Read Mayangna Apastil Balna Warknina 18 Bible Online

Apastil Balna Warknina 18 - Mayangna bible

Apastil Balna Warknina 18

¹Kidika usnit kat, Pal kidika Atenas kaupak kalahwi kiuna Kurint yakat.

²Kidika yakat al as kalpakna, ayangni laih Aquila, witing laih Ponto kaupak dai. Baisa apis tanitkauh, Aquila yalni Priscila karak Italia kaupak uina dai, bahang kidika yakat king nuhni Claudio yaklauwi dipakna dai ju muihni balna kidika bitik kalahna atnin Roma kaupak. Kaput laih Pal kiwi ditalna

³dawak, witingna wark yayamwa kidika witing bik yamwādai bahang, kidika laih ū labanni yayamwādai, bahang witing laih kidika yakat watna dai kalpakwi wark yamna atnin.

⁴Urupnin mani balna kaiwa bitik kidika Pal laih sumamalwa ūni yakat kiwādai, kidika yakat yulbauwādai, bahang witing laih walna amput dawi Ju balna dawak ju balna awas kidika bik wirlanin kidika.

⁵Sailas dawak Timoti karak uina kat Macedonia yakat, Pal laih sumalnin warkni manah duna dai, kaput laih niningna kana atnin ju balna yakat, Jisas kidika laih Mesías dai kidika.

⁶Kaunah kidika balna, witing niningkauh yaklalauna, dawak dutni bik kalyuyulna; kaput laih Pal witing prakni kidika isihna, niningna kau yaklauwa kidika tanka, dawi diyulna: —Distamana kidika laih manna alas pātmana, yang salahki yakat awaski. Warmani kaupak laih yawaki ju balna awas yakat.

⁷Sumamalwa ūni kaupak kalahwi kiuna, al as ayangni Ticio Justo, kidika ūni yakat, witing laih Papang yakat minityulwādai, dawak sumamalwa ūni kidika yaihnit yakat kāwadai.

⁸Dawak Crispo, witing laih sumamalwa ūni kidika tanituna dai, walanibis balna bitik, Dawan yakat kulna. Dawak Kurint muihni balna bik manas sumalna kidika dakawi kasak kukulna dawak was utuh'yakna.

⁹Pukta as kat, Dawan yaklauwi Pal yakat kalyulna amana kapat kaupak: “Yamaduwinih; ban sumaltah, ap dawinih.

¹⁰Kat yang laih, mankarak yang, muih as bik dutni mayamwas karang, kat yang tawanki laih nuhni ki, adika tawanni nuhni pas-akat.”

¹¹Kaput laih Pal witing Kurint yakat kurih as minitkau papusbah sakdai, witingna pasyakat Papang yulni sumalna.

¹²Kaunah, Galión kidika Acaya yakat kabamint kāwa mani balna yakat, ju balna kidika kalpakwi Pal niningna yakat yaklalauna; dawak lā ūni yakat duwi uina

¹³dawak kabamint tunan muihni yakat kalyuyulna: —Adika alni laih muih balna yakat kulninna wirlawalikki Papang yakat makatyulnin, kaunah kidika laih lā niningkauh yamwi.

¹⁴Pal mahka yulbaukuhtakat, Galión yaklauwi ju balna yakat diyulna: —Di dutni palni karang kat laih, yang yulni balna kidika dakaki, ju balna mana yakat;

¹⁵kaunah yul manah, ayangni manah dawak manna lamana manah bahang, manna silp barangni ātanauh, yang kidika pasyakat āwakih yāwas ki.

¹⁶Dawak lā ūni kaupak yakmukna.

¹⁷Kaput laih witingna bitik Sóstenes yakat lalaihna, sumamalwa ūnina tunan muihni yakat, dawak kidika pāni yakat babauna, lā yayamwa muhni yakat. Kaunah Galión laih witing kidika kulwasdai, yayamwa kidika.

¹⁸Pal, witing baisa ma manas Kurint yakat watna dai. Kidika kaupak wirah balna yakat paraswi dawi, Priscila, Aquila kidika balna karak kalpakwi kuring yakat kawi Siria sauni yakat uina. Cencrea yakat, baisa kuring yakat kakawas kau, witing basni kidika kahrna, kidika laih pramis as yamna dai kidika yulni yamna.

¹⁹Witingna Efeso yakat uina kat, Pal witing didamukna dai Priscila dawak Aquila karak, dawak sumalnin ūni yakat kiuna, bahang kaput laih ju balna kalududuhwa kidika balna karak yulbauna.

²⁰Witingna yaklauwi kalyuyulna baisa watnin kidika pāni yakat, kaunah witing yulwas dana,

²¹nawatkauh laih diparaswi aput yulna:[14] “Papang dukih kalawarang kat, wattik aiwik manatalki.” Kidika usnit kat Pal kuring yakat kawi mahka kiuna Efeso yakat.

²²Cesarea yakat kiwi dawi bayakwi kiuna Jerusalén yakat suts muihni balna yakat parasnin yulni, kidika kaupak mahka Antioquía yakat kiuna.

²³Ma as as bayakwak, watwi kalahwi awaihna pāni balna kidika as as, Galacia yakat, dawak Frigia yakat bik, kulyang balna kidika bitik kulninna dulauna.

²⁴Kidika mani balna yakat, Efeso yakat ju muihni as kiuna ayangni laih Apolos, witing laih Alejandría tawanni nuhni kaupak dai. Witing laih yul bauwi lan palni dai, dawak bik Ulna balna kidika yamni palni amanglawādai.

²⁵Dawan tani kidika yamni palni lankalna dai, Jisas yulni balna kidika lāih yakwi sumalwadai dawak bik sumalkih sumalwādai, Jan was utuh'yakna kidika manah amanglawadai kaunah.

²⁶Apolos witing lāih yulbauna sumamalwa ūni yakat; kaunah Priscila dawak Aquila karak dakakana kat, laihwi duwi uiwi Papang tani kidika yamni palni sumamalna dai.

²⁷Apolos kidika Acaya yakat bayaknin kulna, dawak wirah balna kidika ilp kalalana, dawak wauhtaya as uhulna, kidika pāni kau kulyang balna yakat, kaput laih kiwak yamni kaldunin kidika yulni. Acaya yakat kiuna kat, ilp manas diana, Papang minikun talnin duwa kidika munah kulyang kalalahna balna yakat,

²⁸bahang muih balna bitik muhnina yakat ju balna kulninna lani niningkauh yulna dai, witingna laih tatalwas ki atninna awas yulni, dawak Ulna kidika munah yakwi niningnakana dai Jisas laih Mesías kidika.