Read Mayangna Apastil Balna Warknina 8 Bible Online

Apastil Balna Warknina 8 - Mayangna bible

Apastil Balna Warknina 8

¹Saulo laih kidika yakat sakdai, Esteban dauna kidika yamni talna. Kidika mani kaupak, mahka suts niningyakat yaklauna, Jerusalén yakat. Bitik laih kalruruhna, Judea yakat, Samaria yakat uina dai, kaunah apostel balna laih ban bangdai.

²Muih ahal kulninna yamni duduwa balna kidika, Esteban nununa, dawak bik witing yulni uba kakaidana dai.

³dawak Saulo laih suts yakat laihnin uina, ūnina kat kawi laihwi muryakna ahal, yayal bik, silak kau sihna atnin.

⁴Jerusalén kaupak kalahwi uina balna kidika, angkat uiwi bayayakna balna kidika bitik yakat sumamalna yul wisamni kidika.

⁵Pilip, witingna paskaupak as dai kidika, Samaria tawanni nuhni palni yakat kiuna, dawak Krais yulni sumalna dai.

⁶Muih balna kidika kalududuhwādai, dawak Pilip yulwa yakat yamni palni kaldakakawādai, kat witing sain balna kidika yamwak tatalwa bahang.

⁷Muih manas spirit maisihni duduwa balna kidika kaupak yamni diyamna dai, dawak spirit kidika witingna kaupak kalahwi parasni bik sararahna; kaput bik laih, sininwah buhlana balna kidika dawak sakahwa balna kidika bik yamni diyamna dai.

⁸Kidika yulni laih, muih balna alasna nuhni duduna dai kidika tawanni yakat.

⁹Kidika pāni yakat al as sakdai ayangni laih Saiman, muhnilau kau laih witing kidika sukyah dai, bahang Samaria muihni balna yakat alas diyulna dai, bahang witing kidika muih nuhni kapat kalkukulna dai.

¹⁰Bitik laih, dibin kaupak nuhni kat, yamni palni kaldakawi dawi yuyulna: “Adika kuduh witing yakat kalyuyulwadai kidika ‘Papang parasni nuhni’.”

¹¹Dawak witing yulni dakawi yayamna, kat sukyah lani kau ma mahni laih alas diyulna dai bahang.

¹²Kaunah yul yamni Pilip sumalwa yakat kukulna kat, Papang king kāwa lani dawak Jisaskrais bik, ahal dawak yayal bik mahni was utuh'yakna.

¹³Dawak Saiman bik kasak kulna, dawak was kalutuh'yakna dai, dawak mahka laih Pilip karak kalpakna dai, taldas dini dawak sain nunuhni balna bik manas kalahwa kidika yamni talwinah.

¹⁴Apostel balna Jerusalén kau bangkidika dakakana, Samaria muihni balna bik Papang yulni kidika duduna atwak, kidika yakat sisihna dai Pita dawak Jan karak.

¹⁵Witingna uiwi, minitnayuyulna Samaria muihni kulyang kalalahna balna yulnina, kaput laih witingna kidika Spirit Holi kidika duna atnin.

¹⁶Kat Spirit Holi kidika baisa witingna minitna yakat kaiwasdai bahang; kat Jisas ayangni kau manah was utuh'yakna dai bahang.

¹⁷Kaput laih Pita dawak Jan karak witingna tingnina kidika minitna yakat yuyuna dai, bahang kaput laih Spirit Holi kidika duduna.

¹⁸Saiman, witing talwak Spirit Holi kidika kaina, apostel balna tingnina yuyuwak muih balna minitna yakat, dawak lalah dianin yulna,

¹⁹aput diyulna: —Kidika parasni kidika yang akat bik yatanauh, bahang kaput laih yang bik wais minit yakat tingki yukikat Spirit Holi duwarang.

²⁰Kaput laih Pita yaklauwi kalyulna: —¡Lalahma karak dutni yakat mawirlawang, kat Papang prisantni kidika lalah kau bakannin kulnaman bahang!

