Read Mayangna 2 Kurint 3 Bible Online

2 Kurint 3 - Mayangna bible

2 Kurint 3

¹Yangna adika yultayangna mani kat, ¿wattik yangna silp ayangkina nuhni yamtayangna kapat kultamanah? ¿Kidik awaskat manna muhmana yakat wauhtaya duyawiniknayah kidik awaskat manna yakauh wauhtaya manayulnikna karangyah, muih buas yayamwa kaput?

²Yangna wauhtaya dukih yanawa kidika laih manna muihmana kidika ki: maising yakat ulna kidika laih, muih bitik amanglalawi dawak bik yulwi talninna sipki.

³Dawak lāih taldi manna laih Krais yaklau manaulna kidika dawak bik yangna lawik witing tingni yakat ānayangna kidika; ulna as pinsil kau ulwas kidika, kaunah Papang sangka Spiritni kau ulna kidika; ulna as kipala labanni yakat ulwas kidika, kaunah muih isning yakat ulna kidika.

⁴Krais munah Papang yakat yamni talayangna kidika yulni, adika dini rahm kultayangna.

⁵Yangna silp sip alahwanayangna laih awaski yangna dikina kapat kulnikna; nawatkauh, ais yamnikna sipyangna kidika laih Papang kaupak kaiwi,

⁶bahang witing yaklau sip yanayamna pramis wisam as warkni yamnikna yulni, lā munah laih awaski, kaunah spirit warkni munah. Lā kidika laih daunin yakat wirlawi, kaunah Papang Spiritni kidika laih sangka atnin lani mayawi.

⁷Adika lāni, kipala lababanni yakat ulna dai kidika, yaringni karuk kauna dai dawak Israel muihni balna laih sip Moses muhni kat bik tatalwas dai uba yaringni nuhni duwadai kidika yulni. Kaput bik, kidika yaringni dahlwa dai kidika laih pibukwi witnindai. Kaunah kidika lāni daunin yakat wirlawa kidika alasna yaksihni karuk muih balna yakat diyuyulna dai kat,

⁸¡ampus yamni karangyah pramis wisam alasnina yaksihni yulni Spirit yaklau yamna kidika!

⁹Yuldarangkat, maiīnin lāni as alasna yaksihni nuhni karak muih balna yakat yulwi lāih yayakna dai kat, ¡ampus alasna yaksihni nuhni karangyah Papang yaklau madutki dawak diswa yulni maiyulwa kidika yulnin!

¹⁰Kat muhnilau kau alasna yaksihni dai kidika laih adika karak libitnin sipawas ki, alasna yaksihni nuhni adika karak.

¹¹Dawak pibukwi witnin dini dai kidika alasna yaksihni nuhni dai kat, ban kaput atnin dini kidika laih baisa alasna yaksihni nuhni karang ki.

¹²Adika tahanin lani duda kidika yulni, ais yulkih mayang kidika yuldi.

¹³Yangna laih Moses yamna kapat yamtas yangna, asna as kau muhni mukwadai kidika Israel muihni balna yaklau yaringni dahlwi piwa sakdai yakat talwas atninna yulni.

¹⁴Kaunah witingna laih kaput amanglalawas dai, dawak warmani kat bik, muhnilau kau pramis yamna wauhnitaya kidika yulwi tatalwa mani kat, sihm kidika asnina niningnakauh yaklauwakat amanglalawas ki, bahang kidika asnina baisa witingna kaupak yakwas ki, kat kidika laih Krais munah manah yakwi.

¹⁵Warmani kat bik, Moses wauhnitaya balna kidika yulwi tatalwa mani kat, witingna amanglaninna kidika laih asna as yaklau tanitna dakwi.

¹⁶Kaunah muih as Dawan yakat wiryaklawa mani kat, kidika asnina laih witing kaupak yakwi.

¹⁷Kat Dawan kidika kuduh Spirit; dawak angkat Dawan Spiritni sakkidika laih, kidika yakat pri lani sakki.

¹⁸Kidika bahang, mayang bitik, uman mamuhki yakat asna mukwadai kidika dis, sihm wayatal as Dawan alasnina yaksihni wayani kalahwa kapat mayang, dawak sihm kidika wayani kapat kaldi mawi, kat ma balna bitik yakat witing alasnina yaksihni kaupak duda kidika yulni, dawak kidika laih Dawan Spirit kidika warkni.