Read Mayangna Apastil Balna Warknina 4 Bible Online

Apastil Balna Warknina 4 - Mayangna bible

Apastil Balna Warknina 4

¹Baisa Pita dawak Jan karak muih balna yak yuldibauwa raukat, sumalyang balna kidika uiwi kakana makatyulnin ūni tanituna kidika karak, dawak Saduceos balna bik.

²Witingna isningna daukakalna, kat Pita dawak Jan karak muih balna yakat sumamalwa bahang, dauna kaupak watwi yaklaunin kidika laih Jisas yakat lāih kalahna bahang.

³Lalaihna kaunah uman maulah dana bahang silak ahana dai payahwak kat lanina yamnin.

⁴Kauna muih mahni witingna yuyulwak dakakana kidika kasak kukulna. Kasak kukulna balna kidika ahal manah kukulna kat tausin singka dai.

⁵Ma payahlana dawak witingna kalududuhna Jerusalén yakat Ju balna taninatuna balna, muihbararak dawak lā sumalniyang bik.

⁶Yakat Anás bik sakdai, witing laih sumalyang nuhni dai, Caifás, Jan, Alejandro, kaput laih sumalyang nunuhni balna wanaihnina balna bitik.

⁷Witingna dipapakna, Pita dawak Jan karak duwi uinin, dawak bangkidika papus yakat dulauwi dawi diyulwi dakakana: —¿Wais parasni kau, dawak wais ayangni kau adika dini balna yamta manah?

⁸Pita laih Spirit Holi kalbuhng bahang, nangnitnalana: —Tawan tunani muihni balna dawak muih bararak balna:

⁹manna yanadakamana siknis muihni as muihni kau yamni kalyamna kidika yulni amanglanin, amput dawak yamni kalahna kidika.

¹⁰Yamni ki, yangna manna yak lāih yaktayangna, kaput laih Israel muihni balna bitik amanglanin, adik alni akat sak-adika, muih bitik muhnina yakat, Jisas Krais Nazaret kaupak ayangni kau witing sikninis kidika yamni kalahna, manna lawa pan prihni yakat pāta īnamana dai kidika, Papang yaklauwi dulauna dauna kaupak.

¹¹Adika Jisas kuduh kinipala as manna ū yamyang balna ruhmpamnamana dai kidika, kaunah waralaih kipala tatuna kalna.

¹²Muih ūk diski laihwi yaknin duwa kidika, kat sau bitik yakat Papang yaklauwi muih ūk mayawaski, kidika munah laihwi yaknin kidika dunin.

¹³Lā muihni balna kidika tatalna, amput kulnin dadasni duwa kidika, Pita dawak Jan karak, dawak bik witingna skul kakawasdai, bahang witingna di wisam as kapat tatalna, dawak bik amanglalana witingna kidika laih Jisas disainipil balna dai kidika.

¹⁴Baisa minit yakat, siknis muihni yamni kalahna dai kidika witingna karak sakdai, kidika bahang niningna yakat di as bik yulnin disdai.

¹⁵Kaput laih albupak kalududuhna bangkidika kaupak yayakna ahni yakat, dawak witingna manah watwi dawi biri biri yulwi dakakana.

¹⁶Aput yuyulwadai: —¿Ais yamdarangyah adika ahalni balna karak? Jerusalén yakat muih balna kidika bitik tatalna, adika muih dulauna kidika sakahwa dai kidika kaupak, bahang sip dauhki yuldaski.

¹⁷Kauna witni kat adika yulni baisa muih balna yulnin awas yulni, bilnina laudarang, kaput laih warmani kaupak baisa Jisas ayangni kidika muih balna yulnin awas karang.

¹⁸Diyuyulwak uina, dawak dipapakna, kidika ayangni, muih balna yakat sumalnin awaski, Jisas ayangni kidika yulnin bik awaski.

