Read Mayangna Galacia 3 Bible Online

Galacia 3 - Mayangna bible

Galacia 3

¹¡Galatas, sins dis man! ¿Wais spirit dutni mananayah? Yangna sumalnayangna yakat, mamaknapa yakat lāih yaknayangna Jisaskrais pan prihni kau pana kidika.

²Dukihyawi adika yultik dakayang adika manah nangkitlatanauh: ¿Papang Spiritni kidika dunamanah lā yulwa kaput yamta kidika awaskat kasak kulnin kidika munah?

³¿Tunamana dadasniyah amanglanin, Spirit munah tunan bahnamana bik, waralaih muih kulnin lani yakauh yawamanah?

⁴¿Di yamni amanglanaman kidika laih dauh manah ki? ¡Sip awaski kidika laih dauh manah atnin kat!

⁵Papang Spiritni kidika manawi, manna pasmangna yakat di taldas balna kidika yamwak, ¿ais yulni yamwih? Kidika laih lā yulwa yakat yamnin laih awaski, kaunah nawatkauh laih kasak kulnin yulni kidika dunin.

⁶Kaput bik laih, Abraham Papang yakat kalkulna, bahang Papang bik kidika talna dai, kaput laih lā kat muihni as kalkulna dai.

⁷Kaput bahang, rahm Abraham sulani balna kidika laih kasak kulnin lani duduwa balna kidika ki.

⁸Ulna balna kidika, kaput bik baisa kau talna ju awas balna yakat bik Papang yaklauwi lā kat muihni balna dikulna, kasak kulnin duduwa kidika yulni, Abraham yakat adika yul as yamni kidika kalalana dai: “Nisan balna bitik man munah blisdiyamna karang.”

⁹Kaput laih kasak kukulwa balna kidika Abraham karak blisdiyamna, kat witing bik kasak kulna dai bahang.

¹⁰Wais kat kulninna kidika lā yakat āwi duduwa kidika laih latuhna dinit yakat ki, kat Ulna yakat yulwi: “Latuhna karang, angdika muihni lā wauhnitaya yakat ulna kaput yamwas karang kat.”

¹¹Kat lāih ki muih as bik lā kat kalkulwas ki lā munah karang kat: kat Ulna yakat yulwi: “Lā kat muihni kidika kasak kulwa munah sangka karang”

¹²Kauna lā kidika laih kasak kulnin munah kiwaski, bahang yulwi: “Wais lā yulwa yakat yamwarang kidika, sangka karang.”

¹³Krais mailaihwi yakna lā dinit kaupak, dawak mayang mayulki witing kidika lakaltuhna dai, kat Ulna yakat yulwi: “Dutni palni ki pan prihni kau pawi ihiwa muihni kidika.”

¹⁴Adika kaput kalahna, Papang blinisin kalanin pramis yamna dai kidika witing bik duna atnin. Krais Jisas munah, ju awas balna kidika; dawak kasak kulnin kidika munah mayang bitik Papang Spiritni mayanin yulna dai kidika duna atnin.

¹⁵Wirah balna muih kulnin karak yulmanabauki: muih al as pramis yamwak, witing ayangni ulwa kidika karak baisa parasni kalawi pranimis kidika, kaput laih muih as bik sip awaski dauh yampamnin dawak kidika awaskat baisa minityakat lakwi ulnin.

¹⁶Kaput laih Papang yaklawi Abraham yakat pramis yamna, dawak sulani balna kau bik. Ulna yakat yulwas ki “sulani balna”, yuldarang kat mahni kau, kaunah aslah kau laih yulwi aput: “Man sulama yakat”, kidika kuduh Krais.

¹⁷Yang adika yultayang: Papang pramis as yamna Abraham karak. Kidika bahang, Moses lāni kidika kaina kurih 430 bayakwak usnit kat, kidika Papang pranimis sip dauh yamwas ki.

¹⁸Papang mayanin pramis yamna kidika, Moses lāni munah kat laih, kidika laih pramis awas karang; kaunah Papang pranimis kidika laih prisant kalanin yulna.

¹⁹Kaput kat, ¿ais ilpyah lā kidika? Kidika usnit kat kalana, bahang kaput laih muih al yul dakawi yamwas kidika lāih kalahnin yulni, kidika “sulani” kaiwarang kat witing yakat pramis kalyamna dai kidika. Lā kidika laih insal balna yakat diawak yuyulna, dawak Moses laih walsah papusyakat sakdai.

²⁰Kaunah nid awaski muih aslah yulni kat, dawak Papang kidika laih aslah ki.

²¹¿Adika yulwakatpah lā kidika Papang pranimis niningkauh ki? ¡Kaput awas ki! Kat lā kidika yaklauwi sangnika kalanin sip kat, kaput laih lā kat atnin kidika laih lā munah dunin dai.

²²Kaunah Ulna yakat karang kat, muih bitik laih dutni sinilak yakat ki, kaput laih wais Jisaskrais yakat kasak kulwa kidika sipkarang duna atnin Papang pramis yamna kidika.

²³Kasak kulnin lani kidika kaiwas tanitkauh, lā kidika yaklauwi silak ūni yakat maiduwadai, kaput laih tahana dai kasak kulnin lani kidika manikingkana atnin.

²⁴Lā laih, sihm muih dinina yamyang as muih binina duwi kiwa kapat, Krais yakat maiduwi kiuna,[2] kaput laih witing yakat kasak kulda mapātki dis danin.

²⁵Kaunah waralaih kasak kulnin kidika kaina bahang, main maitalwa dai kidika -yuldarang kat lā- kidika diski,

²⁶kat Krais yak kasak kulwa munah, muih bitik laih Papang walanibis kakalna,

²⁷uman Krais karak kalpapakna kidika was utuh'yakna munah, witingna laih Krais kidika praknina duduna.

²⁸Ju atnin kidika awaskat grik atnin, muih dini yamyang atnin kidika awaskat pri muihni, al atnin kidika awaskat yal atnin, kidika laih dauh kalna, kat Krais Jisas karak aslahmana kat, manna bitik laih aslah kalnamana.

²⁹Dawak Krais dinimana kat, kaput laih Abraham sulanimana, dawak Papang pramis yamna kidika manna dimana ki.