Read Mayangna 1 Kurint 7 Bible Online

1 Kurint 7 - Mayangna bible

1 Kurint 7

¹Waralaih manna wauhmanataya ulnamana yakat yayulta dakanamana yulni balna kidika biritik nangmatnalaki ki. Baisa yamni karang ki marid kalahwas atnin;

²kaunah, la munah kalduwas atnin kidika yulni, muih balna bitik kidika witingna silp yalnina duduwa atninna ki, dawak yayal balna bitik kidika bik witingna silp alnina duduwa atninna ki.

³Dawak marid al dawak marid yal kidika bik witingna albupak marid ais yamnin dini balna kidika kat yamninna karang ki.

⁴Marid yal witing muihni nuhni kidika laih witing dini awas ki, kat kidika laih witing alni dini bahang, dawak marid al kidika bik witing muihni nuhni kidika witing dini awas ki, kat kidika laih witing yalni dini bahang.

⁵Kaput bahang, biri biri kaltalas kapat atwinih, baisa yamni karang ki yulbauta tala ma balna buas kaldakta alahwa mamatna yulna atnamna. Usnit kat watta kalpaknamana karang; sip minit bayaktas datanangkat sitan yaklau manayamwakat dutni yamnamna awas yulni.

⁶Adika balna bitik laih makulnik yakat amanglana atnin dini manah yultayang sihm la balna kidika kapat.

⁷Manna bitik yang muihki kapat atnamna kidika dukih yawi; kaunah Papang yaklau muih bitik yakat witing prisantni kidika sat sat diana, buas balna kidika yakat sat as dawak ūk balna yakat sat ūk.

⁸Baisa yayal dis balna yakat dawak tingmak yayal balna yakat bik manayultayang baisa yamni ki marid kalahwas atnin, sihm yang kapat.

⁹Kaunah manna muihmana nuhni dukih manawa kidika sip laihwattas mana kat, marid alahwanauh, baisa yamni ki marid kalahnin dawak dukih mayawakat kalbusyamnin kidika karak dawakat.

¹⁰Kaunah uman marid kalalahna balna yakat laih, adika lani manatayang, yang laki awas ki, kaunah Dawan lani: marid yal kidika laih alni kaupak kaldakwi kalahnin awas ki.

¹¹Waralaih yamni, marid yal kidika yaklau alni kaupak kaldakwi kalahwarang kat, sip marid kalahwas karang ki kidik awaskat watwi alni karak yamni kalahnin karang ki. Sihm kaput bik, marid al kidika yaklau bik yalni yakat kaldanin wauhnitaya yamwi kalawi dawas atnin ki.

¹²Muih ūk balna kidika niningnakauh laih, diyultayang, yang yulki kau dawak Dawan yulni laih awas ki, mawanaihki al as yalni kidika kulyang muihni awas kat kaunah alni karak ban yalahnin kulwa kat, mawanaihki al kidika yaklau kaldanin wauhnitaya kalawi kidika yal yakat danin awas ki.

¹³Dawak yal kulyang muihni as muih al kulwas muihni as karak marid kalahna laih, kaunah al kidika yal yakarak ban yalahnin kulwa laih, witing kaldanin wauhnitaya kalawi kidika al karak kaldanin awas ki.

¹⁴Bahang marid al kidika laih Papang dini kalwi, kat kulyang yalni as kat duna kidika yulni; dawak yal kulwas muihni kidika laih Papang dini kalwi, kat kulyang alni as kat duna kidika yulni. Kaput awas karang kat, manna walamanabis balna kidika laih maisihni karuk karang ki; kaunah, kaput yamtanama kat, walamanabis balna kidika laih Papang tawanni muihni balna kakalwi.

¹⁵Waralaih yamni, marid al kidika kidik awaskat marid yal kulwas muihni balna kidika laih bik biri biri kaldadang atwarang kat, kaldadawang. Adika niningkauh laih, wanaih al kidik awaskat wanaih yal kidika balna laih pri kakalwi, kat Papang yaklau manna yakat manayulwakat aiwanamana kulnin aslah lani karak yalahna atnamna.

¹⁶Bahang ¿amput amanglatamahn man marid yal, maridma al yakat laihta yakma kidika? ¿Kidik awaskat amput amanglatamahn man marid al, maridma yal yakat laihta yakma kidika?

¹⁷Ampat karangpa bik, muih bitik kidika Papang yaklau angdika prisantni balna diana kat kaput yalahninna ki, dawak muhnilau kau ampat kat Papang yaklau diyulwakat uinadai kat kapat. Adika lani kuduh suts balna bitik yakat diatayang kidika.

¹⁸Papang yaklau muih as Papang sainni duwa kat kalyulwakat kiwarang kat, Papang sainni duwa kidika laih malnin awas ki; dawak baisa Papang sainni dis muihni as kalyulwakat kiwarang kat, Papang sainni duwas atnin ki.

