Read Mayangna 1 Kurint 16 Bible Online

1 Kurint 16 - Mayangna bible

1 Kurint 16

¹Rahm kulnin lani niningyakat wanaih balna dinina di yulwi uduhnin kidika niningkauh laih, Galacia sauni sahyakna sutsni balna yakat disumalnayang kaput yamtanauh.

²Sandi balna kidika yakat, manna muihmana kat kat di as yaknamna ki, di ampus dunamana kidika kaput, dawak apaknamna ki yang yawaki mani kat di yulta uduhtas atnamna yulni.

³Dawak yang yawaki mani, manna lawa muih walyaktanama kidika Jerusalén yakat sihki ki, wauhtaya ultik diatik dawak di yulta uduhnamana kidika bik mawanaihki balna yakat sihting kat duwi uiwarang ki.

⁴Dawak yang bik yawinik sip karang kat, witingna laih yang karak uiwarang ki.

⁵Yang yawaki kidika Macedonia sauni munah bayaknik karang ki; dawak Macedonia kaupak laih Corinto yakat yawik āwinik karang ki.

⁶Sip karang ki manna karak ma buas watna atnik, kidik awasbik sip karang ki wasma mani kidika bitik manna karak bayakna atnik; bahang sip karang kidika usnit kat angkat yawinik karang kat manna lawa ilp yana atnamna.

⁷Yang sirihni bayaktik yawinik kidika dukih yawas ki, kaunah yang dukih yawi wattik manna karak ma buas atnik, Dawan yaklau kaput dawarang kat;

⁸kaunah Éfeso sauni yakat watki ki Pentecos mani kat,

⁹kat Dawan warkni yakat wark nuhni yamnik dutayang dawak kidika kaupak di yayamni yakna atnik ki, yang nikingkauh muih mahni yaklalauwa karang bik.

¹⁰Timoti kiwarang kat, manna pasmangna yakat yamni kalyamtanang kat yamni kaldakawarang, kat witing laih Dawan warkni yamwi sihm yang yamtayang kapat.

¹¹Kaput bahang manna kaupak muih as bik dutni kalyamnin awas ki; nawatkauh, ilp kalatanang kat tanityakat kiwarang kulnin aslah lani karak, dawak yang yakat kiwi yatalwarang, kat yang laih wanaih ūk balna karak aslah tahatabangyangna.

¹²Wanaih Apolos niningkauh laih, kalni dinit buknayang dai wanaih balna karak kalpakwi manna yakat uiwi manatalna atnin, kaunah waralaih kiunin yulwas ki. Kiwarang ki sans duwarang mani kat.

¹³Manna sahmuhni awanauh dawak bik barangni awanauh rahm kulnin lani yakat. Kulnamna dadasni dutanauh dawak barangni awanauh.

¹⁴Dawak ais yamtanama kidika, dalani lani karuk yamtanauh.

¹⁵Wirahki balna, manna amanglatamanah Estéfanas sulani balna kidika tatuna Acaya sutsni yul wisam yamni yakat wiryaklalana kidika, dawak witingna yaklau rahm kulnin lani niningkauh wirah balna yakat dinina yayamna kidika.

¹⁶Yang dukih yawi manna bik kidika muihni balna dawak adika warkni yayamwa balna tingnina dinityakat āwana atnamna.

¹⁷Yang alasnayang Estéfanas, Fortunato dawak Acaico kidika balna aina kidika yulni, bahang manna muhmana yakat

¹⁸witing yaklau yang spiritki kidika dulalauna, dawak manna yakat bik sihm kapat. Muih balna witingna kapapat kidika dikulta dakanauh.

¹⁹Asia sauni sahyakna sutsni muihni balna manna yakat parasnin lani manasisihna. Aquila dawak Prisca, dawak sutsni muihni balna kidika bik manna yakat parasnin lani manasisihwi Dawan ayangni usnit yakat.

²⁰Wanaih balna parasnin lani mananawa kidika dutanauh. Biri biri kalparasta kalumtanauh.

²¹Yang, Pal lawik manna yakat adika parasnin lani tingki kau ultik manasihtayang.

²²Muih as Dawan Jisas Krais yakat dalani talwas laih, la kaltuhnin karang ki. ¡Yangna Dakinawan, aiwah![8]

²³Dawan Jisas yaklau manna mamatna yakat minikun talnin lani kidika manawang.

²⁴Yang dalani lani dutayang kidika laih manna yakat ban kaput atnin dutayang Jisas Krais ayangni usnit yakat.