¹⁹Kaunah Pita dawi Jan karak yuyulna: —Manna kulta talnauh, aitani barangniyah Papang muhni yakat, manna yulmana dakanin, witing yulnin dakanin pāni yakat.

²⁰Yangna sip datas awanaki talnayangna dawak dakanayangna kidika yulnikna.

²¹Lā muihni balna kidika yaklauwi bilnina lalauna, kaunah pri damumukna. Amput witingna yakat wah dianin kidika yayakwas dai bahang, kat muih balna bitik Papang ayangni nuhni yayamna, di kalahwak tatalna kidika yulni.

²²Muih sakahwa kat kalyayamna kidika laih witing kurih 40 duwadai.

²³Pita dawak Jan witingna kidika pri diyayakna usnit kat, uiwi kalpapakna wanaihnina balna karak, dawak diyuyulna, sumalyang balna taninatuna dawak muihbararak balna bik ais diyuyulna kidika.

²⁴Witingna adika yulni dakana usnit yakat, bitik kaluduhwi minitnayuyulna Papang yakat aput yulwi: “Dawan, man kuduh makau kisang kidika yamnaman, sau bik, kuma bik, dawak di balna bitik kidika pasyakat bangkidika,

²⁵yulnaman dai Spiritma Holi munah, dawak dima yamyang Devid tinipas munah bik: ‘¿Amput dawak muih balna kidika pini kiri yaklalauwih? ¿Amput dawak sins as dis bik, wark yamnin balna kidika ridi kalalahwih?

²⁶King balna dawak kabamint muihni balna sau akat kidika namangkauh yaklalauwi, dawak kalpakwi Dawan niningyakat ki. man Mesías walta yaknaman kidika niningyakat bik ki.’

²⁷“Di as rahm kaput kalahna Herod dawak Poncio Pilato karak aslah kalahna kidika adika tawanni nuhni akat, pa ūk muihni balna, dawak Israel muihni balna karak kalpakna man dima yamyang Jisas niningyakat yaklalauna, man lawa witing kidika Mesías yaknaman dai kidika.

²⁸Kidika laih witingna yayamna, man yulma yakat yulna dai kaput kalahnin dini balna kidika.

²⁹Waralaih, Dawan, talah nikingnakauh balna kidika, man dima yamyang balna kidika sumamalwang yamaduwaski,

³⁰dawak bik man parasma kau siknis balna kidika yamni kalalahwang, sain balna yayamwang, dawak muih dulaunin bik siknis kaupak, man dima yamyang Jisas ayangni holi kau.”

³¹Witingna minitna yulwi dahn dadawak, kidika pāni witingna bangkidika yakat sau isihna; dawak witingna bik Spirit Holi dibuhngdana dai, dawak lāih palni Papang yulni kidika sumamalna dai.

³²Kulyang balna bitik, kat mahni dai bahang, kukulwa kidika, dawak muihnina ampat kaldakakawa kidika bitik laih kapapat dai. Muih as bik yulwas dai adika dini laih yang diki, nawatkauh laih di balna kidika laih muih bitik dinina.

³³Apostel balna kidika witnis parasni yuyulwadai, Dawan Jisas dauna kaupak yaklauna kidika, dawak Papang yaklauwi blisin manas diawadai.

³⁴Kaput bahang witingna pasyakat muih as di dis kidika disdai, kat wais sau, kidika awaskat ū duduwa kidika wauhwi bakakanwadai, dawak lalahni balna kidika

³⁵apostel balna tingnina yakat ahawadai, kaput wais di dis kidika balna yakat sahyakwi papat yuna atnin.

³⁶Libai as ayangni José, witing laih kalangsah as ayangni Chipre kaupak dai, bahang kidika alni ayangni as papakna dai apostel balna yaklauwi, Bernabé (tanka laih: “Walaniayang walanibis”).

³⁷Adika alni sau as duwa dai, dawak bakanwi dawi lalahni kidika apostel balna tingnina yakat āna dai.