²¹Man rahmma disman, duna atnam, kat ismang kidika barangni awas bahang Papang niningyakat.

²²Man dutma kidika datah, dawak Papang kalni dinit yakat bukta yultah, sipkat dutma dawak diswarang, man kaput kulnaman kidika yulni.

²³Kat matalayang tapahlni kidika mabahngna, dawak dutni kidika malaihna silak yakat maduwi.

²⁴Saiman yaklauwi nangnitlana: —Manna yang yulki Dawan kau mamatna yultanauh, manna yultanda kidika yang akat yakalahnin awas yulni.

²⁵Witnis yulwi Dawan yulni sumalwi dawi, apostel balna kidika Samaria kau tawan binina manas yakat uiwi sumamalna yul yamni kidika, kidika usnit kat nawatwi Jerusalén yakat uina.

²⁶Kidika usnit kat, Dawan innisal as yaklauwi Pilip yakat kalyulna: “Lawa wadah niningyakat yawah, Jerusalén kaupak Gaza yakat kiwa tani yakat.” Kidika tani laih kauhmak wanilang munah bayakwi.

²⁷Pilip yaklauwi kiuna; ta yakat Etiopía al kidika karak kalpakna. Witing laih muih nuhni as dai, Etiopía kingni yal lalahni kidika laihyang dai, bahang witing laih Jerusalén yakat Papang kau minityulna kiuna dai.

²⁸Nawatwi sauni kau kiwalikdai, kārni yakat yalahwi, prapit Isaías wauhnitaya kidika yulwi talwinah kiuna.

²⁹Spirit yaklauwi Pilip yakat kalyulna: “Kidika kārni yaihnit yakat yawah.”

³⁰Pilip, witing yaihnit yakat kiwi dakana, etíope alni kidika Isaías wauhnitaya kaupak yulwitalwak; dawak kalyulwi dakana: —¿Yulta talaman kidika amanglatamahn?

³¹Etíope alni kidika yaklauwi nangnitlana: —¿Amput amanglakiyah, muih as bik tanka lāih yayulwaskat? Dawak Pilip yakat kalyulna, witing yaihnit yakat kilwi yalahna atnin.

³²Ulna yakat yulwi talna kidika laih adika dai: “Sīp kapat ihiwa pāni yakat duwi uina; sīp bin as ap kapat butuni kakahrwa muihni balna muhnitna yakat, sihm kaput bik laih witing tingpas wakahwasdai.

³³Dauh kalkukulna, dawak lani yamni bik yayamwasdai; ¿wais sipkarang witing sulani balna yulnina kidika yulnin? Kat witing sangnika kidika sau akaupak dakwi yayakna.”

³⁴Etíope al kidika yaklauwi Pilip yakat kalyulwi dakana: —Plisma yayultah, ¿prapit yulwa kidika wais yulniyah: witing silp yulniyah, kidika awaskat muih ūk yulni kat yulwih?

³⁵Kaput laih Pilip witing laihna etíope al yulwi talwa wauhnitaya kidika kaupak, dawak Jisas yulni balna kidika sumalna.

³⁶Kidika usnit kat, pa as bayayakwak was pakdai, dawak etíope al kidika yulna: —Akat was pakki; ¿yang akat was utuh'yaknin kidika sip-awasyah?[6]

³⁸Kaput laih kār kidika laihwatna; dawak albupak yaklalakna, dawak Pilip yaklauwi was utuh'yakna.

³⁹Waspa kaupak kilwi kalalahwak, Dawan Spiritni yaklauwi Pilip kidika duwi kiuna, dawak etíope al kidika witing watwi talwasdana; kaunah witing tanit yakat ban alasna kiuna.

⁴⁰Pilip kidika Azoto yakat sakdai, bahang tawan binina kidika munah bayakwi kiuna yul wisamni kidika sumalwinah, ban Cesarea kat kiuna.