Read Mayangna Apastil Balna Warknina 24 Bible Online

Apastil Balna Warknina 24 - Mayangna bible

Apastil Balna Warknina 24

¹Ma singka bayakwak usnit kat, sumalyang nuhni Ananías, Cesarea yakat kiuna, muihbararak balna kidika buas duwi, dawak layar as bik duwi kiuna ayangni laih Tértulo. Adika balna kabamint muhni yakat uina, Pal yulni yaknin yulni.

²Pal duwi uiwak, Tértulo yaklauwi Pal yulni yakna, Piliks muhni yakat: —Tingkih, kabamint tunan muihni, kulnin aslah lani dudi, dawak tingkih mayuldi sinsma nuhni dutaman kidika kau masauki akat di manas yamni yamnaman.

³Kidika bitik laih nining dudi pa bitik balna yakat, Piliks kabamint yamni palni man kidika, tingkih mayuldi.

⁴Baisa taimma disnin awas yulni, mayultayang yulkina adika apis dakah minit as.

⁵Adika alni yaknayangna, bahang witing laih di daukalyang as ki, pa bitik yakat kiwi ju balna kidika sahwi yakwi, dawak witing laih nazareno muihni balna taninatuna as ki.

⁶Makat yulnin ūni kidika bik risnipik dis yamnin kulna dai, kidika yulni yangna laihtik sitnayangna.[19]

⁸Man silp sipman witing yakat taihta kalyulta dakanam, witing yulni yaktayangna kidika.

⁹Ju balna kidika yakat bangkidika bitik laih kaput yuyulna dai.

¹⁰Kabamint yaklauwi Pal yakat sain kalyamna yulbauna atnin, dawak Pal yulna: —Man muhma yakat yang alas takitdaknin kidika yultayang, kat yang amanglatayang, man laih wihtaman adika sauni akat, kurih mahni.

¹¹Man silp sipman tanka walta talnam, ma 12 dawi, Jerusalén yakat yawanayang, Papang yakat ayangni nuhni yamnik.

¹²Yang muih as karak bik kalbiltasyang, dawak bik makatyulnin ūni yakat muih balna kidika diyamtingkat kiri yaklalauwaski, sumamalwa ūni yakat dawak tawan nuhni paskau pa ūk yakat bik.

¹³Adika muihni balna, yang yulki yuyulwa kidika as bik rahm awaski.

¹⁴Kaunah yang lāih yultayang kidika laih, papangki balna Papangnina kidika yakat dini yamtayang, Ta Wisam kidika karak, witingna yuyulwa kidika uduhna dibin, kat kultayang bahang lā wauhnitaya yakat prapit balna uhulna kidika bitik.

¹⁵Dawak dutayang, witingna duduwa kidika bitik, tahanin dutayang Papang yakat, ma as kat dauna kaupak watwi dulauwarang kidika, muih yayamni balna dawak muih dudutni balna bik.

¹⁶Kidika bahang kulnik kidika maisihni dis dunin yamtayang, Papang muhni tani yakat dawak muih balna muhnina yakat bik.

¹⁷“Kurih as as bayakna yakat pa ūk balna yakat likyang dai, dawak sauki akat nawattik aiwanayang bahang kalik duyawanayang kaput bik minitdis kalanin kidika bik ditik yawanayang dai.

¹⁸Kidika yamtasakyang dai, maisihni dis alahwanayang usnit kat, amput yayamwa kidika yakat, kaput bik laih muih mahni awasdai, muih balna bik yamni bangdai, dawak Asia kaupak ju muihni balna buas yatatalna makatyulnin ūni yakat. Bahang witingna kidika aiwi yulki yaknin dai akat, yang nikingkauh yul yulnin duduwakat.

²⁰Dawak kaput awaskat, witingna akat bang-adika yuyulwang di dutni as yamnayangpa, ju balna kaluduhna nuhni duduwa kidika muihni balna muhnina yakat dutni yamnayang kat.

²¹Kidika awaskat witingna pasyakat yulki parasni kau yulnayang kidika: ‘Warmani lāki yamtamana dauna kaupak watwi yaklaunin kidika kultayang kidik yulni.’

²²Piliks kidika dakawi, dawak bik Ta Wisamni yulni kidika yamni amanglawa bahang, yulna, adika yulni datayang usnit kat laihwi talnin karang: —Kalbauyang balna taninatuna Lisias kidika kaiwi manna yulmana adika yamni yayuldawak.

²³Dawak Piliks sihna kalbauyang balna taninatuna as kau, Pal kidika laih ban laihwatna ki, kauna pri kidika apis kalanin, bahang witing kaltalyang balna yamni duwa kidika karak yulbaunin.

²⁴Ma as as bayakwak Piliks kidika yalni Drusila karak kiuna, witing kidika laih ju yal dai. Dawak Pal yakat kalyulwak kiuna, dawak Pal yulbauwa kidika dakana Jisaskrais yakat kasak kulnin kidika yulni.

²⁵Kaunah Pal yaklauwi yulna muih sangnika kidika barangni atnin, muihni nuhni kidika bik laihwatwi dunin dawak ma balna kaiwarang yakat la yamwarang kidika, Piliks kidika dakawi muihsak dauwi kalyulna: —Waradika yawah. Wattik mayulki ma as yaktik duki kat.

²⁶Piliks tahana kidika laih, Pal yaklauwi lalah kalawakat uluhpamna atnin; kidika bahang wat wat witing karak yulbauwādai.

²⁷Kaput manah kurih bu bayakna; kidika usnit kat Piliks kabamint warkni yamwadai kidika dana, dawak witing pāni yakat kana kidika laih Porcio Festo. Piliks laih ju balna karak yamni atnin yulni, Pal kidika silak yakat dasakna.