Read Mayangna Apastil Balna Warknina 19 Bible Online

Apastil Balna Warknina 19 - Mayangna bible

Apastil Balna Warknina 19

¹Apolos kidika Corinto yakat sakkat, Pal kidika asangpas munah bayakwi kiuna Efeso yakat, bahang witing kulyang balna manas kalpakna.

²Diyulwi dakana: —¿Manna kulyang alahwanamana kat Spirit Holi kidika dunamanah? Witingna yaklauwi nangnitlalana: —Spirit Holi kidika yulni yuyulwak dakasyangna.

³Pal yaklauwi nangnitnalana: —Kaput kat, ¿was manautuh'yayakna kidika amputyah? Witingna yaklauwi nangnitlalana: —Jan was utuh'yakna kidika.

⁴Pal yaklauwi diyulna: —Papang yakat aiwa balna kidika Jan was utuh'yakwadai, kaunah diyulna dai, witing usnit yakat kaiwarang kidika yakat kulnin, yuldarang kat Jisas.

⁵Kidika dakawi, Dawan Jisas ayangni kau was kalutuh'kalalahna;

⁶dawak Pal yaklauwi witingna minitna yakat tingni dulauwakat, witingna minitna yakat bik Spirit Holi kidika kiuna, dawak tuni satuk bik yuyulna, dawak prapit yulni bik yuyulna.

⁷Kidika balna laih bitikkat ahal 12 dai.

⁸Waiku bās, Pal witing sumamalwa ūni yakat wātna dai, kidika yakat sumalna dai yamaduwas, yulbauwādai, dawak muih balna yakat kulninna laihnin yamwādai Papang kingni lani kidika sumalwi.

⁹Kaunah muih balna laih tapanina dadasni bahang dakakawasdai, kaunah muih balna muhnina yakat dutni yuyulwādai, Ta Wisamni kidika yulni. Kaput dawak Pal witing dawi kalahna, dawak kulyang balna kidika Tirano skulni ūni yakat duwi kiuna. Kidika yakat laih ma bitik yakat sumalwādai,

¹⁰dawak kaput manah kurih sumalna, kaput laih Asia sauni kau yalalahwa balna kidika, ju balna dawak ju awas balna kidika bik, Dawan yulni kidika dakana atnin.

¹¹Dawak Papang yaklauwi Pal munah di taldas dini balna kidika yamwādai,

¹²kidika bahang, asna balna Pal laihwa kidika balna duwi siknis balna yakat duwi uina dai, bahang kidika kau sikninanis kaupak yamni kalalahwādai, dawak spirit dutni balna kidika witingna kaupak kalalahwādai.

¹³Ju balna bik tapas yakat spirit dutni balna kidika muih muihnina kaupak kangwi yayakwa kidika, witingna bik, Dawan Jisas ayangni kidika yusyamnin kukulna; kaput bahang spirit yakat diyuyulwādai: “¡Jisas ayangni, Pal sumalwa kidika kau yultayangna alahwanauh!”

¹⁴Ju as ayangni Esceva, witing laih sumalyang balna taninatuna dai, bahang witing walanibis ahal tiaskaubu duwadai kidika kaput yayamwadai.

¹⁵Kaunah ma as kat spirit dutni kidika yaklauwi nangnitlana: “Jisas kidika amangnilatayang, dawak bik Pal kidika bik; kaunah manna laih, ¿waismanah?”

¹⁶Kidika minitni yakat, spirit dutni duwa muihni dai kidika niningna yakat kiuna, dawak parasni nuhni kau bitik minitna bayakna, kasak dalani diana, bahang wahdis dawak muihnina yakat didakna dai, bahang kaput kalahwi kikirana, kidika ūni kaupak.

¹⁷Efeso yakat, ju balna, dawak ju balna awas kidika bitik laih kidika yulni dakakana, dawak yamaduduna. Kaput laih Dawan Jisas ayangni kidika barakwādai.

¹⁸Dawak muih manas bik kulyang kalalahwa kidika, muhnilau kau ais yayamna balna kidika bitik muih muhnina yakat yuyulna,

¹⁹dawak sukyah warkni yayamna muihni balna kidika wauhninataya balna bik duwi uina, dawak muih balna muhnina yakat uduhwi bubusna. Kidika wauhnitaya minit kidika kulwi tatalwak, bitik kat lalah tausin manah 50 kapātdai.

²⁰Kaput laih Dawan yulni kidika baisa muih balna yakat kiuna, dawak bik parasni kidika niningnakana.

²¹Adika kalahna usnit kat, Pal witing kulna Macedonia yakat kiunin dawak Acaya yakat bik, dawak ban tanit yakat kiunin Jerusalén kat. Dawak bik yulna dai Jerusalén yakat kiwarang kat, Roman yakat bik kiwarang ki.

