Read Mayangna Roman 15 Bible Online

Roman 15 - Mayangna bible

Roman 15

¹Kasak kulnin yakat parasnimayang kidika, mayang madiki kapat yamni ki kidika muihni kasak kulnin binilah duduwa balna yudutnina kidika, mayang yamni talnin kidika manah walnin awaski.

²Mayang bitik laih mawanaihki dukih kalawa kidika yamnin, witing niningyakat yamni balna kidika yamnin, kaput laih biri biri baraknin kidika yamna mawarang.

³Kat Krais bik witing alas dukih kalawa kidika walwasdai bahang; nawatkauh laih, Ulna balna yakat yulwa kidika witing muihni yakat kaiwi kalahna: “Dutni mayuyulna balna kidika yang mikit yakat bukna.”

⁴Muhnilau kau Ulna balna yakat yulna dai kidika, mayang akat maisumalnin ulna dai, kidika munah walaniānin duda kidika, tahanin kidika dudang.

⁵Papang kuduh naini tani tahanin dawak walaniānin yuwa kidika, manna yakat ilp manawarang, biri biri yamni yalahnin kidika, Jisas Krais yakat talwi sampla as.

⁶Kaput laih bitik asla, madikitsuru aslah, Papang ayangni nuhni yamtanauh, Dawan Jisas Krais Papangni kidika.

⁷Kapat bahang, biri biri yamni awanauh, Krais manna yakat manaduna kapat, Papang alasnina yaksihni kidika dini.

⁸Sipyang manayulnik, Krais kaina Ju balna dinina yamnin, kaput laih mamuihkibararak balna kau pramis yamna dai kidika kat yamna atnin, kaput laih manikingkanin Papang laih pranimis kat barangni yamwi.

⁹Kaput bik kaina Ju awas balna kidika bik Papang ayangni nuhni yamnin witing dalani lani duwa kidika munah, Ulna yakat yulwa kaput: “Kidika bahang nisan balna pasyak ayangma nuhni yamki dawak lawana unbauki ayangma yakat.”

¹⁰Pa ūk kau bik Ulna yakat yulwi: “¡Alasna awanauh, nisan balna, Papang tawanni kidika karak!”

¹¹Dawak pa ūk yakat aput yulwi: “Nisan balna dawak tawan balna bitik, ¡Dawan ayangni nuhni yamtanauh!”

¹²Isaías bik ulna: “Isaí rikni kaupak bik kalahwarang, yaklauwarang nisan balna pasyakat kabamint kanin, witingna balna laih, witing yakat tahanin kidika āwi duduwarang.”

¹³Papang yaklauwi tahanin diawa kidika, alasna dawak kulnin aslah kidika karak manabahngwang, witing yakat kasak kultamana kidika, dawak tahanin kidika nuhni palni manawang Spirit Holi munah.

¹⁴Wirah balna, yang yamni ising aitayang manna laih minikun kulnin kidika manabuhngki dawak sins lani balna bitik, dawak biri biri kalsumalta lanmana;

¹⁵kaunah adika wauhnitaya akat ban ulnayang yul as as ki, damatnakahnin awas yulni. Adika yamtayang, kat Papang minikun talnin kidika kau yana bahang,

¹⁶Krais Jisas dini yamnin, ju awas balna kidika yamnina. Sumalyang warkni yamtayang kidika laih Papang yulni kidika sumaltayang, kidika laih ju awas balna kidika witing muhni yakat duyawinik, minitdis kalanin walapni yamni as kapat, Spirit Holi yaklauwi holi yamna kidika.

¹⁷Rahmki dutayang Papang alasnina yaksihni kidika yamnik, Krais Jisas yakat, Papang warkni yamtayang kidik,

¹⁸yakat di as bik yultasyang, Krais witing yang akat yayamna kidika awaskat, ju awas balna kidika Papang yulni dakanin yakat duyawinik. Kaput laih yul kau bik dawak warkni bik yamna ki,

¹⁹sainni balna dawak taldas dini balna yamwa parasni kau, dawak Papang Spiritni parasni kau bik. Kaput laih Krais yulni wisamni yamni adika sumaltik yawanayang, Jerusalén kaupak Iliria sauni kat.

²⁰Kaunah nining sumaltayang yul wisamni yamni kidika sumamalwas pāni yakat Krais yulni kidika yulbautayang, kaput laih rahni uhukna kidika minit yakat rahni ūk uknin awas yulni,

²¹kaunah nawatkauh laih Ulna yakat yulwa kaput: “Tatalwarang, baisa wat as bik witing yulni baisa duduwas dai kidika; amanglalawarang witing yulni yuyulwak dakakawas dai kidika.”

²²Kidika yulni, sip yawik manatalasyang, wat wat lawanayang dai bik yawinik.

²³Kaunah waralaih warkki dahnyamnayang bahang adika sauni akat, dawak bik kurih balna bayakna yakat yawik manatalnik kidika ban kulnik yakat sakdai bahang,

²⁴tahatayang España yakat yawaki mani yakat yawik manatalki. Manatalkih yawa kidika manatalki usnit kat, ma parahni karang bik, tahatayang manna ilp yatanama, takit yakat ban bayaktik yawinik, angkat yawayang kidika yakat.

²⁵Kauna waralaih Jerusalén yakat yawayang, ilp dini duyawayang mawirahki balna yakat.

²⁶Kat Macedonia dawak Acaya muihni balna kidika di walwi ududuhna, mawirahki miniknakunni Jerusalén kau bangkidika balna dinina.

²⁷Witingna sip kulninna lani yayamna, kaput kaunah, kidika laih witingna yamninna dini dai bahang, kat ju kasak kulyang muihni balna kidika bik witingna kaput yayamna dai bahang spirit lainni yakat ju awas balna yakat.

²⁸Kaput bahang yang adika dini dahn yamki kat, di ududuhna balna kidika witingna yakat diaki, kidika usnit kat alahwik yawaki España yakat, kidika bayakyawayang yakat, āwik manatalki.

²⁹Yang yamni amanglatayang yang yawaki kat, Papang blinisin kidika manas duduwarang.

³⁰Wirah balna, Madakiwan Jisaskrais dawak spirit yaklauwi dalani talnin mayawa kidika, manayultayang adika kalbaunin adik aslah kalpakdang, bahang yang yulki Papang yakat mamatna yultanauh.

³¹Papang yakat yultanauh, Judea kau kukulwas muihni balna kidika kaupak yalaihwi yakwang, dawak mawirahki balna Jerusalén kau yalalahwa balna dinina duyawayang adika yamni duduna karang,

³²kaput laih, Papang dukih kat, yang alasna yawik manatalki, dawak wingkita bik puhki yawaki yakat.

³³Papang kulnin aslah lani duwa kidika manna karak karang. Amén.