Read Mayangna 1 Kurint 12 Bible Online

1 Kurint 12 - Mayangna bible

1 Kurint 12

¹Wirahki balna, yang dukih yawi manna amanglana atnamna spirit prisantni balna kidika.

²Manna amanglatamana manna kidika baisa kulyang muihni awas manadai mani yakat datanang dawan dauh yulbabauwas balna yaklau manamumurwadai.

³Kaput bahang, waralaih dukih yawi manna amanglatanauh muih as bik aput yulnin sipawas ki: “¡Jisas laih dutni palni karang!”, witing rahm Papang Spiritni parasni karak duwi yulwa laih. Dawak muih as bik aput yulnin sipawas ki: “¡Jisas laih Dawan!”, witing Spirit Holi parasni karak duwi yulwas laih.

⁴Suts yakat laih Papang prisantni sat sat bangki, kaunah diawa muihni kidika laih Spirit as ki.

⁵Di yamnin kidika sat sat bangki, kaunah kidika balna bitik kidika Dawan as tingni yakat bangki.

⁶Dawak parasni balna kidika sat sat kalahwi, kaunah kidika laih Papang as yaklau witing parasni karak di bitik yamwi di balna bitik yakat.

⁷Papang yaklau muih balna bitik yakat yakwi niningnakawi Spirit muhni kidika, di balna bitik yakat yamni atninna.

⁸Spirit munah, muih buas balna yakat diawi sins lani karuk yulbauna atninna; dawak ūk balna yakat laih, sihm Spiritni kidika kau, diawi kulnin lani tuhni karak yulbauna atninna.

⁹Muih buas balna yakat laih rahm kulnin lani kidika Spirit munah duduwi, dawak ūk balna yakat laih Papang prisantni kidika duduwi siknis muihni balna yakat yamni diyamna atninna.

¹⁰Muih buas balna yakat laih parasnina duduwi di taldas dini balna yamna atninna, dawak ūk balna yakat laih Papang prisantni duduwi prapit atninna. Muih buas balna yakat laih Papang yaklau parasni diawi spirit dauh balna kidika dawak rahm Spirit kidika amanglana atninna, dawak ūk balna yakat laih muih tuni satni balna yulnin kidika parasni diawi; dawak ūk balna yakat laih kidika muih tuni satni balna karak yulna kidika lāih yakwi yulnin parasni diawi.

¹¹Kaunah adika dini balna bitik laih Spirit witing alas parasni karak yamwi, witing yaklau angdika muihni yamni talwa kidika yakat kalawi.

¹²Muih muihni nuhni kidika, sahyakna bikisni balna mahni kaunah, muihni nuhni laih aslah ki. Krais bik sihm kapat ki.

¹³Dawak sihm kaput bik, mayang bitik kau, Ju muihni dawak Ju muihni awas karang, warau muihni balna kidik awaskat pri muihni balna, was maisiwi yakna muihni nuhni aslah atnin, Spirit aslah munah; dawak mayang bitik kau sihm kidika Spiritni mayawakat dinamayang.

¹⁴Muih muihni nuhni as kidika laih muihni sahyakna aslah laih awaski, kaunah mahni palni ki.

¹⁵Kal kidika aput yulwa kat laih: “Yang laih ting awas yang bahang, muihni nuhni kaupak awasyang”, kidika yulni muihni nuhni kaupak awas laih awaski.

¹⁶Dawak tapa kidika aput yulwa kat laih: “Yang laih makpa awas yang bahang, muihni nuhni kaupak awas yang”, kidika yulni muihni nuhni kaupak awas laih awaski.

¹⁷Muih muihni nuhni bitik kidika makpa kat laih, sip di dakadas mawarang. Dawak muih muihni nuhni bitik kidika tapa kat laih, sip di kidika umdi dakadas mawarang.

¹⁸Kaunah Papang yaklau muih muihni sahyakna balna kidika pāni kat kat āna witing amput yamni talna kidika kaput.

¹⁹Muih muihni nuhni kidika muihni sahyakna aslah kat laih, muihni nuhni dis karang.

²⁰Rahm laih muih muihni nuhni kidika sahyakna mahni kaunah, muihni nuhni kidika laih aslah ki.

²¹Makpa kidika laih ting yakat aput kalyulnin sipawas ki: “Yang manna kidika manadukih yawas ki”; tun kidika kat bik kal balna yakat aput diyulnin sipawas ki: “Yang manna kidika manadukih yawas ki.”

²²Wirlawakat, muih muihni nuhni sahyakna balna parasnina dis kapat balna kidika laih, kidika balna kauh baisa dunin dini balna ki;

²³dawak mamuihki nuhni sahyakna balna dalani kaladas balna kidika laih, kidika balna ki baisa yamni maintalda kidika. Dawak mamuihki nuhni sahyakna balna yamni kuldas balna kidika laih, kidika balna kauh baisa yaksihni ditaldi,

²⁴mamuihki nuhni sahyakna balna yayamni yakat laih kaput yamnin dini awaski. Papang yaklau mamuihki nuhni kidika barangni āna, mamuihki nuhni sahyakna balna dalani taldas balna kidika kauh baisa nuhni kulna atnin,

²⁵kaput laih mamuihki nuhni yakat sahwi kalahna dis atnin, kaunah mamuihki nuhni sahyakna balna kidika ūk balna yulnina kulwi kalbauna atninna.

²⁶Mamuihki nuhni sahyakna as kidika dalani wauhwarang kat, ūk balna kidika bik wawauhwi; dawak mamuihki nuhni sahyakna as kidika yakat yamni kalyamdakat, ūk balna kidika bik alasna duduwi.

²⁷Bahang yamni, manna laih Krais muihni nuhni mana, dawak manna bitik laih kidika muihni nuhni sahyakna as mana.

²⁸Papang laih dukih kalawi tatuna kidika, suts yakat apostel balna kidika bang atnin; dawak usnit kidika laih, prapit balna; bās kidika laih, maestro balna; usnit yakat laih di taldas yayamwa muihni balna kidika, dawak ūk balna kidika laih siknis muihni balna yakat yamni diyayamwa kidika, kidik awas bik ilp diayawa muihni balna, tunan duduwa balna, kidik awaskat muih tuni satni balna yuyulwa kidika.

²⁹Bitik laih apostel balna awaski, dawak bitik bik prapit balna awaski. Bitik laih maestro balna awaski, dawak bitik bik laih di taldas dini yayamwas ki,

³⁰dawak bitik bik laih parasnina diski siknis muihni balna yakat yamni diyamna atninna. Bitik bik laih muih tuni satni mahni yuyulwas ki, dawak bitik bik laih di balna lāih yakwi yuyulwas ki.

³¹Manna laih traitala Papang prisantni yayamni balna kidika dunamna ki. Yang lawik ta as yamni kidika namangnakaki ki.