²²Kaput laih Macedonia yakat sihna tingnisut laihyang bu dau kidika balna, Timoti dawak Erasto karak, dawak witing laih baisa apis watnin Asia yakat.

²³Kidika mani balna, Efesus yakat, muih balna kidika kiri yaklalauna dai, Ta Wisamni kidika yulni,

²⁴kidika laih Demetrio yaklauwi yamna dai, witing laih lalah kau di yamyang dai. Kidika alni laih lalah binina wayani yamwādai, kidika laih dawan yal dauh as Artemisa[15] kidika prinias ūni, bahang lalah manas yamwadai witing karak wark kalalahwa muihni balna kidika.

²⁵Kidika balna uduhna, dawak muih ūk balna sihm kidika warkni kapatnah kalalahwa balna kidika karak uduhwi diyulna: “Manna amanglatamana, mayang yamni atnin kidika laih adika warkni kaupak yamni mayang.

²⁶Kaunah manna talamana, dawak bik dakamana, Pal yulwalikki, dawan dauh balna muih al yamna kidika laih dawan awaski; kaput laih muih manas kulninna laihna, Efesus akat manah awaski, kaunah Asia sauni bitik yakat kaput yamna.

²⁷Kidika laih yamadangni ki, kat mayang mawarkki adika laih dauh kalnin sipki, dawan dauh Artemisa prinias ūni ayangni nuhni kulna kidika sau yakat bukwarang, dawak bik, dauh kulnin sipki kidika dawan yal kau minitna yuyulwa kidika, Asia sauni yakat dawak sau bitik witing yakat minitna yuyulwa kidika.”

²⁸Kidika dakawi, kulninna daukakalna, dawak sararahna: “¡Artemisa sangka karang Efesus akat!”

²⁹Tawan nuhni kidika bitik, pini amanglalawasdai. Gayo dawak Aristarco minitna yakat uina, Macedonia muihni balna bu Pal karakdai kidika, laihwi murwi duwi uina yakikisda ūni nuhni yakat.

³⁰Pal witing kidika yakat kanin kulna, muih balna yakat yuldibaunin, kaunah kulyang balna yaklauwi dadawasdai.

³¹Lā muihni balna Asia kaupak dai kidika pasyakat, Pal karak kaltalyang yamni balna kidika bik bangdai, bahang kalyuyulna, witing sip awaski kidika pasyakat kanin.

³²Kidika kaluduhna pasyakat, buas sararahwi yuyulna kulnin lani as, dawak ūk balna kidika satuk yuyulna, kat muih balna kidika pini manah kakalna, muih mahni kauh aslah kalalahna kidika amanglalawasdai ais yulni aslah kalalahnapa.

³³Kaunah muih as as laih Alejandro yakat kidika yulni kalyuyulna, wais yaklauwi ju balna niningna yakat aput yayamna kidika. Alejandro, tingni dulauna ap danin yulni, ju balna ilpnina yulnin tawan muhni yakat.

³⁴Kaunah witingna tatalwak witing palni kidika ju bahang, awar bu kapat sararahwi yuyulna: “¡Artemisa sangka kawang Efesus akat!”

³⁵Kidika tawanni nuhni yakat ulyang muihni kidika yaklauwi diyulwak ap dadawak yulna: “Efesus muihni balna, muih bitik amanglalawi adika tawanni nuhni tingni yakat ki, dawan yal Artemisa kau makatyulnin ūni kidika maintalnin kidika, dawak witing wayani kidik makau kisang kaupak kaiwi bukna kidika.[16]

³⁶Muih as bik kidika kulwas atnin sip-awas bahang, manna ismangna aitanauh, yamni kulta talas laih yayamwinih.

³⁷Adika alni balna duainamana adika, witingna makatyulnin ūni kidika yakat dutni yayamwas ki, dawak bik dawan yak niningyakat dutni bik yuyulwas ki.

³⁸Demetrio dawak, witing karak wark kalalahwa balna kidika muih as kau niningyakat yaklalauwakat, kidika yakat wihta bangki; kaput laih lā muihni balna muhnina yakat uiwi yuyulwang, witingna rahmnina kidika yuyulwang.

³⁹Dawak manna di ūk yultamana laih, kaluduhna yamni as kau yulwi talnin karang.

⁴⁰Warmani kalahwada adika laih yamadangni ki maiyulnin, mayang yamdak muih balna adika pini kiri yaklalauna, kat kaput palni yamnin dini laih diski, bahang maiyulwi dakakawarang kat muih balna pini kiri yaklalauwa adika.”

⁴¹Kidika diyulwi dawi, sihmukwak uina mahka.