Read Mayangna Apastil Balna Warknina 9 Bible Online

Apastil Balna Warknina 9 - Mayangna bible

Apastil Balna Warknina 9

¹Saulo, witing Dawan kau kulyang balna yakat inin yamwa kidika dawasdai. Kidika bahang, sumalyang nuhni yakat kiuna,

²dawak wauhtaya as kalanin kalyulna, kidika wauhnitaya karak Damasco kau sumalnin ūni balna yakat kiwi walna atnin, Ta Wisamni[7] usnit uiwa balna yakat, ahal dawak yayal bik laihwi silak kau duwi kiuna atnin Jerusalén yakat.

³Kaunah Damasco tawanni nuhni yakat ulis dawakat, makau kisang kidika kaupak yaringni as kaina, bahang witing yaihnit yakat yaringni palni duna.

⁴Saulo sau yakat bukna, dawak yul as tapani yakat dakana: “Saulo, Saulo, ¿ais yamta yalaihnin yauita aiwamahn?”

⁵Saulo yulwi dakana: “¿Waismahn, Dawan?” Biriwi nangnitlana: “Yang kuduh Jisas, laihkuhti uita aiwaman kidika.[8]

⁶Lawa tawan nuhni yakat yawah; bahang kidika yakat mayuyulwarang man ais yamnam kidika.”

⁷Saulo karak uina muihni balna kidika muihsakdadauna, kat dinit yulwa kidika dakakana kaunah muihni laih as bik tatalwasdai bahang.

⁸Usnit kat, Saulo sau kaupak yaklauna; dawak minikpa sahmuhwak sip di talwasdana. Kaput laih tingni yakat laihwi duwi uina Damasco yakat.

⁹Kidika yakat ma bās sakdai minikpa di talwas, di bik kaswas, dinin bik diwas.

¹⁰Damasco yakat kulyang muihni as sakdai ayangni laih Ananías, bahang witing yakat Papang kiuna dai amana kapat kau, dawak kalyulna: “¡Ananías!” Witing nangnitlana: “Akat sakyang Dawan.”

¹¹Dawan yaklauwi kalyulna: “Lawa yawah ta as ayangni tingpal atwa yakat, dawak Judas ūni yakat yulta dakah muih al as Tarso kaupak kidika, ayangni laih Saulo. Witing minityulwa sakki,

¹²amana kapat kau witing talna, muih as ayangni Ananías atwa kidika kiwi kawi tingni kidika witing minityakat yuna, witing minikpa kidika watwi duna atnin yulni.”

¹³Kidika dakawi Ananías yulna: “Dawan, kidika alni yulni muih manas yayuyulna, Jerusalén yakat dutni manas yamna kidika, tawanma holi kidika yakat.

¹⁴Dawak waralaih akat kaina, sumalyang balna parasni kalalawak, man ayangma yuyulwa balna bitik laihwi silak kau duwi kiuna atnin.”

¹⁵Kaunah Dawan yaklauwi kalyulna: “Yawah, kat kidika alni laih waltik yaktik dunayang, yang yulki yulna atnin nisan ūk balna yakat, king balna yakat, dawak Israel balna yakat bik.

¹⁶Yang lawik niningkaki ki, dalani mahni wauhwarang kidika yang yulki.”

¹⁷Ananías kiuna Saulo sakkidika ūni yakat. Witing kiwi kawi, tingni kidika minit yakat yuna dawi kalyulna: —Wirah Saulo, Dawan Jisas, man yakat kalahna kidika tapas yakat aiwalikman kat, yasihna, man mamakpa watta duna atnam yulni, dawak bik Spirit Holi kidika mabuhngdanin yulni bik.

¹⁸Kidika minitni yakat, Saulo minikpa kaupak waspa dini kisini kapat bubukna, dawak watwi minikpa talna. Dawak yaklauwak was utuh'yayakna.

¹⁹Kidika usnit kat di kasna dawak parasni duna, dawak ma buas sakdai kulyang muihni balna Damasco kau yalalahwa balna kidika karak.

²⁰Kidika usnit kat, Saulo mahka sumalna sumamalwa ūni yakat, bahang yulna Jisas kidika laih Papang Walanibis.

²¹Yulwak dakakawa muihni balna bitik kidika, yuyulna: —¿Adika muihni awasyah Jerusalén yakat muih laihnin walwādai kidika, Jisas ayangni yuyulwa balna yakat? ¿Dawak bik sihm kidika muihni awasyah akat kaina dai kidika muih laihwi sumalyang tunan muihni balna tingnina yakat āna atnin?

