Read Mayangna Galacia 4 Bible Online

Galacia 4 - Mayangna bible

Galacia 4

¹Yulkih yawa kidika laih adika ki: Di duwarang muihni kidika baisa walabis kat, satuk awaski muih dinina yamyang walanibis balna karak, di rahm kidika laih di bitik kidika laih witing daniwan.

²Muih buas laih maintatalwi, dawak papakwi maintalwi kalana atnin, papangni yaklauwi mani balna āna kidika kat.

³Mayang bik sihm kapat maibayakwi: walabis mayang dai mani balna yakat, adika sauni parasni dinit yakat mayang dai.

⁴Kaunah mani balna kaiwi kawakat, Papang witing walanibis kidika sihna, yal munah batahndana, Moses lāni dinit kat,

⁵lā dinitkau bangmayang kidika mailaihwi yaknin yulni, dawak papang walanibis balna rahmnina duduwa kidika duna atnin.

⁶Kat uman witing walanibis mayang bahang, Papang Walanibis Spiritni kidika makulnik yakat sihna; dawak Spirit kidika yulwi: “¡Yang Papangki!”

⁷Kaput bahang waralaih man laih muih dini yamyang awasman; kaunah Papang walanibis man; witing walanibis man bahang, Papang dukih kalawa kidika laih, di dianin pramis yamna kidika pasyakat atnin.[3],

⁸Tanit mani kau, Papang yakat amangnilatasmana dai yakat, dawan dauh balna dini yamyangmana dai.

⁹Kaunah waralaih Papang kidika amangnilanamana bahang, ¿amput sipkarangyah, kidika parasni dis kalni dinit yakat buknamna, dawak kidika dini yamyang alahwanamna?

¹⁰Manna ma as as, waiku, kurih balna pasyakat alasna yamtamana...

¹¹¡Uba yamadutayang, manna pasmangna yakat wark yamnayang bitik kidika dauh kalahwarang!

¹²Wirah balna, kalmana dinityakat buktik yultayang, yang aput awanauh, kat yang laih manna kapat kalnayang. Manna dutni yāyamnamana laih awaski.

¹³Uman amanglatamana, tatuna yul wisamni yamni laihwi yakwa kidika sumalnayang, ais sikninis wauhtamana dai kidika kaput.

¹⁴Dawak kidika sikninis laih manalaihwi talna as dai, kidika yulni laih yaruhmtasmana dai dawak bik dauh yakultasmana dai, kaunah nawatkauh laih, Papang innisal kapat yadunamana, ¡sihm Jisas Krais kapat!

¹⁵¿Ampatdawih kidika alasnina dakamana dai kidika? Manna ilpmana yulnik sipyang, dawak sipdai kat, manna mamaknapa bik sipdai yakta yanamna yang akat.

¹⁶Dawak waralaih ¿manna waihmanala kalnayang katpah, di rahm kidika manayulnayang yulni?

¹⁷Kidika muihni balna, manna yulmana uba kukulwi, kaunah witingna kulninna kidika yamni awaski. Dukih diawa kidika laih yangna kaupak manalanin kukulwi, kidika usnit kat witingna yakat kulnamna.

¹⁸Lāih laih yamni ki, muih ūk yulnina kulwi kalbaunin kidika, kaunah kulnin yamni kidika karak; dawak bik ban kaput yamwa atnin kidika, kaunah waradika yang manna pasmangna yakat sakyang kidika yulni manah laih awaski.

¹⁹Walakibis balna, wattik manna yulmana dalani dutayang, Krais kidika manna yakat kalwarangkat.

²⁰¡Yamni dai, warminitni kidika yakat sak-atnik yul satuk yulmanabaunik, kaunah waralaih amanglatasyang ais kulnikpa manna yulmana!

²¹Di as yayultanauh, manna, lā dinit yakat atnin kultamana kidika: ¿Manna dakasmanah, lā yulwa kidika?

²²Yulwi Abraham laih walanibis ahal bu duna; as kidika laih dini yamyang kaupak, dawak ūk kidika laih witing yalni kaupak, bahang kidika laih pri muihni dai.

²³Dini yamyang walanibis kidika laih batahnna muih tannika yakat; kaunah pri walanibis kidika laih batahndana Papang pramis yamna kaput kaiwi kalahna atnin.

²⁴Adika kulnin lani as sainni duwi; yayal bu kidika tanka laih pramis aslah kalahna as: as kidika laih sinaí asangni, kidika kuduh Agar, muih dinina yamyang nanangni dai kidika.

²⁵Kat Agar laih Sinaí asangni, Arabia yakat, kidika kuduh waradika Jerusalén kidik, kat kidika tawanni nuhni kidika laih dini yamyang kalna, witing walanibis al kidika karak.

²⁶Kaunah Jerusalén makau kisang kidika laih pri ki, dawak mayang laih kidika walanibis mayang.

²⁷Kat Ulna yakat yulwi: “Yal walabis yaktasman kidika alasna alahwah, man walabis disman kidika; alasna dutah sarahtah, walabis yaknin ampus dalani kidika dakasman kidik. Kat yal as ruhmwi dapamna kidika laih walanibis baisa mahni duwarang ki yal as al duwa kidika karak dawakat.”

²⁸Wirah balna, manna laih Isaac kapat mana: kidika laih Papang pramis yamna dai kidika walanibis balna kalanin.

²⁹Kaunah bik, kidika mani balna dai kapat walanibis al as batahndana dai kidika sau muihni lani kat, laihkuhti uina walanibis batahndana kidika Spirit kau, bahang waradika bik sihm kaput kalahwi.

³⁰Kaunah, ¿Ulna yakat ais yulwih? Aput yulwi: “Ahni yakat ruhmyaktah muih dini yamyang kidika walanibis karak, kat muih dini yamyang walanibis kidika sip di kidika wayah yakwi duduwaski pri walanibis kidika karak.”

³¹Kaput bahang wirah balna, muih dini yamyang walanibis awas mayang, kaunah pri kidika walanibis mayang.