Read Mayangna 2 Kurint 6 Bible Online

2 Kurint 6 - Mayangna bible

2 Kurint 6

¹Bahang waralaih, Papang warkni yamyang yangna adika, manna yakat kalmana dinit buktayangna Papang dalani lani manana kidika dadawinih.

²Kat witing yaklau Ulna balna yakat aput yulwi: “Madakanik awarni yakat madakanayang; laihwi yaknin mani yakat ilp manayang.” Dawak awarni kidika laih waradika ki. ¡Laihwi yaknin mani kidika laih waradika ki!

³Muih as yakat bik dutni yamtik niningkatasyangna, yangna warkkina kidika dauh kalnin awas yulni.

⁴Nawatkauh, yangna laih di balna bitik yakat lāih yamtayangna yangna laih Papang warauni balna yangna kidika, yangna laih wauhnin, dukih atnin,

⁵wisnin, silak kanin, kiri yaklaunin balna, wark dadasni, makauh wauhnin dawak yuh daunin yakat bik sip wauhtayangna, kulnikna laihwatnin nuhni karuk.

⁶Yangna sangkinaka maisihni dis kidika, sinskina lani rahm kidika, dalani talnin dutayangna kidika, Spirit Holi yangna yakat kidika, alas lani dis karuk dalani talnin dutayangna kidika,

⁷yul rahm yultayangna kidika dawak Papang parasni yangna yakat kidika munah bik di balna kidika lāih yamtik muih balna yakat niningnakatayangna. Barangni atnin kalbaunin dini kidika karak dutik di balna yamtayangna, kalbaunin yakat dawak takitna daknin yakat bik sihm.

⁸Ma as as kat rispik yanayayamwi, dawak ma as as kat dutni bik yanayayamwi; ma as as kat yangna yulkina yamni yuyulwi, dawak ma as as kat dutni bik yanayuyulwi. Sihm alas yulyang muihni yangna kapat yanakukulwi, yul rahm yultayangna karang bik.

⁹Sihm amangkinalalawas kapat yanayayamwi, muih balna bitik amangkinalalawa karang bik. Dauna kapat yangna, kaunah ban sangka yangna; wah yananawi, kaunah yanaihiwaski.

¹⁰Kulnikna bukna kapat yangna, kaunah ban alasna yangna; miknakunni kapat yangna, kaunah muih mahni yakat rits yamtayangna; di dis kapat yangna, kaunah di bitik dutayangna.

¹¹Wirahki Kurint muihni balna, yangna lawik barangni karak yul manabaunayangna; yangna isingna kidika bitik manna namangna yakat apahna yangna.

¹²Manna yakat di as bik laihwattas yangna; manna kuduh laihwatta mana kidika.

¹³Kaput bahang kalmana dinit buktayangna, sihm papang as walanibis balna yakat kalnina dinit bukwa kapat, ismangna kidika apahta yatanauh, yang lawik manna yakat yamnayang kaput.

¹⁴Manna wark tuniruh arangni yakat ilwa panan kidika yakat manah aslah kalbahahawinih kulwas muihni balna kidika karak. Kat ¿ais as duwih la kat dawak la kat awas kidika bik? ¿Kidik awaskat amput yaringni kidika puksani kidika karak kaltalyang yamni atninyah?

¹⁵Aslah lani kidika sak atnin sip awas ki Krais dawak sitan kidika karak pasyakat, kulyang muihni as dawak kulwas muihni as karak bik sihm.

¹⁶Di as bik dis atnin ki Papang ūni kidika dawi dawan dauh balna kidika karak. Kat mayang laih Papang sangka kidika ūni yangna, witing palni yaklau yulna kaput: “Yalahki ki dawak likawaki kiwitingna pasyakat; yang laih witingna Papangnina awaki ki dawak witingna laih yang tawanki karang.”

¹⁷Kidika bahang Dawan bik aput yulwi: “Witingna paskaupak alahwanauh,dawak naikau alahwanauh; di maisihni as bik lalaihwinih. Bahang yang lawik manaduki ki

¹⁸dawak yang laih manna papangmana awaki, dawak manna laih yang walakibis ahaldawak yayal awanama, Dawan parasni nuhni duwa kidika yaklau yulwi.”