²²Kaunah Saulo witing baisa yulna yamaduwas, kaput laih ju balna Damasco kau yalalahwa balna yakat kulninna kidika pini yammukwadai sip amanglalawas, dawak niningnakawadai Jisas kidika laih Mesías.

²³Ma mahni bayakwak, ju balna kidika yulbabauna Saulo kidika laihwi inin,

²⁴kaunah witing amanglana. Pukta madah tawan nuhni dūrni yakat tahahawadai, īna atnin,

²⁵kaunah witing disainipil balna yaklauwi laihwi uslun nuhni as kau pasyakat āwi tawan nuhni daklana munah alahwi lalakwak pukta. Kaput laih kiri yaklana dai.

²⁶Saulo Jerusalén yakat kiwi kawi, kulyang balna karak kaluduhnin kulna; kaunah bitik laih yamaniduduna, kat witingna laih rahm kukulwasdai witing bik kulyang as kidika.

²⁷Kaput kaunah, Bernabé yaklauwi duwi kiuna apostel balna yakat. Dawak diyulna, Saulo laih witing talna Dawan kidika tapas yakat, dawak bik Dawan yaklauwi yulkalbauna, dawak bik, Damasco yakat, Saulo witing sumalna Jisas yulni, kulnin dadasni karak.

²⁸Kaput laih Saulo kidika Jerusalén yakat watna, dawak witingna karak likdai. Dawan yulni sumalwadai kulnin dadasni karak,

²⁹ju muihni balna karak yulbauwadai, grik tuni yuyulwa balna kidika karak; kaunah witingna inin kukulwādai.

³⁰Kulyang balna, kidika amanglalana kat, Saulo kidika Cesarea yakat duwi uina, dawak kidika munah Tarso yakat sisihna.

³¹Kaput laih suts kidika, Judea, Galilea, dawak Samaria sauni bitik yakat kulninna aslah dai, dawak spirit niningkauh yamni bararakna. Dawan yamanidunin karak yalalahna, dawak Spirit Holi ilpni karak, baisa mahni kakalna.

³²Pita, witing kulyang muihni balna yakat awaihwi talwalikdai, bahang kaput laih Lida kau kulyang balna yalalahwa yakat bik talna kiuna dai.

³³Kidika yakat al as ayangni Eneas, kidika karak kalpakna, bahang al kidik laih kurih tiaskaubās kalahna, sininwah buhlana kat.

³⁴Pita kalyulna: —Eneas, Jisaskrais sikmanis kaupak madulauwi. Lawa pama ridi yamtah. Eneas kidika minitni yakat yaklauna.

³⁵Lidia dawak Sarón kau yalalahwa balna bitik tatalna yaklauwak, dawak Dawan yakat wiryaklalana.

³⁶Kidika mani balna yakat, Jope tawanni nuhni yakat kulyang as sakdai kidika laih Tabita, grik kau laih Dorcas.[9] Adika yal witing wark yamni balna manah yamwadai, muih miniknakunni balna yakat ilp diawadai.

³⁷Kidika mani balna yakat, Dorcas kidika siknis kalahwi dauna. Witing muihni nuhni kidika suhwi dawi, ū makau uptis yakat ihilna.

³⁸Jope kidika laih Lida yaihnit ulisdai, bahang kidika yakat Pita sakdai; bahang kulyang balna kidika amanglalana kat, muih ahal bu yakwi sisihna, Pita yakat kalyulna atnin: “Man tahatas Jope akat aiwah.”

³⁹Dawak Pita laih kidika balna karak kiuna. Kiwi kawak, uptis makau ilwi lalakna kidika yakat duwi uina; tingmak balna kidika bitik kakaidana, Pita yakat awaihdadakna dawak prakni balna kidika niningkakana, Dorcas kidika dauwas mani balna yakat asna yamna dai kidika.

⁴⁰Pita yaklauwi diyulwak kidika kaupak bitik kalalahna, dawak limbabahwi minityulna; kidika usnit kat dauna muihni yakat talwi yulna: —¡Tabita, lawah! Yal kidika minikpa sahmuhna, dawak Pita yakat talna dawak yalahna.

⁴¹Dawak, witing tingni yakat laihwi dulauna; kidika usnit kat, kulyang balna, tingmak balna yakat diyulna uina atnin, kaput laih sangka kalna kat niningnakana.

⁴²Adika kalahna kidika Jope tawanni bitik dakakana, dawak muih manas Dawan yakat kukulna.

⁴³Pita, witing kidika tawanni nuhni yakat ma buas watna sakdai, Saiman di unitak pauyang muihni ūni yakat.