Read Mayangna Apastil Balna Warknina 27 Bible Online

Apastil Balna Warknina 27 - Mayangna bible

Apastil Balna Warknina 27

¹Italia yakat yanasihnin ridi kalalahna kat, Pal dawak silak muihni ūk balna kidika karak yakwi, kuma kuring pasyak tanituna nuhni kidika tingni yakat ahana, ayangni laih Julio, kalbauyang balna uduhna kidika ayangni laih king tanit nuhni.

²Kuring yakat āwanayangna, kuma kuring as mahka kalahkiwasakdai Adramitio wasnita kaupak Asia yakat kiunin. Aristarco bik yangna karak dai, witing laih Tesalónica kaupak dai, Macedonia tawanni nuhni.

³Payahwak Sidón wasnita yakat yawanayangna, kidika yakat Julio yaklauwi Pal yakat yamni kalyamna, dapamwak kaltalyang duwa dai kidika balna yakat kiwi talna atnin.

⁴Sidón kaupak alahwik yawanayangna, Chipre kalangnisah kidika nakitna dakna wing parasni wauhwa kidika, kat wing kidika nikingnakauh wauhwasakdai bahang.

⁵Kuma kidika daknayangna dai Cilicia dawi Panfilia kumani kauhnimak muhnityakat, dawak Licia tawanni nuhni as Mira yakat yawik āwanayangna dai.

⁶Soldado balna taninatuna kidika kuma kuring as yakna dai, bahang kumani kuring kidika laih Alejandría kaupak dai, kaunah Italia yakat kiwasakdai, bahang kidika yakat yanaāna, ban takitna yakat yawinikna.

⁷Tāni yawanayangna ma manas, dawak kasak wark yamtik Gnido muhnit tani kat yawanayangna. Wing kidika nikingnakauh ban wauhwa bahang, Salmón muhnit tani munah bayaknayangna, Creta kalangnisah munah awaihnayangna;

⁸kuma kung munah yawanayangna kasak dutni wauhtik, kaput laih yawanayangna Wasnita Yamni kidika yakat, Lasea tawanni yaihnit yakat.

⁹Ma manas bayakna, dawak yamadangni dai kuma munah kiunin, kat wasma kidika uliswa bahang.[20] Kidika bahang Pal yaklauwi yul diyulna:

¹⁰—Ahal balna, talayang kiunin adika yamadangni ki, sipki kuring dawak di balna adika bitik dismuknin, dawak mayang masangkika bik disnin sipki.

¹¹Kaunah soldado balna taninatuna kidika yaklauwi, kumakuring daniwan kidika yakauh yulni dakana, Pal yulwa kidika karak dawakat.

¹²Dawak kidika wasta yakat wasma bayaknin kidika yamni awas dai bahang, muih balna kidika bitik kukulna kidika kaupak kalahnin laih tanit yamni ki, dawak traiyamwi Fenice kat kiunin, kidika laih Creta wasnita as ki, kidika laih tingpal niningkaupak, dawak wadah niningkaupak bik lāih talwi, bahang kidika yakat wasma bayaknin.

¹³Kukulna witingna sipkarang tanitna yakat uinin, kat wadah niningkaupak wing tani wauhwa bahang, mahka kalahwi uina Creta kumanikung yaihnit munah.

¹⁴Kaunah kidika kaupak wing parasni wauhwi kaina tingpal niningkaupak, bahang kuma kuring yakat laihna,

¹⁵dawak mahka wauhwi duwi kiuna. Kuma kuring kidika sip wing kaiwa niningyakat laihwattik dutasyangna dai bahang, datining yanaduwi kiuna.

¹⁶Kalangsah dibin as ayangni Cauda, kidika dangnit munah bayaknayangna, kat wing kidika parasni wauhwasdai bahang, yakat laih, bahang kasak wark yamtik kuring bikisni binina kidika dunayangna.

¹⁷Kidika kung yakat kikilna usnit kat, wah kau kuma kuring nuhni kidika sisitna dai. Dawak usnit kat, kauhmak yakat yalahnin sinini ayangni laih Sirte yakat yalahninna yamaduduwadai bahang, kuma paskau ayan ruhm'ahawak, kumakuring laihwatwa kidika ruhm'ahana,[21] dadawak wing kidika diduwi kiuna dai.

¹⁸Payahwak, wing wauhwa kidika baisa parasni wauhwasakdai, kaput bahang di balna kidika mahka kuma pasyakat ruhm'ahana;

¹⁹dawak ma bās bayakwak, kuma kuring paskau asna sitwi dulauwa panan balna kidika bik ruhm'ānayangna.

²⁰Ma manas laih ma dawak bik yala balna bik sip taldasdai, wing parasni yanalaihna kidika yulni, yangna sangka lawinikna kidika kulnikna yakat disdai.

