Read Mayangna Roman 10 Bible Online

Roman 10 - Mayangna bible

Roman 10

¹Wirah balna, dukih yāwak mikityultayang kidika Papang yakat Israel balna yulnina, kidika laih laihwi yaknin kidika witingna duna atnin.

²Witingna ilpnina yulnik sipki, kidika laih Papang dini yamnin dukih diawi; kat kidika dukih diawa kidika laih rahm kasak amanglana kidika munah awas bahang.

³Kat witingna amanglalawas ki Papang yaklauwi muih al yakat lā kat kapat kalyamwa kidika, kaunah witingna laih alas lā kat atnin kidika yayamwi; kaunah Papang laih kaput yamwaski mayang lā kat atnin kidika.

⁴Kat lā kidika laih kiwi watna ki Krais yakat, kaput bahang kasak kulnin kidika kau sipmayang lā kat kalnin kidika.

⁵Lā kidika munah, lā kat atnin kat, Moses adika ulna: “Angdika muihni Lā kat yamwa kidika, witing laih kidika munah sangka karang.”

⁶Kauna lā kat atnin kidika kasak kulnin munah karang kat, aput yulwi: “Kulwinih: ‘¿Wais makau kisang yakat kilwarangyah?’ —adika laih, Krais kidika sau yakat yaklaknin—;

⁷kaput awas bik ‘¿Pa kudungni tuhni yakat wais yaklakwarangyah?’ ” —adika yulwi, kidika laih Krais kidika dauna balna paskaupak yaklauna atnin.

⁸¿Bahang, ais yulwih?: “Yulni kidika laih yaihmat yakat ki, tampas yakat dawak kulnam yakat.” Adika yulni kuduh kasak kulnin yulni kat sumaltayangna kidika.

⁹Man tampas munah amanglataman kat Jisas kidika Damawan, dawak kulnam kau kultaman kat Papang yaklauwi dauna kaupak dulauna, kaput kat laihwi yaknin kidika laihnaman karang.

¹⁰Bahang maising kau kuldi lā kat atnin kidika, dawak matikpas kau amangladi Jisaskrais laihwi yakna kidika duna atnin.

¹¹Ulna yakat yulwi: “Wais witing yakat kulwa kidika, alas kalyulna kaldakawas karang.”

¹²Satuk awaski ju dawak, ju awas balna kidika; kat Dawan kidika, sihm ki muih bitik Daninawan, dawak witing ayangni kau yakwi yuyulwa balna kidika bitik yakat mahni palni diawi.

¹³Kidika bahang adika yulwi: “Dawan ayangni yuyulwa balna bitik kidika, laihwi yaknin kidika lalaihna ki.”

¹⁴Kauna, ¿amput mistik kalahwarang yah witing yakat kalkukulwas kidika? ¿Dawak amput witing yakat kukulwarang yah, witing yulni kidika baisa yuyulwak dakakawas kidika? ¿Dawak amput dakakawarang yah, muih as bik dis kidika disumalna atnin?

¹⁵¿Dawak amput sumamalwarang yah, sihna muihni balna awas kidika? Ulna yakat yulwa kaput: “¡Ampat nuhni yaksihnyah yul wisamni yamni duwi aiwa kidika!”

¹⁶Kauna muih bitik yul wisamni kidika duduwaski. Isaías yulwa kaput: “Dawan, ¿yangna sumalnayangna kidika wais dakanayah?”

¹⁷Kaput bahang, kasak kulnin kidika kalahwi yulni dakadamunah yakaupak kaiwi, dawak yulni kalahwak dakada kidika kuduh Krais yulni balna.

¹⁸Kaunah, yultik dakayang: ¿Yulni kidika dakakawas dai awasyah? ¡Kaput awaski! Kat Ulna yakat aput yulwi: “Witingna dinitnasuru yuyulna kidika sau bitik yakat kalahwi kiuna, sau bangni balna bitik yakat yulnina kidika kiuna.”

¹⁹Dawak wattik yultik dakayang: ¿Israel balna kidika amanglalawas kat awasyah? Tatuna, Moses yulwi: “Yang lawik minit anyang manayamki tawan as tawan awas kidika; diyamting kat kulninna daukakalwarang tawan as niningyakat amanglanin kulwas kidika.”

²⁰Usnit kat, Isaías yulwi: “Yawawalwas muihni balna dai kidika yayakna; yang yulki yulwi dakakawasdai kidika witingna yakat lāih alahwanayang.”

²¹Israel balna yulnina kidika yulnin laih, Isaías yulwi: “Mapiris kaupak masan kat tingki yunayang, tawan as yul dakawas dawak bik kulnin dutni kidika yakat.”