Read Mayangna Galacia 6 Bible Online

Galacia 6 - Mayangna bible

Galacia 6

¹Wirah balna, manna talnangkat muih as dutni yakat bukna kat,[5] manna Spirit dutamana kidika ilp kalata barangni kalyaknamna ki. Kaunah minikun talnin kidika karak; kaunah amung talnamna ki, witing traini talnin yakat buknin awas yulni.

²Manna biri biri ilp yamtanauh truknamna kidika wauhnin yulni, kaput laih Krais lāni kat yamtanama.

³Muih as witing manah kapat kaldakawarang kat, kidika laih di as diski, witing alas muihni yakat alas kalyulwi.

⁴Muih kidika silp amput kidika amanglanin ki, dawak witing manah kapat kaldakanin kat, kaput kawang witing alas muihni yakat, kaunah muih ūk niningyakat laih awaski.

⁵Kat muih bitik laih alas tikini kidika truwarang ki.

⁶Wais kat yul wisamni yamni kidika duwarang kat, witing maesnitro karak sahyakwi dunin karang ki, di yayamni balna kidika bitik.

⁷Manna silp alas kalyuyulwinih: muih as bik Papang yakat sarahni kalyulwas ki. Dahwa kidika minik bahwi.

⁸Dutni dukih kalawa kidika dahwa kidik, dutni dukih kalawa kidika minik bahwarang ki, daunin yakat. Wais kat Spirit yakat dahwa kidika, sangka atnin ban kidika minik bahwarang.

⁹Kaput bahang maisuhnin awaski di yamni balna yamnin kidika; dadas ban yamdarang kat, mani balna kaiwak minik bahdarang.

¹⁰Kidika bahang, sipmayang kidika yakat, muih bitik yakat yamni yamnin, tanit kidika laih wirah kasak kulyang balna yakat.

¹¹¡Manna talnauh, ulna balna adika nunuhni ultik manasihtayang kidika yang sip tingki kau!

¹²Kidika balna yaklauwi taihwi diyayamwa kidika Papang sainni dunin yulni, kaput yayamwa kidika laih muih balna karak yamni atnin yulni, dawak witingna kidika Krais Jisas panan prihni yulni pāt wauhnin awas yulni yayamwi.

¹³Kaunah Papang sainni duduwa balna kidika bitik lā yulwa kidika kat laih yayamwaski. Kaput kaunah witingna kukulwi manna kidika Papang sainni dutanama, kaput laih witingna alasna dunin manapapakwak mark dutanda kidika muihmana yakat.

¹⁴Nawatwak yang laih, alasna dukih yawi Madakiwan Jisaskrais panan prihni munah. Kat Krais panan prihni munah,[6] muih balna kidika dadauna, dawak yang laih muih balna niningna yakat daunayang.

¹⁵Di as bik diski Papang sainni dunin, kidika awaskat dunin awas kidika; kaunah minit duwa kidika laih watwi wisam kalyamwada kidika.

¹⁶Datanauh kulnin aslah, dawak minikun talnin kidika bik, adika lani yakat yalahyang balna mana kidika, dawak Israel balna bitik Papang dini mana kidika.

¹⁷Waradika kaupak tanit yakat dukih yāwaski muih as bik ambuk yāusnin; kat muihki yakat duyawayang wauhnayang markni kidika Jisas karak.

¹⁸Wirah balna, Madakiwan Jisas Krais tingnikih kidika manna bitik mamatna yakat utuhwang. Amén.