Read Mayangna Apastil Balna Warknina 21 Bible Online

Apastil Balna Warknina 21 - Mayangna bible

Apastil Balna Warknina 21

¹Wirah balna kidika damuktik, kuring yakat āwik yawanayangna barangni Cos yakat, payahwak Rodas yakat yawanayangna, kidika kaupak Pátara yakat.

²Pátara yakat kuring as kalahkiwasakdai Fenicia yakat, bahang kidika yakat āwanayangna.

³Bayaktik, Chipre kalangnisah kidika talnayangna, wadahkina munah bayaktik Siria kat yawanayangna. Dawak kuma kuring kidika, Tiro yakat di buas danin dai bahang, yakat āwanayangna.

⁴Kulyang balna karak kalpaknayangna, dawak witingna karak ma tiaskaubu watnayangna dai. Witingna yakat Spirit Holi diyulwakat, Pal yakat kalyuyulna Jerusalén yakat kiunin awas.

⁵Kaunah ma tiaskaubu bayakwak, alahwanayangna. Bitik, yalnina dawak walaninabis balna bitik, yangna karak uina tawan nuhni kidika kaupak ahni kat, dawak kauhmak yakat limbabahtik mikitnayulnayangna.

⁶Usnit kat diparastik, mahka kuring yakat āwanayangna, dawak witingna laih nawatwi ūnina kau uina dai.

⁷Yangna kuma munah yawanayangna Tiro kaupak Tolemaida kat, kidika yakat, wirah balna parasnayangna, dawak ma as witingna karak watnayangna.

⁸Payahwak alahwik Cesarea kat yawanayangna. Pilip ūni yakat yawanayangna, yul yamni sumalyang kidika, witing laih apostel balna tingninasut laihyang tiaskaubu kidika paskaupak as dai, bahang witing karak watnayangna.

⁹Pilip kidika walanibis yayal sirarau arungka duwādai, kidika balna laih prapit yayal dai.

¹⁰Ma manas, yakat bangyangna dai, dawak Judea kaupak prapit as ayangni Agabo kidika kiuna.

¹¹Yangna yakat kiwi, Pal banimak sitwa dini kidika sitna tingni dawak kalni bik, dawi yulna: —Spirit Holi kidika yulwi, Jerusalén yakat ju balna yaklauwi adika bamak sitna daniwan yakat kaput sisitwarang, dawak pa ūk muihni balna tingnina yakat ahawarang.

¹²Kidika dakawi, yangna dawak Cesarea muihni balna bik Pal kalnin dinit yakat bukwi yuyulna Jerusalén yakat kiunin awas.

¹³Kauna Pal yaklauwi yulna: —¿Ais yamta aidanangkat kulnik bukwih? Yang laih ridiyang, yasitnin manah awaski kaunah daunin bik, Jerusalén yakat, Dawan Jisas yulni.

¹⁴Sip kulnin laihtas danayangna bahang, danayangna, dawak yulnayangna: —Dawan kulnin lani yamwang.

¹⁵Kidika usnitkat, ridi alahwik Jerusalén yakat yawanayangna.

¹⁶Cesarea muihni kulyang balna as as yangna karak uina, bahang witingna yaklauwi yanaduwi uina, Chipre kaupak al as ayangni Mnasón kidika ūni yakat, witing laih kulyang as dai, uman ma mahni, bahang witing payahnin pāni yananin dai.

¹⁷Jerusalén yakat yawik awiningkat, wirah balna kidika alasna yanaduduna.

¹⁸Payahwakat, Pal yangna karak kiuna Jims yakat talna, dawak kidika yakat muihbararak balna bitik bangdai.

¹⁹Pal yaklauwi parasna, usnit kat yulni bikisni balna kaupak kalyulna, Papang ais yamna kidika witing munah, ju balna awas pasyakat.

²⁰Kidika dakawi, Papang ayangni nuhni yayamna. Pal yakat kalyuyulna: —Wirah, talaman ju balna pasyakat tausin mahni kulyang kakalna, bahang witingna bitik yuyulwi Moses lāni kidika usnit uinin.

²¹Dawak diyuyulna, ju balna bitik pa ūk yakat yalalahwa balna kidika yakat disumalnaman Moses lāni kidika danin, dawak bik diyulnaman, Papang sainni kidika yamnin awas walaninabis balna yakat, dawak amput yalalahwa balna kidika bik danin.

²²¿Kidika amputyah? Rahm palni laih, muih balna amanglalawarang, man aiwanaman kidika.

²³Yamni ki aput yamma kat: Mapasking akat ahal arungka rauki, bahang witingna pramis ahana kidika yayamwarang ki.

