Read Mayangna Roman 6 Bible Online

Roman 6 - Mayangna bible

Roman 6

¹¿Bahang ais yuldarangyah? ¿Baisa dutni kidika ban yamdarangyah, Papang minikun talnin duwa kidika baisa maniking kanin?

²¡Sip awaski! Mayang laih dutni niningyakat dauna mayang; ¿kaput kat amput daunin yakat baisa mayalahdarangyah?

³¿Manna amanglatasmanah Krais Jisas was utuh'yakna kidika munah aslah mailibitna kidika, kaput laih witing dauna kidika karak mailibitna kidika?

⁴Was utuh'yakna kidika yaklauwi Krais karak mainuna sau-ū yakat, dawak daudi watdi sau-ū kaupak yaklaunin yulni, kaput laih masangkika wisam as dudi yalahnin, sihm Krais yaklauna kapat, Papang parasni yaksihni munah.

⁵Krais karak aslah kalpakna mayang kat, kidika laih witing dauna kapat ki, dawak bik witing karak asla kalpakdarang witing dauna kaupak dulauwarang yakat.

⁶Amangladi, muhnilau mayang dai kidika laih Jisas karak libitwi pan prihni yakat pana, kaput laih mamuihki nuhni dutni yamwa kidika bitik daukalpamna, kaput bahang dutni kidika dini yamyang awas mawarangki.

⁷Kat, daudakat, dutni kaupak dakdi malahwi.

⁸Mayang Krais karak daudarang kat, kuldi witing karak sangka mayalahdarang.

⁹Amangladi Krais kidika dauna kaupak yaklauna, bahang watwi dauwaskarang ki. Daunin parasni kidika diski witing minityakat.

¹⁰Krais dauna kidika laih wat asla dauna dutni niningyakat, kaunah sangka atnin niningyakat laih, Papang yakat sangka ki.

¹¹Kaput bik, manna kaldakanauh dutni niningyakat daunamana, kaunah Papang niningyakat laih sangkamana Krais Jisas karak manalibitna yakat.

¹²Kaput bahang, manna datanang kat dutni kidika muihmana yakat ban atnin awaski, dawak kidika yaklauwi manayamwak muihmana nuhni dukih kalawa kidika yakat dakanamna awaski.

¹³Muihmana nuhni kidika dutni yakat ahawinih, dutni yamnin dini as kapat. Nawatkauh laih Papang yakat yawanauh, muih daunamana kapat dai kaunah watta sangka alahwanamana kidika, kaput bahang muihmana nuhni kidika lā kat yamnin dini as kapat kalatanauh witing yakat.

¹⁴Kaput laih dutni kidika parasni dis karang manna mamatna yakat, kat lā munah awas mana kaunah Papang kulnin dalani talwa kidika munah mana bahang.

¹⁵¿Bahang ais yah? ¿Dutni yamdarangyah lā dinit yakat awas mayang bahang, kaunah Papang kulnin minikun talwa karak mayang bahang? ¡Sip awaski!

¹⁶Manna yamni amanglatamana, muih dini yamyang as kaltamana kat damanawan yakat yulni daka yamnamna ki; kaput bahang damanawan kidika dini yamyang mana yulni daka yamtamana bahang. Adika kaput kat, dutni kidika yulni daka yamtamana kat, kidika laih daunin yakat manaduwi kiwi, sihm Papang yulni daka yamtamana bahang kidika laih lā kat yamnin yakat yalahtamana kidika.

¹⁷Kauna Papang yakat tingkih manna, tatuna laih dutni dini yamyangmana dai, kaunah waralaih kau yulni daka yamtamana, manasumalwak laihta dunamana kaput.

¹⁸Dutni dini yamnin kaupak dakta alahwanama bahang pri mana, bahang waralaih lā kat atnin kidika yamnin warkni yakat awanama.

¹⁹(Mamuihki nuhni amput kidika yakat yulbautayang, kat manna laih, yudutnimana kidika, adika dini yamni amanglatasmana.) Kaput laih tanit mani balna yakat muihmana kidika maisihni yakat ānamana dai, dawak dutni yamnin bik, kaput dai bahang waradika manna muihmana kidika lā kat yamnin kidika yakat ātanauh, kaput laih sangmanaka kidika holi dutanama.

²⁰Manna kidika dutni dini yamyangmana dai yakat, lā kat atnin dini yamtasmana dai;

²¹kauna ¿ais dini yamni dunamanah? Waradika laih manna kidika yulni manah asaldamana, daunin manah yakat dukiwa kidika.[3]

²²Kauna waralaih, dutni kaupak manalaihwi yakna bahang, Papang dini yamnin yakat āwanamana. Adika laihtak di as yaknin sipki, kaiwi kalahwarang kidika laih sangnika holi kidika, dawak witni yakat laih sangka ban atnin kidika karang ki.

²³Dutni yaklauwi minit mayawa kidika laih daunin, kaunah Papang prisantni kidika laih sangka ban atnin, Madakiwan Jisaskrais karak aslah ban atnin.