Read Mayangna Roman 14 Bible Online

Roman 14 - Mayangna bible

Roman 14

¹Kasak kulnin lani yudutni duwa muihni kidika manna yamni dutanauh, witing karak kalbibilwinih.

²Yuldarangkat, muih as as kukulwi kasnin satni balna bitik kidika kasnin, ūk balna laih kasak kulnin lani yudutni duduwa kidika laih di minik balna manah kakaswi.

³Bahang yamni ki, di satni balna bitik kakaswa kidika yaklauwi, di minik satni balna manah kaswa kidika yakat dauh kalkulnin awaski; dawak biri bik sihm kaput kalkulnin awaski, kat Papang kaput yamni talwa bahang.

⁴¿Man kidika wais manh muih dini yamyang ūk yakat ais yamwa kidika yulnam? Yamni karangpa, dawak dutni karangpa, witing daniwan kidika yamwarang. Kaunah yamni kalahwarang ki, kat Papang laih parasni duwi kalawak yamni kalnin.

⁵Di ūk: Muih buas, ma as as kidika tanit nuhni kukulwi, ma ūk balna kidika karak dawakat, dawak ūk balna laih kukulwi ma balna bitik kidika laih kapapatki. Muih bitik ais kulwa kidika yamni amanglanin, ais yakat kulwa kidika.

⁶Ma as as yakwi duwa kidika, Dawan ayangni nuhni yamnin yulni, kidika kaput yakwi duwi.[11] Dawak di bitik kaswa muihni kidika Dawan ayangni nuhni yamnin yulni, kidika laih witing kaswi, dawak Papang yakat tingkih kalawi; di as as kaswas kidika laih dawan ayangni nuhni yamnin yulni, kaswas dawi, dawak sihm kidika bik Dawan yakat tingkih kalawi.

⁷Muih as bik sip alas sangka awaski, dawak dauwa kidika bik silp dauwaski.

⁸Sangka mayang kat, Papang dini sangka mayang; dawak daudarang kat Dawan dini daudi. Kaput bahang sangka mayang, dawak daudarang bik Dawan dini mayang.

⁹Kidika yulni Krais dauna dawak watwi sangnika duna: kaput laih, sangka balna dawak dauna balna Daninawan

¹⁰¿Kaput kat ais yamta wanaihma yulni yultamahn? ¿Dawak man ais yamta dauh kalkultamahn? Mayang bitik laih Papang muhni yakat malawarang ki, witing malaki yamnin.

¹¹Ulna yakat yulwi: “Yang sangkika yakat yaktik yultayang, Dawan kaput yulwi, muih bitik yang muhki yakat limbabahwarang dawak bitik Papang ayangni nuhni yayamwarang.”

¹²Kaput bahang, mayang bitik Papang yakat mayulki yuldarang ki.

¹³Kaput bahang, biri biri mayulki yulnin awaski. Nawatkauh laih, manna yamtanauh wanaihmana buknin awas dini kidika, kidika awasbik kasak kulwa kidika yamadangni yakat ānin awas.

¹⁴Yang amanglatayang maisihni awaski witing silp muihni yakat, Dawan Jisas yakat kulyang kapat, kidika laih yamni amanglatayang. Kaunah muih as kat dutni kulwarang kat di as niningyakat, kidika laih dutni karang ki witing niningyakat.

¹⁵Waralaih, man di kastaman kidika yulni wirahma dutni kulwakat, kidika kulnin lani laih dalani lani awaski. ¡Man kastaman kidika yulni kidika muihni disnin awaski, witing yulni Krais dauna kidika!

¹⁶Sans kalatanangkat dutni yulnin awaski, manna di yamni dutamana kidika.[12]

¹⁷Kat Papang king kāwa lani kidika laih di kasnin dini satni balna kapat awaski, kaunah lā kat yalahnin, kulnin aslah dawak alasna, Spirit Holi munah.

¹⁸Adika kaput Krais dini yamwa kidika, Papang yamni talwi, dawak ahal balna bik yamni tatalwi.

¹⁹Kaput bahang, kulnin aslah yakat dukiwa kidika waltanauh, biri biri laihwi dulauwi yamnin kidika.

²⁰Papang warkni kidika datanang disnin awaski, kasnin dini kidika yulni. Rahm kidika laih, kasnin dini balna bitik kidika taski awaski, klin ki; dutni kidika laih di as kasdakat muih ūk kasak kulnin duwa kidika dispamwa kidik, dutni ki.

²¹Tanit yamni ki dimuihni kasnin awas, wain dinin awas, wanaihma kalni bauwak buknin awas dini kidika yamnin.

²²Kasak kulnin lani dutaman kidika, man alas dunamki Papang muhni yakat. ¡Yamni palni ki, kidika muihni pri lani duwa kidika, kulnin yakat dutni as bik dis!

²³Kauna wais kat, yamni palni kaldakawas kidika, kasnin awaski, kaunah kaswarang kat pāt kawi, kat kasak kulnin karak kaswas bahang, di bitik kasak kulnin karak yamwas kidika laih dutni ki.