Read Mayangna Apastil Balna Warknina 28 Bible Online

Apastil Balna Warknina 28 - Mayangna bible

Apastil Balna Warknina 28

¹Yangna bitik yamni lawanayangna usnit kat amanglanayangna, kidika kalangnisah ayangni laih Malta.

²Kidika muihni balna laih yamni yanayayamna; was lauwak sanni bahang, kuh mahni bibiwak dahlna, bahang kidika yakat yanayuyulwak yawanayangna.

³Pal, witing kuh bubuhni buas uduhna dai bahang, kuh pasyakat ruhm'awasakkat, bil as kalahwi kirana daihni kidika yulni, bahang Pal tingni yakat piriwi laihwatna.

⁴Kidika muihni balna tatalna Pal tingni yakat bil pirina kidika, dawak yuyulna: “Adika alni laih muih iyang as kapat ki, kat kuma kaupak yaklana, kaunah Papang la barangni yamwa[22] kidika yaklauwi kaldawas ki sangka atnin.”

⁵Kaunah Pal, witing bil kidika kuh dahlwa minit yakat isihna dai, dawak di as bik kallaihwas dai.

⁶Tahawa bangdai, tingni kidika bahngwarang, kidika awasbik dauwi bukwarang; kaunah tahahawak ban bayakna, di as bik kallaihwas kat talwi, satuk kukulna, Pal kidika laih dawan as ki.

⁷Kidika yaihnit yakat sau as pakdai, kidika laih, kidika pāni tunan muihni kidika dini dai, ayangni laih Publio, bahang kidika alni yamni yanayamna ma bās praisni.

⁸Publio papangni kidika krikri yakat tusdai, yamah dawak bapau kallaihna dai. Kaput laih Pal kiwi kaltalna, dawak minityulna usnit kat, witing tingni kidika minit yakat yuwi sikninis kaupak dulauna.

⁹Kidika kaupak dawak, siknis muihni balna ūk bik duwi uina, kidika kalangsah yakat bangkidika, dawak sikninanis kaupak dulauna.

¹⁰Yamni mainyanatatalna, kidika usnitkat, mahka wattik kuring kau āwanayangna, dawak yusyamnikna dini balna kidika bitik yananana.

¹¹Waiku bās bayakwak kidika kalangsah yakat manah, dawak kuma kuring as kidika yakat wasma bayakna kidika mahka kalahna, bahang kidika kuringni laih Alejandría kaupak dai, bahang dawan dauh wayani balna bu bik duwādai, Cástor dawak Pólux.

¹²Yawik āwanayangna Siracusa wasnita yakat, kidika yakat ma bās watnayangna,

¹³dawak kidika kaupak yawanayangna Regio kat. Payahwak, wing kidika wadah kaupak wauhwasakdai, dawak ma as bayakwak Puteoli yakat yawanayangna,

¹⁴kidika yakat wirah balna as as kalpaknayangna bahang yanayuyulna wīk as bik witingna karak atnikna, dawak kaput laih witni kat Roman yakat yawanayangna.

¹⁵Roman kau wirah balna kidika uman yulkina duduna dai; kaput bahang witingna uina dai Apio kau Foro kidika yakat, yangna karak kalpaknin, dawak kidika pāni ayangni laih Tabernas Bās. Talwi, Pal tingkih yulna, dawak kulnin dulauna.

¹⁶Roman yakat yawanayangna kat,[23] Pal kidika kalalana pa ūk kau silp kanin, dawak soldado aslah maintalwādai.

¹⁷Kiwi kawak ma bās bayakwak, Pal yaklauwi Roman kau ju balna bangkidika, yulwak uina. Bitik kaluduhwi dawak diyulna: —Wirah balna, yang ju balna niningna yakat di as bik yamtasyang, dawak mamuihkibararak balna amput yalalahwa lanina balna kidika niningkauh bik. Kaput kaunah, Jerusalén yakat, Roman balna tingnina yakat ya-ahana,

¹⁸witingna yataihwi yayulwi dakakana usnitkat yauluhnin yayamna, kat yang daunin dini as bik yamtasyang dai bahang.

¹⁹Kaunah Ju balna laih yulwasdadana, bahang yulnayang king tanit nuhni kidika laki yamna atnin, yang nikisan balna niningna yakat yulnik dini disyang kaunah.

²⁰Kidika bahang, man yakat manayulting aiwamana, manatalnik dawak yulmanabaunik; kat Israel mayang kidika tahanin as dudabahang, kidika yulni akat sīn kau yasitna ki.

²¹Witingna yaklauwi kalyuyulna: —Yangna wauhtaya as bik dutasyangna Judea kaupak man yulma, dawak wirah balna kidika kaupak aina balna kidika kaupak bik di dutni as bik yuyulwas ki, man yulma.

²²Dakakih mayawi, man kultaman kidika, kat amangladi pa bitik yakat adika aslah kalahna dibin kidika niningyakat yuyulwi.

²³Kaput bahang ma as kalalana, kidika mani muih manas uiwarang dai, Pal sakkidika pāni yakat. Mapiris kaupak ma-ulahu kat Pal yulbauna, Papang kingni lani kidika. Jisas yulni kidika kulninna laihnin yamna, Moses lani munah, dawak prapit balna uhulna kaupak bik.

²⁴Buas Pal yulwa kidika kukulna, kaunah ūk balna laih kukulwasdai.

²⁵Dawak witingna kulninna aslah āwi duwas dadana bahang, mahka as as kalahwi uina. Dawak Pal yaklauwi adika manah diyulna: —Spirit Holi yamni yulna manna muihmanabararak balna kau, prapit Isaías munah:

²⁶‘Yawa kidika tawanni yakat diyultah: Kasak dakanama, kaunah sip amanglatas awanama; kasak talnama kaunah talasmana kapat karang.

²⁷Kat adika tawanni kulnin kidika laih dutni kalna, Tapanisuma bik putna dawak minikpa balna bik taihna, kaput laih talwas, dawak dakawas atnin, dawak bik amanglawas atnin; kaput laih yang akat nawatwi ainin awas, dawak yang lawik sikninanis kaupak yamni diyamnik awas.’

²⁸Manna amanglatanauh, waradika kaupak, laihwi yaknin kidika duwi kiuna ki Ju awas balna yakat, dawak witingna laih dakakawarang.[24]

³⁰Pal, witing kurih bu sakdai, ū as wayaki kalalana yakat, kaput laih muih balna witing yakat kaltalna uiwa balna kidika yuldibauwādai.

³¹Witing pri Papang kingni lani kidika sumalwādai, dawak Jisaskrais yulni balna bik sumalwādai, muih as bik kaluswasdai.