Read Mayangna 1 Kurint 13 Bible Online

1 Kurint 13 - Mayangna bible

1 Kurint 13

¹Muih balna yulnina dawak insal balna yulnina yulta awaki bik, kaunah dalani lani disyang laih, sihm ayan as kidik awaskat wisnin plitni parasni yulwa kapat as yang.

²Dawak Papang prisantni duta awaki prapit atnik, dawak Papang di malni yakat duwa kidika bik amanglata awaki, di balna bitik amanglata awaki, rahm kulnin lani duta awaki asang balna kidika panina kaupak pa ūk yakat duyawana atnik, kaunah dalani lani disyang laih, di bik awasyang.

³Dawak muih miniknakunni balna yakat di dutayang bitik wayahtik diaki, dawak muihki nuhni kidika kalbuski karang[5] bik, kaunah dalani lani disyang laih, yang yakat ilp yawas ki.

⁴Dalani lani dunin kidika laih sip wauhwi sip atnin ki; dalani talnin lani dunin ki; tumnin lani dis atnin ki, alas ayangni dulaunin lani kidika dis atnin ki, witing manah kapat kaldakanin lani dis atnin ki,

⁵di minitbayak yamwas atnin, witing manah kapat kaldakanin; kidika laih makulnik daukalwas atnin, dawak muih yakat dutni kulwas atnin;

⁶la kat awas kidika yulni alasna dunin awas, kaunah rahm kidika yulni alasna dunin ki.

⁷Dalani lani dunin kidika laih di balna bitik yakat wauhnin ki, rahm kulnin ki, tahanin ki, dawak di balna bitik sip wauhnin ki.

⁸Dalani lani kidika laih sip diswas karang ki. Ma as kat Papang prisantni prapit kalnin lani kidika laih diswarang ki, dawak muih tuni satni mahni kau yulwas karang ki, dawak amanglanin lani balna kidika bik dunin dini balna awas kalwarang ki.

⁹Kat amanglanin balna kidika dawak prapit lani balna kidika laih di barangni awaski,

¹⁰kidika laih dahnkalwarang ki barangni muihni kidika kaiwarang mani kat.

¹¹Yang muihbin yang dai mani, yulbautayang dai, kultik talayang dai dawak kultik talik yultayang dai muihbin yang kapat; kaunah muih al kalnayang mani kat, muihbin lani kidika laih dangkit yakat danayang.

¹²Waralaih pukni taldi, sihm wayatal as kau kapat; kaunah ma as kat bitik taldarang ampat kat kapat. Yang di balna amanglatayang kidika waralaih yayamni awaski, kaunah ma as kat Papang kidika amanglanayang karang sihm witing yaklau nining amangkilawa kapat.

¹³Di bās kidika laih ban ki: rahm kulnin lani kidika, tahanin lani dawak dalani lani kidika kauna; kaunah bās kidika kaupak baisa nuhni kalkulna kidika laih dalani lani kidika ki.