Read Mayangna Apastil Balna Warknina 6 Bible Online

Apastil Balna Warknina 6 - Mayangna bible

Apastil Balna Warknina 6

¹Kidika mani balna yakat, kulyang balna kidika mahni kalwa bahang, grik muihni balna dutni dakakawa kidika yuyulna Hibru muihni balna yakat, yuyulna dai grik yayal tingmak balna kidika ilp yamni diayawaski, ma bitik ilpni diayawa kidika.[3]

²Apostel balna 12 kidika yaklauwi kulyang balna bitik uduhwi diyuyulna: —Yamni awaski, mayang Papang yulni yamni sumalda kidika dadi, di ūk balna kidika maintalnin.

³Kaput bahang, wirah balna, manna pasmangna kaupak muih ahal tiaskaubu waltanauh yamni talamana kidika, dawak bik Spirit Holi duduwa balna kidika, kaput laih kidika warkni dianin.

⁴Yangna laih ban mikitna yultanaki, dawak Papang yulni kidika sumaltanaki.

⁵Witingna bitik laih yamni tatalna, dawak walwi yayakna Esteban, al as kasak kulnin lani duwadai dawak Spirit Holi bik duwadai, dawak Pilip, Prócoro, Nicanor, Timón, Parmenas dawak Nicolás kauna, Antioquía kaupak witing tatuna kau Ju balna yakat wiryaklana dai kidika.

⁶Kidika usnitkat apostel balna yakat duwi uina, dawak apostel balna yaklauwi minitna yuyulna minitna yakat tingnina dulauwi.

⁷Papang yulni balna kidika baisa rawi kiuna, kaput bik laih Jerusalén yakat kulyang balna kidika mahni kalna. Kaput bik laih Ju sumalyang balna kidika bik kasak kulnin yakat wiryaklalana.

⁸Esteban kidika, Papang parasni dawak blinisin bik duna, bahang sain balna yamna tawan pasyakat.

⁹Papang yul sumamalwa ūni as, ayangni laih, muih dini yamyang kidika kaupak pri kalalahna, kidika kaupak muih buas dawak Cirene, Alejandría, Cilicia, dawak Asia kaupak bik kalpakwi Esteban niningkauh yuyulna;

¹⁰kaunah sip niningkauh yaklalauwasdai, kat Spirit Holi yaklauwi sins tuhni kidika kalawadai bahang.

¹¹Kaput laih muih as as kau minit lalauna, kidika laih yulna atnin, witingna dakakana, Moses dawak Papang niningkauh yulwak Esteban kidika.

¹²Kaput yayamwak tawan kidika pini kakalna, muihbararak kidika dawak lā maestro balna kidika bik; kidika yulni laih Esteban niningyakat yaklalauna, dawi laihwi duwi uina kaluduhna tanit nuhni kidika balna muhnina yakat.

¹³Kidika minit yakat witnis alas muihni balna bik wawalna, aput yulna atnin: —Adika alni, makatyulnin ūni niningkauh yulwa kidika dawaski dawak lā niningkauh bik.

¹⁴Yulwak dakanamayang, Jisas Nazaret kaupak kidika yaklauwi makatyulnin ūni adika daukalpamwarang, dawak bik Moses yaklauwi amput yalahnin lani mayana kidika bik satuk wirlawarang ki.

¹⁵Lā muihni balna dawak kidika yakat muih yalahna bangdai kidika bitik Esteban yakat tatalna, muhni kidika yaringni duwadai, insal kapat.