Read Mayangna 1 Kurint 10 Bible Online

1 Kurint 10 - Mayangna bible

1 Kurint 10

¹Wirahki balna, yang dukih yawas ki, manna damatna kahna atnamna mayang mamuihkibararak balna mukus dinityakat bangdai kidika, dawak witingna bitik Kuma Pauni yakat dakyaklalana dai kidika.

²Kaput dawak, witingna bitik Moses karak aslah kalududuhna dai kidika mukus yakat dawak kuma yakat bik was diutuhwi yakna atnin yulni.

³Sihm kaput bik, witingna bitik spirit niningyakat kasnin dini kidika kakasna dai

⁴dawak spirit niningkauh dinin dini kidika bik didina dai. Kat spirit kinipala wasni didiwadai bahang witingna uiwa yakat miniknadawadai kidika, kidika laih Krais dai.

⁵Kaput kaunah, witingna mahni kauh kidika laih Papang yamni talwa dini kidika yayamwasdai, dawak kidika yulni witingna muihnina nuhni balna kidika kauhmak wanilang yakat wawatna dai.

⁶Adika dini balna bitik kalahna dai mayang talna atnin yulni, di dudutni kidika dukih mayawas atnin yulni, sihm witingna dukih diana dai kapat.

⁷Kidika bahang, manna dawan dauh balna yakat ayangnina nuhni yayamwinih, sihm witingna kaupak buas yayamnadai kaput, Ulna yakat aput yulwi: “Muih balna kidika laih yalahwi di kakasna dai dawak didina dai, dawak usnit kat yaklauwi alasna dudunadai.”

⁸Mayang la munah kalduduwas lani kidika yamdas kawang, witingna kaupak buas yayamnadai kaput, kidika yulni ma aslah yakat muih 23,000 dadauna dai kidika.

⁹Krais yakat bik traini taldas kawang, sihm witingna kaupak buas yayamnadai kaput, kidika yulni bil dikakaswakat dadauna dai kidika.

¹⁰Dawak Papang niningyakat bik sararahwinih, sihm witingna kaupak buas sararahna dai kapat, kidika yulni insal muih iyang yaklau imukna dai kidika.

¹¹Adika dini balna bitik mayang mamuihkibararak balna yakat dikalahna dai mayang talna atnin yulni, dawak Ulna balna yakat ulwi dana maisingkatna as yulni adika mani witni balna akat yalahda muihni mayang kidika madiki.

¹²Kaput bahang, barangni atnin kulwa muihni kidika laih, amung talwang bukwas atnin.

¹³Manna muih wauhwi sipawas kidika kapat as bik wauhta bayaktasmana. Dawak manna laih Papang yakat yamni kaltalnamna sipmana, manadawakat wauhnin dadasni kidika wauhtas atnamna yulni. Wirlawakat, wauhnin mani kidika kiwi kawarang mani, Papang yaklau amput kalahnin tani kidika manawarang, kaput laih sip wauhna atnamna.

¹⁴Kidika bahang, wirahki dalani balna, dawan dauh balna kaupak iranauh.

¹⁵Muih di amanglalawa muihni balna kapat yakat manayultayang: manna alas lamana yamtanauh manayultayang dini kidika.

¹⁶Sutak kaupak dida mani kat Papang yakat tingkih kaladi, Krais āni karak aslah kaldi; plawar busna bahna kaupak kasda mani kat, Krais muihni yakat aslah kaldi.

¹⁷Mayang laih mahni mayang kaunah, plawar busna aslah kaupak kasdi, dawak kidika bahang muihninuh aslah mayang.

¹⁸Israel tawanni yakat yamni talnauh: di dauh balna sakripais yamna yakat kakaswa balna kidika laih, sakripais busnin pāni yakat wark yayamwi.

¹⁹Yang lawik dawan dauh kidika laih nuhni kalkulna ki laih yultasyang, dawak di muihni dawan dauh yakat sakripais yamna kidika bik di muihni ūk karak satuk ki bik yultasyang.

²⁰Yang yultayang kidika laih Papang yakat kukulwas muihni balna sakripais yayamwa mani kat, walasa balna yakat sakripais yamwi diayawi, dawak Papang yakat laih yamwi diayawas ki, dawak yang dukih yawas ki manna kidika walasa balna karak di as duta atnamna.

²¹Manna sip awasmana Dawan sunitak karak di dita dawak walasa balna suninatak karak bik di dina atnamna.

²²¿Kidik awaskat ais Dawan yakat minit annin dukih mayawih? ¿Ais witing karak mayang kauh pararasnimayang?

²³Aput yulwi: “Muih as kidika laih pri ki ais yamnin dukih kalawa kidika.” Rahm ki, kaunah bitik laih yamni awas ki. Agha, muih as kidika pri ki ais yamnin dukih kalawa kidika, kaunah kidika balna bitik kidika spirit niningyakat ilp kalawakat barakwas ki.

²⁴Mayang alas yamni atnin kidika walnin awas ki, kaunah muih ūk balna kidika bik yamni atnin kidika walnin ki.

²⁵Manna di muihni bakakanwa pāni yakat di muihni bakakanwa kidika bitik kastanauh, kulnin dutni lani as karak bik yulta dakas;

²⁶kat sau bitik yakat di balna bang kidika laih, Dawan dini bahang.

²⁷Kulwas muihni as yaklau yawa di kasnamna manayulwarang kat, dawak manna laih yawanamna dukih manawarang kat, ais mananawarang kidika kastanauh, kulnin dutni lani as karak bik yulta dakas.

²⁸Waralaih yamni, muih as yaklau aput manayulwarang kat: “Adika di muihni laih sakripais yamna”, bahang kidika laih kakaswinih, yulna muihni kidika amanglana atnin yulni dawak kulnin dutni lani yulni.[4]

²⁹Muih ūk kulnin lani kidika yakat yultayang, kaunah manna kulnamna lani yakat laih yultasyang. Kauna muih as aput yulwi dakanin sip ki: “¿Ais yulni yang pri lani dutayang kidika muih ūk kulnin lani karak laki yamwarangyah?

³⁰Dawak yang di kastayang kidika yulni Papang yakat tingkih kalatayang kat, ¿ais yulni kastayang kidika yulni yang nikingkauh yuyulwarangyah?”

³¹Kidika bahang di kastamana kat sihm kapat ki di ditamana kidika, di ūk yamtamana kidika bik, kidika balna bitik kidika Papang alasnina yaksihni kidika dini yamtanauh.

³²Muih as yakat bik di dutni yamwi niningkakawinih; Ju muihni balna, Ju muihni balna awas yakat, dawak Papang sutsni muihni balna kidika yakat bik awas.

³³Yang nikingkauh laih, muih balna bitik kau di balna bitik yayamna kidika yulni tingkih lani dianik kultayang, yang alas yamni atnik kidika waltas kaunah muih ūk balna kidika bik yamni atnin yulni, dawak laihwi yaknin lani kidika bik duna atninna yulni.