Read Mayangna 2 Kurint 5 Bible Online

2 Kurint 5 - Mayangna bible

2 Kurint 5

¹Yangna laih sihm sau yakat ū as yamna kapat yangna, sihm bayakwi kiunin ūni labanni as kapat; kaunah yangna amanglatayangna adika ūni labanni daukalwarang mani kat, Papang yaklau kisang yakat ban kaput atnin ūni as ridi yamwi dana yangna dikina, kidika laih sau muihni balna tingnina kau laihwi yayamwas ki.

²Kidika bahang wingkinata puhtayangna adika ūni akat baisa yalahtayangna kat, bahang uman prakkina āwnikna dukih yanawi kisang kau ūkina sakyakat;

³kaput bik, adika prakni yanadakyayakwarang bik, wahdis wattas awanaki ki.

⁴Adika ūni labanni akat baisa yalahtayangna kat kulnikna bukna karuk wingkinata puhtayangna, bahang wahdis yanayamninna kidika dukih yanawas ki, kaunah nawatkauh laih sangnika wisam kidika yaklau paraskina yananin dawak, daunin yakat taihna atnin.

⁵Dawak Papang yaklau adika dini akat yanasihna, bahang Spirit Holi dunikna dini kidika yanana.

⁶Kidika bahang yangna ban kulnin lani kidika dutayangna. Yangna amanglatayangna mayang aput ban mawarang kat, sihm pa naikau mawana kapat mawarang ki, Dawan kaupak naikau.

⁷Waralaih sip talasyangna, kaunah rahm kulnin lani yakat yalahdi;

⁸kaunah yangna yamni kultayangna, dawak yangna dukih yanawi muihkina nuhni adika dapamtik yawik Dawan karak yalahna atnikna.

⁹Kidika bahang yangna traitalayangna Dawan yakat ban kaput tingkih kalana atnikna, akat ban yalahtanaki karang kidik awaskat yawinikna karang bik.

¹⁰Kat muih bitik mayang kidika laih Krais lani muhni yakat malauwarang ki, kaput laih muih balna bitik witingna dinina kat kat duna atninna, di yamni kidik awaskat di dutni yamna dai kat witing sangka dai mani yakat.[2]

¹¹Kaput bahang, Dawan yakat rispik kalyamnin kidika amanglatinah, muih balna kulninna laihnikna traitalayangna. Papang laih yamni amangkinalawi, dawak manna bik sihm amangkinalana atnamna kidika kultayang.

¹²Yangna wattik yangna silp ayangkina nuhni yamnikna kultik laih yamtasyangna, kaunah yangna lawik manna yakat sans as manatayangna ismangnalak kaldakanamna yulni yangna kaupak, dawak manna lawa angdika muihni balna isningna yakat duduwa kidika kaupak awas muhnina manah yayamwa balna yakat nangnitnalana atnamna.

¹³Tunakina kidika dutni laih, Papang dini; dawak kaput awas yangna laih, manna dimana.

¹⁴Krais dalani lani duwa kidika laih yangna sangkinaka kidika yakat kabamint kawi, yangna amanglanayangna as dauna kidika laih muih bitik yulnina dauna dawak usnit kat bitik dadauna.

¹⁵Dawak Krais laih muih bitik yulnina dauna, muih balna sangka kidika laih witingna silp sangka atninna awas yulni, kaunah witing dini balna atnin, witing laih dauwi watwi yaklau witingna yulnina.

¹⁶Kaput bahang, yangna laih uman muih as bik yulni kultasyangna muih balna yul yuyulwa kidika kaput; dawak muhnilau yul balna kidika yakat dakik Krais yulni kultayangna dai karang bik, kaunah waralaih witing yulni kaput kultasyangna.

¹⁷Kaput bahang, angdika muihni Krais yakat aslah kalna kidika laih muih as wisamni ki. Di balna umamani kidika laih bayayakna; di as wisam kakalna.[3],

¹⁸Adika balna bitik laih Papang warkni balna, witing yaklau Krais munah aslah yanayamna dawak kalpakwi yamni atnin lani yulni sumalnikna kidika tingkina yakat āna.

¹⁹Yuldarang kat, Krais yakat, Papang laih witing alas yamni kalahna dai sau yakat, muih balna dutnina kidika laih kulwas; dawak yangna yakat yanayulna adika yulni muih balna yakat diyulnikna.

²⁰Kaput bahang yangna laih Krais pāni yakat yakwi yanasihna muihni balna yangna, kidika laih sihm Papang yaklau manna yakat kalmana dinit bukwa kapat ki yangna munah. Kaput bahang, Krais ayangni usnit yakat kalmana dinit buktayangna Papang karak aslah yamni kalahnin kidika dutanauh.

²¹Krais laih dutni as bik yamwas dai; kaunah mayang mayulki, Papang yaklau dutni kalyamna, mayang yakat Papang lani kidika yamna atnin yulni Krais yakat.