Read Mayangna Apastil Balna Warknina 3 Bible Online

Apastil Balna Warknina 3 - Mayangna bible

Apastil Balna Warknina 3

¹Ma as kat, Pita dawak Jan karak makat yulnin ūni yakat uina, ma ulahu, awar bās yakat, kidika awarni laih makat yulnin awarni dai.

²Kidika makatyulnin ūni yakat, muih al kalni sakahwa as sakdai, bahang alni kidika ma bitik yakat duwi uiwi lalakwadai, dūr ayangni yaksihni nuhni atwadai yakat, kaput laih lalah yulnin muih uiwi kakawa balna yakat.

³Kalni sakahwa kidika Pita dawak Jan yakat ditalna kat, mahka ui'kawa tulukat lalah diyulna.

⁴Witingna kaltatalna, dawak Pita kalyulna: —Yanatalah.

⁵Dawak al kidika witingna yakat amung ditalna, witing kulna di as kalalawarang.

⁶Kauna Pita kalyulna: —Yang, lalah dawak gol bik disyang, kauna ais dutayang kidika matayang: Jisas Krais Nazaret kaupak ayangni karak mayultayang man lawa lapaktah.

⁷Kidika yulwi, Pita al kidika tingnipal yakat laihwi dulauna, kidika yamwa minitni yakat kalni dawak burinimak balna bik parasni duna.

⁸Kalni sakahwa dai kidika kalni kau yaklauna, dawak mahka lapakna; dawak kidika usnit kat witing karak makatyulnin ūni yakat kakana, witing silp kalni kau sutwi Papang ayangni nuhni yamna.

⁹Witing lapakwi, dawak Papang ayangni nuhni yamwak tatalna balna bitik,

¹⁰witingna talwi yamaduduna di kalahwa kidika, kat kidika alni yamni amangnilalawa dai bahang, sihm kidika alni, makatyulnin ūni dūrni yakat yalahwi lalah yulwadai kidika.

¹¹Kalni sakahwa kalyamna dai kidika, didawas dai Pita dawi Jan balna kidika yakat. Muih bitik kaltatalwadai, makatyulnin ūni dūrni ayangni Salomón dūrni atwa yakat kirak, witingna bangdai yakat.

¹²Pita kidika talwi diyulna: “¿Israel balna, ampadawak di taldas as dini kapat talamanah? ¿Ampadawak yanatalamanah, adika yangna silp paraskina kau yamnayangna, kidika awaskat Papang dalani lani duwa kidika kau?

¹³Abraham, Isaac, Jacob balna Papangnina dawak mamuihkibararak balna Papangnina yaklauwi witing dini yamyang Jisas yakat maluihni kalana, manna lawa lā muihni balna tingnina yakat ānamana dai kidika, Pilato yaklauwi uluhnin yamwakat manna datasmana dai uluhnin.

¹⁴Holi dawak la kat muihni yakat laihwi yaknin yultasdata, manna yulnamana, muih dutni kidika uluhnin.

¹⁵Dawak kaput laih manna īnamana, sangka atnin yakat maidukiwa muihni kidika.[2] Kauna Papang dulauna dauna kaupak, kidika laih yangna witnis.

¹⁶Adika alni, witing yamwak parasni duna kidika manna talamana, dawak bik amangnilatamana, bahang kidika laih Jisas ayangni yakat kasak kulna. Kidika kasak kulnin laih Jisas yakat ki, bahang kidika yaklauwi muihni yamni yamwi kalana, sakahwa dai kidika kaupak, bahang sipki manna bitik talnamna.

¹⁷“Uman amanglatayang, wirah balna, manna dawak tamanatuna balna karak Jisas īnamana, di rahm kidika laih amanglatasmana, ais yamtamana kidika.

¹⁸Kauna Papang yaklauwi kaput yamna tanit mani kau, witing pranipit bitik balna munah yulna dai kidika: witing Mesías duwa kidika laih dauna karang.

¹⁹Kaput bahang, manna Papang yakat wirlawanauh, kaput laih manna dutmana balna kidika uswi yakwarang. Kaput laih sipkat Dawan yaklauwi ma yamni kidika sihwarang,

²⁰Jisas yakat manasihwinah, witing kidika tatuna kaupak walwi yakna dai kidika Mesías kapat.

²¹Kaput kaunah waralaih Jisas Krais kidika makau kisang yakat sakki, Papang yaklauwi di balna bitik barangni yamwarang mani kat, witing pranipit holi balna yuyulna dai kaput, ma balna bayakna yakat.

²²Moses yaklauwi mamuihkibararak balna yakat diyulna: ‘Papang manna Damanawan kidika pasmangna kaupak prapit as yakwarang ki yang apat kat. Witing ais manayulwa yakat dakanama bitik palni,

²³wais muihni kat yulni dakawas karang kat kidika pranipit yakat, kidika muihni laih tawan kaupak yakwi īna karang.’

²⁴“Prapit balna bitik Samuel kaupak kaina kidika, yuyulna dai adika mani adik.

²⁵Manna kuduh Papang pramis yamna kidika dutanama ki, prapit balna munah pakwak yuyulna dai kidika, dawak bik mamuihkibararak balna kau pramis yamna dai kidika bik manna dimana. Kat Papang yaklauwi Abraham yakat kalyulna: ‘Sau akat nisan balna bitik kidika blisin duduna karang man sulama balna munah.’

²⁶Papang witing Walanibis kidika dauna kaupak dulauna kat, tatuna manna yakat manasihna blismanayamnin, kaput laih manna kidika dutmana kaupak data wirlawanamna.”