Read Mayangna Roman 16 Bible Online

Roman 16 - Mayangna bible

Roman 16

¹Mawirahki yal Febe, Cencrea suts dini yamyang yakat kalyultayang.

²Dawan ayangni kau yamni kaldutanauh, wirah kasak kulyang balna yayamwa kapat, dawak witing dukih kalawa balna kidika ilpni kalatanauh, kat witing laih ilp manas yamna bahang, dawak yang akat bik ilp yana.

³Parastanauh Prisca dawak Aquila yakat bik, Krais Jisas warkniyamtayangna yakat kaltalyang yamni yangna kidika.

⁴Witingna sangninaka bik yamadahngni yakat ahana dai kidika, yang sangkika laihwi yaknin yulni, yang manah tingkih diatasyang, kaunah suts kau wirah balna ju awas balna kidika bitik laih tingkih sisihwi.

⁵Kaput bik pararaswang wirah balna kalududuhwa kidika Prisca dawak Aquila ūni yakat. Epeneto yakat bik kalyultanang paraswang, witing kidika Asia sauni yakat Krais yak kasak kulwa kidika as dai.

⁶Mery yakat bik kalyultanang paraswang, manna yulmana kasak wark yamna kidika.

⁷Andrónico dawak Junia yakat bik yultanang pararaswang, witingna karak aslah silak yakat yangna dai; apostel balna pasyakat tanit yamni kalalahna, dawak witingna tatuna kulyang kakalna, yangkarak dawakat.

⁸Ampliato yakat bik kalyultanang paraswang, kaltalyang yamni yangna kidika Dawan yakat.

⁹Urbano yakat bik kalyultanang paraswang, kaltalyang yamni mayang kidika Krais warkni pasyakat, dawak Estaquis yakat bik.

¹⁰Apeles yakat bik yultanang paraswang, Krais yakat kasak kulwa munah kalnilaknin manas kaina kidika, dawak bik paraswang Aristóbulo ūnipas kau balna kidika bitik.

¹¹Herodión yakat bik yultanang paraswang, dawak Narciso ūnipas balna kidika bitik witingna Dawan kau kasak kukulwa kidika.

¹²Trifena dawak Trifosa yakat bik yultanang paraswang, Dawan warkni yamwa kidika; dawak mawirahki yal Pérsida yakat bik, Dawan warkni kasak yamna kidika.

¹³Rufo yakat bik yultanang paraswang, Dawan kau kasak kulyang as kidika, dawak nanangni yakat bik, bahang witing laih yang nanangki as kapat dai.

¹⁴Asíncrito, Flegonte, Hermes, Patrobas, Hermas, dawak witing wirahni balna kidika yakat bik yultanang pararaswang.

¹⁵Filólogo dawak Julia, Nereo, dawak witing wirahni yal, Olimpas dawak wirah balna kasak kulyang witingna karak bangkidika balna bitik pararaswang.

¹⁶Kalparastanauh biri biri umnin holi kidika karak. Krais sutsni balna bitik, parasnin manasisihwi.

¹⁷Wirah balna manayultayang, talnauh sahwi kalalahwa balna kidika dawak kalni baunin yayamwa kidika bik, manna manasumamalna kidika niningkauh. Witingna kaupak naikau lawanauh,

¹⁸kat yus diski Madakiwan Krais niningyakat, kaunah witingna dukih diawa kamanah laih, dawak yulnina yudutni yamni kapat kidika kau alas diyuyulwi kulninna witingna manah kaldakakawas balna yakat.

¹⁹Bitik amanglalawi manna laih yul dakawi yamyang balna mana. Manna yamtamana kidika yulni alasnayang, dawak bik dukih yawi sins lani tuhni dutamana kidika lāih yaktanangkat di yamni yamnin yulni, kaunah dutni yamnin yulni laih awaski;

²⁰kaput laih kulnin aslah Papangni kidika yaklauwi sitan yakat taihwi labanwarang, manna kalmana dinit yakat. Madakiwan Jisas yaklauwi tingnikih kidika manawarang.

²¹Timoti bik parasnin manasihwi, yang karak kalpakwi wark yamwa kidika; Lucio, Jasón dawak Sosípatro kidika bik, pa aslah muihni yangna kidika.

²²Yang, Tercio, adika wauhnitaya ultayang adika, Dawan ayangni kau parasnin manasihtayang.

²³Gayo bik manaparaswi. Witing ūni yakat āwayang, dawak witing, suts yakat bik kidika kaput tingni yakat kalawi. Erasto bik manaparasnin sihwi, tawan nuhni kau yakat lalah laihyang kidika, dawak wirah Cuarto bik.[13]

²⁵Papang kau ayangni nuhni yamdang, yul wisamni yamni yang sumaltayang kau yuyulwa kaput manna yakat parasni manayamwang, dawak Jisaskrais sumalna balna kidika bik. Papang yaklauwi lāih yakwi niningkana kaput, di malni kau duwa kidika, bahang kidika dini laih malni kau sakki sau yamwas tanitkauh,

²⁶kaunah waralaih lāih yakwi niningkana ki, prapit balna uhulna munah, Papang yaklauwi lāni balna āna kaput. Papang warkni malnikau adika nisan balna bitik yakat niningnakana, kaput laih kasak kulnin, dawak bik yulni dakawi yamnin.

²⁷¡Papang laih witingna manah sins nuhni duwa kidika, ayangni nuhni yamnin yaksihni kidika laih ban kaput karang Jisaskrais munah! Amén.