Read Mayangna 1 Kurint 1 Bible Online

1 Kurint 1 - Mayangna bible

1 Kurint 1

¹Pal, yang laih Papang kulnin lani alahwanayang Jisas Krais aposnitel atnik yulni. Wanaihki Sóstenes karak albu kalpaktik,

²adika wauhnitaya ultayang Papang sutsni Kurint tawanni nuhni kau bangyakat, Jisas Krais munah Papang dini kakalna kidika dawak bik diyulna kidika witing tawanni muihni balna kalna atninna, pa balna bitik yakat mayang Madakiwan Jisas Krais ayangni yuyulwa balna kidika karak kalpakwi, mayang dawak witingna bik Daninawan.

³Mayang Mapapangki Dawan Jisas Krais karak yaklau manna mamatna yakat witingna minikun talnin lani dawak kulnin aslah lani duduwa kidika bik manasisihwarang.

⁴Yang laih Papang yakat ban tingkih kalatayang manna yulmana, witing minikun talnin lani manna mamatna yakat sihna kidika yulni Jisas Krais munah.

⁵Jisas Krais munah Papang yaklau spirit ritsni balna kidika manana, yul balna kau bik dawak sins lani balna yakat bik,

⁶kat Krais yulni kidika laih manna pasmangna yakat barangni watna kidika yulni.

⁷Aput laih manna Papang prisantni kidika as bik dis awas mana dawak manna laih Madakiwan Jisas Krais kaiwakat talna atnamna tahatamana.

⁸Papang yaklau witni kat barangni manaduwa karang, mayang Madakiwan Jisas Krais kaiwarang mani muih as bik manabilwas atnin yulni.

⁹Papang laih witing pranimis balna kidika ban kaput yamwi, dawak witing yaklau manayulwakat aiwanamana witing Walanibis Madakiwan Jisas Krais karak aslah yalahna atnamna yulni.

¹⁰Wirah balna, mayang Madakiwan Jisas Krais ayangni usnit yakat kalmana dinit buktayang manna bitik kulnamna aslah dutanauh dawak pasmangna yakat sahwi kalahnin lani dis atnin. Aslah yalahtanauh, kulnin lani kapapat duta.

¹¹Wirahki balna, adika yultayang, kat amanglanayang Cloé sulani balna munah manna pasyakat sahwi kalahnin lani sakkidika.

¹²Yulnik dukih yawi, manna kaupak buas aput yuyulwi: “Yang laih Pal diniyang”; ūk balna laih: “Yang laih Apolos diniyang”; ūk balna laih: “Yang laih Pita diniyang”; dawak ūk balna laih: “Yang laih Krais diniyang.”

¹³¿Ais Krais laih sahwi kalahna katpah? ¿Ais Pal laih manna yulmana pan prihni yakat ilwi pana katpah? ¿Kidik awaskat ais manna laih Pal ayangni kau was manautuhwi yakna katpah?

¹⁴¡Papang yakat tingkih yultayang manna yakat as bik was manautuhtik yaktasyang dai kidika yulni, Crispo dawak Gayo kidika balna yakat laih yultasyang!

¹⁵Kaput laih muih as bik yulwas karangki yang ayangki kau was utuhwi yakna.

¹⁶Estéfanas sulani balna yakat bik was utuhtik yaknayang, kaunah muih ūk was utuhtik yaknayangpa isingkattasyang,

¹⁷bahang Krais laih muih was utuhwi yaknin yasihwas ki, kaunah yul wisam yamni kidika yulnin yasihna, dawak sins lani yulni balna karak bik awas, kaput yultik Krais pan prihni yakat dauna kidika dauh yamnik awas yulni.

¹⁸Krais pan prihni yakat dauna yulni kidika laih yul dauh as ki disnin tani yakat uiwa muihni balna niningna yakat laih; kaunah adika yulni laih Papang parasni ki laihwi yaknin niningyakat mawamayang kidika laih.

¹⁹Ulna yakat yulwa kaput: “Yang lawik yamting sins duyangmuihni balna kidikasinsnina diswarang dawak sinsnina sirihnimuihni balna kidikabik diswarang.”

²⁰¿Ais kat uiwi wawatnayah sins duyang muihni, maestro, dawak adika sauni dini balna yulni yulbauwi sip muihni kidika? ¡Papang yaklau dauh yamna adika sauni sinsni lani balna kidika!

²¹Papang yaklau witing sinsni lani yakat yamna, sau muihni balna kidika muih sinsni munah duwi witing yakat amangnilawas atninna; kaput kaunah yamni talna witing yulni munah laihwi yakna atnin witing yakat yamni kaltatalwa muihni balna kidika, adika yulni laih di as dauh kapat karangbik.

²²Ju muihni balna laih di taldas sainni balna talnin dukih diawi, dawak grik muihni balna laih sins lani wawalwi;

²³kaunah mayang laih Mesías pan prihni yakat ilwi papana yulni kidika sumaldi. Adika yulni laih Ju muihni balna kidika dutni kaldakakawi, dawak Ju muihni balna awas kidika laih di as dauh kukulwi;

²⁴kaunah Papang yaklau diyulwak aina muihni balna kidika niningna yakat laih, Ju muihni balna kidik awaskat grik muihni balna karangpa, adika Mesías laih Papang parasni dawak bik witing sinsni.

²⁵Bahang Papang niningyakat di as dauh kapat kidika laih, kidika laih baisa sins duwi muih sinsni bitik karak dawakat; dawak Papang niningyakat parasni dis kapat kidika laih, kidika laih baisa parasni ki muih parasni bitik karak dawakat.

²⁶Wirahki balna, manna amanglanamna ki Papang yaklau manayulwakat aiwanamana kidika muih balna yaklau sins dibindauh dutamana atwa karang bik, dawak manna kaupak bulah mana kidika parasmana dutamana kidik awasbik sulani nuhni dikulna balna kidika pasyakat mana.

²⁷Dawak sins duyang balna yakat asalnina yakna atnin yulni, Papang yaklau sau muihni mutu balna kidika walwi yakna ki; dawak pararasni balna yakat asalnina yakna atnin yulni, sau muihni parasnina dis balna yakat walwi yakna ki.

²⁸Papang yaklau adika sauni muihni balna miniknakunni dauh dikukulna balna kidika walwi duna, yuldarang kat, di dis muihni balna kidika, kaput laih nuhni kaldakakawa muihni balna yakat dauh diyamna atninna yulni.

²⁹Kaput laih muih as bik nuhni kaldakawas karang Papang muhni yakat.

³⁰Kaunah Papang yaklau witing palni manna kidika Jisas Krais karak manalibitna, dawak bik Krais kidika mayang masinski yamna dawak Krais munah mayang madutki balna dawakat disna atnin, Papang dini maiyakna atnin dawak bik mailaihwi yakna atnin yamna.

³¹Aput laih, Ulna yakat yulwa kaput: “Angdika muihni witing manah kapat kaldakanin dukih kalawa kat, Dawan kaupak nuhni kaldakawang.”