¹⁹Kat nuhni kulna kidika laih Papang sainni duna kidik awaskat duwaspa kidik awas ki, kaunah Papang lani balna kidika kat dakawi yamna atnin kidika ki.

²⁰Muih bitik kidika muhnilau kau ampat yalalahwa kat Papang yaklau diyulwakat uinadai kat sihm kapat watna atninna ki.

²¹Mayulwakat yawanaman mani man kidika warauman dai kat, kulwi kalbauwinih; ais ampat man pri alahwanam tani dutaman karang bik, man ilp as yaknam karangki.[1]

²²Bahang Dawan yakat rahm kulna atnin kalyulwakat kiuna mani warau dai kidika laih, waralaih muih al as pri ki Dawan warkni pasyakat; dawak sihm kaput bik, kalyulwakat kiuna mani pri muihni dai kidika laih, waralaih Krais warauni kalna.

²³Papang yaklau manna kidika manabakanwi yakna; datanangkat muih ūk balna yaklau warau manayayamwaskawang.

²⁴Kaput bahang, wirahki balna, muih bitik muhnilaukau ampat yalalahwakat diyulwakat uina dai kat, sihm kapat kawang Papang muhni yakat.

²⁵Marid kalahwas atnin kidika niningkauh laih, Dawan kaupak la as bik disyang; kaunah kulnik lani manatayang, Dawan dalani lani duwa kidika kau barangni muihniyang kidika kaupak.

²⁶Yang laih yamni talayang muih as ampat kat kapat watna atnin, ma balna dudutni yakat yalahda kidika yulni.

²⁷Man yal dutaman kat, ruhmwi dawinih; dawak disman laih, walwinih.

²⁸Marid alahwaman kat, dutni yamtasman; dawak muih yal al dis as marid kalahwarang kat, kidika bik sihm dutni yamwas ki. Kaunah marid kalalahwa muihni balna kidika laih bayakwi kiunin dini balna tranibil kidika wawauhwarang ki, yang kat bik amanglatasyang amput namatnadakna atnik kidika.

²⁹Wirahki balna, yulnik dukih yawa kidika laih adika ki: Ma parahni maiwatwi. Kaput bahang, marid kalalahna muihni balna kidika laih sihm yal dis kapat yalahninna ki;

³⁰kulninna bukna muihni balna kidika laih alasna duduwa kapat atninna ki, dawak alasna duduwa muihni balna kidika laih sihm kulninna bukna kapat atninna ki; bakakanwa muihni balna kidika laih sihm di dis kapat yalahninna ki;

³¹dawak adika sauni kaupak di balna duduwa muihni balna kidika laih sihm kidika kaupak di as bik yayakwas kapat yalahninna ki, kat adika sauni talda adika laih witwarang bahang.

³²Yang dukih yawi manna kulta kalbautamana kidika kaupak manalaihtik yakna atnik. Yal dis muihni kidika laih Dawan dini balna kidika yulni kulwi kalbauwi, Dawan yamni kaltalnin yulni;

³³kauna marid kalahna muihni kidika laih sau dini balna kidika yulni kulwi kalbauwi, maridni yaklau yamni kaltalnin yulni,

³⁴dawak kaput sahwi kalahna ki. Sihm kapat, yal as maridni kalahwas kidika dawak yal al marid kalahwas dana bik, witingna laih Dawan dini balna kidika yulni kulwi kalbabauwi, kat witing laih Papang dini kakalna[2] bahang muihnina nuhni dawak spiritnina nining yakat bik; kaunah yal as marid duwa kidika laih sau dini balna kidika yulni kulwi kalbauwi maridni al kidika yamni talna atnin yulni.

³⁵Adika manayultayang, kulnamna dutni ānik yulni laih awas, kaunah manna yamni atnamna yulni kidika dawak bik Dawan dini yamta barangni yalahna atnamna, kidika yakat manah laihta.

³⁶Muih as witing pramis kalahna muihni kidika karak marid kalahnin kulwa kat, marid kalahnin sip kidika yulni, dawak kidika dini kauh yamnin dini kapat kulwa kat, angdika kauh yamni talwakat yamwang; marid alahwah dutni awas ki.

³⁷Dawak muih ūk, di as bik kallaihwas, dawak witing amput atnin dukih kalawa kidika kaput yamwakat, witing isning yakat barangni duwi marid kalahwas atnin, kidika laih yamni yamwarang ki.

³⁸Kaput bahang, witing pramis kalahna muihni kidika karak marid kalahwarang kat, yamni yamwi; kaunah marid kalahwas laih, baisa yamni yamwi.[3]

³⁹Yal as marid kalahna kidika laih maridni al yakat libitni ki al kidika baisa sangka kat; kaunah maridni al kidika dauwa laih, witing laih pri watwi angdika alni karak marid kalahnin kidika, kulyang muihni as karang kat kamanah ki.

⁴⁰Yang kultayang baisa alasna karang ki watwi marid kalahwas karang kat. Adika ki yang kulnik lani, dawak yang bik Papang Spiritni kidika dutayang kaldakayang.