Read Mayangna 2 Kurint 2 Bible Online

2 Kurint 2 - Mayangna bible

2 Kurint 2

¹Kidika yulni yang wattik yawik manatalas danayang kulnamna bukwas atnin yulni.

²Kat yang lawik manayamtingkat kulnamna bukwa kat, ¿wais yaklau yayamwakat alasna awakiyah, manna awas kat, yang lawik kulnamna laknayang kidika?

³Kidika bahang amput yamnayang dai kat kaput wauhtaya manaulnayang, kat yang dukih yawas dai yawingkat manna lawa kulnik laknamna kidika, alasna yayamnamna pāni yakat. Yang barangni kulnayang dai yang alaskina kidika laih manna dimana yamtanama kidika,

⁴kaunah adika wauhnitaya manaulnayang mani kat, kultik kalbaunayang dai dawak bik kulnik bukwakat aidayang dai. Kaput bik, kulnamna laknik yulni manaultasyang dai, kaunah manna amanglana atnamna yang lawik manna yakat dalani manatalayang kidika.

⁵Muih as yaklau kulnin laknin lani yamna kat, yang yakat manah yayamwas ki, kaunah di as as yakat manna bitik yakat bik ki. “Di as as yakat bik ki” yultayang minitbayak yulnik awas yulni.

⁶Kidika muihni yakat manna bitik lawa wah kalanamana kidika laih kamanah aitani ki.

⁷Waradika yamnamna kidika laih dutni datanang disnin dawak ilp kalana atnamna, uba kulnin bukwa kat isning abahlnin awas yulni.

⁸Kidika bahang kalmana dinit buktik manayultayang dalani kaltalamana kidika watta niningkatanauh.

⁹Muhnilau kau adika yulni manaulnayang dai, manatalna atnik yulni rahm manasumalnayang balna kidika kat yamtanamapa.

¹⁰Kaput bahang angdika muihni yakat manna lawa dutni datanangkat diswarang kidika, yang lawik bik dutni dating diswi. Dawak dutni dating diswarang, dutni dawakat disnin dini duwadai kat, manna yakat manakultayang kidika yulni dawak bik Krais muhni yakat.

¹¹Kaput laih sitan kidika mayang kaupak di as yakwas karang, kat witing kulnin lani dutni balna kidika laih yamni amangladi.

¹²Troas tawanni nuhni yakat Krais yulni yamni kidika sumalna yawik āwanayang mani kat, dūr balna kidika apahna dai Dawan warkni balna kidika yamna atnik yulni.

¹³Kaunah kulnik kidika laih yamni awasdai, kat wirahki Tito kalpaktasyang dai kidika yulni. Kidika yulni witingna kaupak alahwik Macedonia yakat yawanayang dai.

¹⁴Papang yakat tingkih, witing yaklau Jisas Krais minit bayaknin niningyakat maiduwi kiwa kidika[1] dawak mayang munah witing yulni muih balna yakat diyulwa kidika, kidika yulni laih pa balna bitik yakat rawi kiwi sihm wayani yamni as kapat.

¹⁵Kat yangna laih busnin dini walapni kapat yangna Krais yaklau Papang yakat buswi kalawa kidika, dawak laihwi yakwa muihni balna pasyakat dawak didiswa muihni balna pasyakat bik rawi kiwa kidika kapat.

¹⁶Didiswa balna kidika niningna kauh laih, adika busnin walapni adika daunin wayani as kapat ki, kaunah dilaihwi yakwa balna kidika niningna kauh laih, walapni yamni as sangninaka diawi. ¿Dawak wais sipyah adika dini yakat?

¹⁷Yangna laih Papang yulni kidika lalah yulni yamtasyangna, muih mahni yayamwa kapat; nawatkauh, Papang muhni yakat alas lani dis yulbautayangna, witing yaklau yanasihna kapat dawak bik Krais karak aslah alahwanayangna kidika yulni.