Read Mayangna Roman 13 Bible Online

Roman 13 - Mayangna bible

Roman 13

¹Muih bitik lā muihni balna dinitna yakat atninki. Kat lā muihni as bik Papang kaupak kaiwas awaski, dawak yamnin balna yulwa kidika laih witing yaklauwi āna ki.

²Kaput bahang wais kat lā muihni niningkauh yaklauwa kidika laih, Papang yaklauwi yamnin -ana kidika niningkauh ki. Dawak niningkauh yaklauwa balna kidika laih wah diana karang,

³kat kabamint muihni balna kidika muih bilninalaunin bang-awaski, kaunah dutni yamyang balna niningna yakat laih. ¿Lā muihni balna yamaninadutas yalahkih mawih? Kaput kat yamni awah, lā muihni kidika matalwarang,

⁴kat Papang warkni yamwasak bahang man yamni atnam yulni. Kauna dutni yamma kat, kidika laih yamadunamki; kat lā muihni kidika dauh laih isparah kidika duwaski, kat Papang warkni yamwabahang, muih dutni yamwa kidika minit lauwi kalana atnin.

⁵Kaput bahang, lā muihni dinit yakat atnin, wah duwas atnin manah laih awaski, kauna kidika laih yamnin as ki makulnik yakat.

⁶Kidika yulni manna bik tunan minit kalatamana; kat lā muihni balna laih Papang dini yayamwa bahang, kidika yayamwi.

⁷Ampus duninna kidika kaput diatanauh. Kalanin dutamana kidika kalatanauh; dawak tunan minit launin dutamana kidika minit lautanauh; rispik kalanamna kidika risnipik kalatanauh, yamni kaltalnam kat, yamni kaltalah.

⁸Muih as karak bik tras dunah, biri biri dalani kaltalnin trasni duda kidika laih ūk ki; bahang wais kat wanaihni yakat dalani kaltalwa kidika, uman yamna lā yulwa kaput.

⁹Lā balna yakat yulwi: “Marid lāni bahwinih, muih iwinih, di malwinih,[10], tumwinih”; kauna adika, dawak lā ūk kidika bitik akat libitna ki: “Wanaihma kidika dalani talah man muihma kapat.”

¹⁰Dalani lani duwa kidika wanaihni yakat dutni yamwaski; kaput bahang dalani lāni kidika lā yakat yamni kawi.

¹¹Adika balna bitik ismangna aitanauh warmani balna mayalahda akat, dawak amanglatanauh waradika laih sahmuhnin mani. Kat mailaihwi yaknin kidika laih ulis palni ki, muhnilau adika yulni dakanamayang dai kidika karak dawakat.

¹²Pukta adika bayakwi kiwi, payahlanin manahki; kidika bahang pukta warkni kidika dadang; dawak yaringni kidika maparakki kapat dudang, kalbauyang muihni as kalbaunin prakni kāwa kapat.

¹³Lā kat atnin, madah kapat. Kasnin alasna dawak wasak daunin kidika balna yakat kiunin awaski, pini yayalni balna karak kalpaknin awas, pini dakwi kalahnin dawak tumnin bik awaski.

¹⁴Nawatkauh laih Dawan Jisaskrais kidika prakmana kapat dutanauh, muihmana nuhni dutni balna dukih kidika kalalawinih.