²⁴Kidika balna duyawa, witingna karak maisihni dis alahwah, dawak lauta kalanin dutaman kidika bik lautah, kaput laih witingna basnina dadakwarang. Kaput laih muih bitik tatalwarang, man yulma diyuyulna kidika rahm awas kidika, nawatkauh laih, man bik lā kidika kat yamtaman.

²⁵Dawak ju awas balna kulyang kakalna kidika laih, uman wauhtaya ultik sihnayangna yangna amput kulnayangna kidika: dawan dauh yakat dimuihni kalalana kidika kasnin awas, ā bik, tinglau dinimak wir'bahna kidika, dawak marid kalahnin satni as dutni kulna kidika bik.

²⁶Kaput laih Pal witing ahal arungka kidika duwi kiuna, dawak payahwakat maisihnidis kalahna as balna kidika karak; kidika usnit kat makatyulnin ūni yakat kana isningnapakna atnin, pramis mani kidika mampat kat bayakwarangpa, yuldarangkat, witingna kidika mampat minitdis kalaninna dini kidika duwi uiwarangpa.

²⁷Ma tiaskaubu kidika bayaknin manah kat, ju balna Asia sauni kaupak kidika balna tatalna Pal kidika makatyulnin ūni yakat, dawak muih balna yakat uhuswak kiriyaklalauna. Dawak Pal niningyakat yaklalauwi,

²⁸sararahna: “¡Israel balna ilp mayatanauh! Adika alni kuduh pa bitik yakat sumalwi awaihwa kidika muih balna yakat, bahang kidika laih matawanki niningkauh ki, Moses lāni niningkauh, dawak makatyulnin ūni niningkauh bik ki. Kidika minit yakat, makatyulnin ūni pasyakat grik balna bik duaiwi āna, kaput yamwi pa holi adika daukalwi.”

²⁹Kaput yuyulna kidika laih, muhnilau kau tawan yakat kaltatalna dai Trófimo karak tulukat, Efesus kaupak kidika, dawak witingna kukulna Pal yaklauwi duwi kiuna makatyulnin ūni yakat.

³⁰Tawan nuhni bitik kiriyaklalauna, dawak muih balna kidika kiri uiwi kakana. Pal kidika laihwi murwi duwi uina ahni yakat, dawak dūr balna kidika minitni yakat puputna.

³¹Inin manah dai, dawak Roman muihni kalbauyang balna taninatuna nuhni kidika yul dakana, Jerusalén muihni balna bitik kidika pini kiriyaklalauna.

³²Kalbauyang balna taninatuna nuhni kidika, uduhwi duna kalbauyang balna, dawak kiri kiuna muih bangyakat. Witingna kalbauyang balna dawak taninatuna nuhni kidika bik tatalna, bahang Pal yakat wiwiswa kidika dadana.

³³Kaput laih kalbauyang balna taninatuna nuhni kidika yaihnit yakat kiwi Pal yakat laihna, dawak dipakwak sīn bu karak sisitna. Usnit kat kalyulwi dakana witing kidika waisyah, dawak bik ais dutni yamnayah.

³⁴Kaunah buas sarahwi yul as yuyulna, dawak ūk balna kidika laih yul ūk yuyulna, kaput bahang kalbauyang balna taninatuna nuhni kidika di as bik sip barangni yamwasdai, di parasni yuyulwa kidika yulni; kaput bahang pakwak silak yakat duwi uina.

³⁵Kalbauyang balna ūnina tipni yakat kiwi kawakat, soldado balna kidika yaklauwi Pal kidika dulauwi duwi uina, muih balna kidika uba dutni yayamwa kidika yulni;

³⁶kat bitik laih dangnitna yakat sarahwi uina bahang aput: “¡Dauwang!”

³⁷Mahka silak yakat ahawakat, Pal yaklauwi yulwi dakana, kalbauyang balna taninatuna nuhni yakat: —¿Sipyah man karak minit as yulbaunik? Kalbauyang balna taninatuna nuhni kidika nangnitlana: —¿Grik yultamahn?

³⁸Kaput laih, ¿man Egipto muihni awasmahn, ma balna bayakna yakat, kalbaunin as yamwi sau ūk kau kalahwi kiuna dai kidika, muih ahal tausin arungka karak?

³⁹Pal yaklauwi kalyulna: —Yang laih ju yang, Cilicia sauni kau tawan as ayangni Tarso kidika kaupak yang, dawak kidika tawanni nuhni kalkulna kidika kaupak; kaunah plisma, yatangkat muih balna karak yulbaukuh.

⁴⁰Kalbauyang tanituna nuhni kidika yaklauwi kalana yulbauna atnin, dawak Pal tip yakat yaklauwi tingni kau yamna muih balna kidika ap danin. Kaput laih muih balna kidika ap dadawak hibru tuni kau yulbauwi yulna: