Read Mayangna Roman 1 Bible Online

Roman 1 - Mayangna bible

Roman 1

¹Yang, Pal, Jisaskrais dini yamyang yang, bahang adika wauhnitaya ultayang. Papang yaklauwi yayulna yawinik, dawak yayakwi yaduna witing aposnitel atnik, dawak witing yulni kidika sumalna atnin muih balna yakat, laihwi yaknin yulni kidika.

²Witing pranipit balna munah, Papang yaklauwi adika yulni diyulna dai Ulna Holi kidika munah.

³Kidika yulni balna kuduh witing Walanibis Jisaskrais yulni, mayang Madakiwan kidika, witing muih kapat laih king Devid sulani dai, kaunah Spirit Holi yamyang kidika yaklauwi dauna kaupak watwi dulauna bahang, Papang walanibis kalkulna ki, dawak parasni bitik palni kalana.

⁵Jisaskrais munah, Papang yaklauwi witing aposnitel yakulna ki, dawak bik witing ayangni kidika sumalnik, kaput laih nisan balna bitik pasyakat witing yakat kalkulnin, dawak yulni dakanin.

⁶Kidika balna pasyakat manna bik bangmana, Roma kau yalalahwa kidika. Papang dalani ditalwi, bahang diyulna uina atnin Jisaskrais dini kalna atnin yulni, dawak bik witing tawanni muihni balna atnin. Papang dawak Dawan Jisaskrais tingnikih, kulnin aslah kidika bik mamatna yakat utuhwang.

⁸Tatuna, Jisaskrais munah tingki kalatayang Papangki yakat, manna bitik yulmana, kat pa bitik yakat manna kasak kultamana kidika yuyulwi.

⁹Papang, yang witing dini yamtayang kidika, ising bitik palni, witing walanibis al yulni sumaltayang kidika, kidika laih witnis ki ma bitik yakat mikityultayang kidika,

¹⁰kalyultayang kidika ban ki Papang yakat, witing kulnin kidik kaput karang kat yāwakat yawik ditalna atnik.

¹¹Kat ditalkih yāwi, spirit kau ilp dianik, kaput laih baisa parasni atnin;

¹²yuldarangkat biri biri makulnik dulaunin, adika kasak kulnin manna dawak yang bik duda kidika.

¹³Wirah balna manna dakanauh, wat wat laih dukih yawi yawik manatalnik, kauna warmani kat ban taki balna kidika putwi. Dukihyawa kidika laih manna pasmangna yakat spirit minik kidika bahnik, nisan ūk balna pasyakat yamnayang kapat.

¹⁴Tras dutayang kaldakayang muih bitik kau, sins duyang balna pasyakat dawak baisa sins duwas balna pasyakat bik;

¹⁵kidika bahang dukih palni yawi yul wisam kidika sumalnik manna Roma kau bangmana yakat.

¹⁶Asaldasyang yul wisamni kidika, kat kidika laih Papang parasni bahang, muih bitik witing yakat kukulwarang kidika laihwi yaknin kidika duna karang, tatuna laih Ju balna yakat, kaunah ju awas balna yakat bik karang ki.

¹⁷Kat adika yulni manikingkawi, amput Papang kidika mapātki kaupak mailaihwi yakwa kidika: kidika laih kasak kulnin kau; dawak kasak kulnin kau manah. Ulna kidika yakat kaput yulwi: “Barangni muihni kidika muihni kidika laih kasak kulwa kidika karak sangka karang.”

¹⁸Kaunah mayang taldi Papang wahni yamadangni kidika makau kisang kidika kaupak kaiwi, muih dudutni la kat awas kidika balna minitna yakat, kat witingna dutnina kidika yaklauwi lāih yakwas ki di rahm kidika.

¹⁹Papang kidika sipki, amangnilanin, bahang witingna yamni amanglalawi; kat witing sip yaklauwi lāih kalahna bahang;

²⁰Papang yakat talnin sip-awas kidika sipki amanglanin, witing di balna yamna yakat laihdi taldarang kat. Rahm kaput laih, sau adika yamna kaupak, lāih palni talnin sipki witing laih Papang, dawak parasni nuhni kidika kiwi witwaski. Kidika bahang muih dudutni balna kidika laih pātnina dawak disnin kidika laih diski.

²¹Papang kidika amangnilalana bik, ayangni nuhni yayamwas ki Papang kapat, dawak tingki bik kalalawaski. Nawatkauh laih di dauh manah kulninna yakat kukulna, dawak kulninna tapadadas kidika puksani manah kalna.

²²Sins nuhni duyang mayang atwi, kauna mutu balna;

²³kat satuk wirlalana bahang Papang dauwas alasnina yaksihni kidika, dawak muih dauyang wayani karak, kamanah bik awaski kaunah, di kalni arungka duwa balna, uhu satni balna dawak, bil wayani bik.

²⁴Kidika bahang Papang yaklauwi ruhmwi dana, witingna muihnina yakat maisihni kidika dukih diawa bahang, dawak witingna biri biri asalni dini kidika yayamna.

²⁵Rahm Papang kidika pāni yakat, alas kidika wawalna, dawak Papang di yamna balna yakauh ayangni nuhni yayamna, kaunah Papang yakat laih awaski, di balna yamna kidika, bahang witing yakat kuduh ayangni nuhni yamnin kidika nining ban kaput atnin. Kaput kawang.

²⁶Kidika bahang Papang yaklauwi damukna, asalni lani dukih diawa yakat. Yalnina balna kat bik, yayal aslah payayahwi;

²⁷sihm kaput bik laih, ahal kidika bik yayal karak kalduduwadai kidika dawi, ahal as kaldunin kidika kauh dukih diawi. Ahal aslah biri biri yamnin asalni kidika yayamwi, dawak witingna alas muihnina nuhni kidika dutni wawauhwi, dutni yayamwa kidika yulni.

²⁸Papang yakat amanglanin kukulwas bahang, witing yaklauwi damukna di dutni kukulwa yakat, kaput laih yamnin dini awas kidika yamna atnin.

²⁹La dutni satni balna bitik dibuhngki,[1] dutni, lalah manah dukih, dawak di dutni karak. Kidika balna laih tumyang balna, muih iyang balna, alas muihni balna, dawak muih yulni bauwi karayang balna.

³⁰Muih ūk balna yakat dutni diyuyulwi, Papang waihnila balna, tapadadas, witingna manah kapat kaldakakawi, dutni balna kidika walwi yayakwi, papangnina yulni dakakawas ki,

³¹amanglakih diawaski, yuyulwa yakat yayamwas ki, muih kau minikun bik tatalwas ki, dutni dawak disnin kidika amanglalawas ki, dawak minikun talnin bik diski.

³²Witingna yamni amanglalawi, wais muihni kat kidika dini balna yamwarang kat dauna karang kidika; kaput kaunah witingna ban yayamwi; dawak bik muih ūk balna yayamwarang kidika dukih diawi.