²¹Di kastasyangna kidika ma balna bayakna dai bahang, Pal yaklauna muih balna papus yakat, dawi yulna: —Ahal balna, tanit yamni dai yulki dakanamana dai katlaih, Creta kaupak kalahwas atnin; aput di daukalwas atnindai.

²²Kaput kaunah, kulnamna buknin awaski, kat manna as bik dautas awanama, kuma kuring adika daukalwarang bik.

²³Kat pukta insal as yang akat kaina dai, Papang yaklauwi sihna, yang witing diniyang kidika, dawak bik dini yamtayang kidika,

²⁴dawak yayulna: ‘Yamaduwinih, Pal, kat Roman kingni tanit nuhni muhni yakat yawama bahang, dawak man yulma Papang yaklauwi laihwi yakna karangki, kuma kuring paskau muih bangkidika bitik.’

²⁵Kaput bahang, ahal balna kulnamna dulautanauh, kat Papang yakat kulnik atik dutayang, kidika bahang insal yayulna kaput rahm palni kalahwarang kultayang.

²⁶Kaunah kalangsah as kau watdarangki.

²⁷Wīk bu bayakwak pukta askat yawanayangna Adriático kumani yakat, pini yanaduwi kiuna wing yaklauwi, pukpapus kat kuma kuring wauhyang balna kidika amanglalana sau buhni kau yanaduwi kiwa kidika.

²⁸Was tuhni kidika kulwi tatalna kat, metro 36 dai, baisa tanit yakat kiwak watwi kulwi tatalna kat metro 27 dai.

²⁹Kipala balna yakat bauwarang kidika yamaduwi, kuma kuring mamahni niningkauh yakat kuring sitnin ayanni balna kidika bās ruhm'ahana waspa yakat, dawak Papang kau yuyulna kalawak ma payahlana atnin.

³⁰Kaunah kuma kuring wauhyang balna kidika mahka kirinin kukulna, kaput bahang kuring bikisni binina kidika mahka lalakna, witingna kidika kuring sitnin ayanni kidika kuring tunan yakat ruhm'ahawarang kapat yayamna.

³¹Kaunah Pal yaklauwi isningna pakna soldado balna yakat dawak taninatuna yakat bik: —Kidika muihni balna kuma kuring akat wawatwas karang kat, manna bik sip sangka lawas awanama.

³²Kaput laih soldado balna yaklauwi kuring bikisni binina wahni balna kidika dadakwak was minit yakat bubukna.

³³Payahlanin manah kat, Pal yaklauwi diyulna di apis kasna atnin. Aput diyulna: —Uman wīk bu dawi, ais kalahwarangpa, kidika yulni di kastasmana.

³⁴Kalmana dinit yakat buktik yultayang di kastanauh. Kidika laih nid ki, sangka atnamna kat, kat muih as bik tunanina kau basnina kidik as bik diswas karang ki.

³⁵Kidika yulwak usnit kat, Pal witing plawar busna as duwi Papang kau tingki kalyulna muih balna bitik muhnina yakat. Bahwi diawak kakasna.

³⁶Kidika balna bitik kulninna yaklauna dawak di kakasna.

³⁷Kuma kuring pasyakat muih 276 dai, bitik kat.

³⁸Di kaskih kidika kakasna usnit kat, plawar balna kidika kuma yakat ruruhmna, kuring kidika ingni yamnin yulni.

³⁹Payahlawak, kuma kuring wauhyang balna kidika sau sip amanglawas dadana, kaunah kauhmak yakat kuma tingni kapat kakiwasakkat tatalna, bahang witingna kidika yakat uinin yayamna.

⁴⁰Kuring sitnin ayanni ruhm'ahana wahni kidika dadakna, dawak damumukna, dawak waihnin dini balna kidika bik alahmumukna, dawak kuma kuring kidika kungyakat kiuna. Kidika usnit kat asna kidika dulalauna tunan niningkauh yakat, dawak kuring kidika kauhmak yakat kiuna.

⁴¹Kaunah kauhmak ubulni yakat kilna, dawak yakat laihwatna. Tunan niningkauh kidika laih kauhmak yakat kilna, bahang sip ititikwasdai, dawak mamahni niningkauh kidika laih bahwi disna, kuma parasni lalamwa kidika yulni.

⁴²Soldado balna kidika mahka inin yayamna silak muihni balna yakat, dadawak kiri yaklanin-awas yulni.

⁴³Kaunah, taninatuna kidika Pal yakat laihwi lanin yulni, dawak iwas dadana, nawatkauh laih wais was waihnin sip balna kidika, was yakat kawi wauhwi uiwi kikilwarang sau yakat,

⁴⁴dawak ūk balna kidika laih tat pīsni balna kau duwi waihwi uiwi kikilwarang. Kaput laih muih bitik yamni yaklalana.