih al as witing walwi yakna kidika munah; dawak kidika laih muih bitik muhnina yakat lāih yakna, dauna kaupak dulauwi.”

³²Dauna kaupak watwi dulaunin kidika dakawi buas laih sarahni kalyuyulna, dawak ūk balna laih yuyulna: —Mani ūk adika yulni yultang dakadarang.

³³Kaput dawak Pal yaklauwi didamukna.

³⁴Kaunah buas laih usnit uhuina dawak bik kulyang kalalahna. Kidika balna pasyakat Dionisio likdai, witing kidika laih Areópago kau bangkidika kaupak dai, dawak yal as bik likdai ayangni Dámaris, dawak ūk balna bik.