Read Mayangna Efesus 2 Bible Online

Efesus 2 - Mayangna bible

Efesus 2

¹Muhnilau laih manna daunamana dai, dutni kidika yakat

²yalahtamana dai kidika, kat sau lani balna amput kidika usnit uitamana dai bahang, dawak wing yakat spirit as kidika manaduwādai bahang, dawak kidika laih Papang yulni dakakawas balna yakat baisa kulninna dulauwa bahang.

³Kaput bik laih mayang bitik kaput yalahda dai, ma ūk balna dai yakat, di dutni balna dukih mayawa kidika usnit uina mayang, mamuihki nuhni dawak makulnik dukih kalawa yakat. Kidika yulni laih Papang wahni yamadangni kidika mayang dunin dai, muih ūk balna kapat.

⁴Kauna Papang laih minikun talnin kidika duwa bahang, dalani talnin nuhni karak maitalna,

⁵bahang Krais karak mailibitwi masangkika mayana, mayang madutki yulni dauna mayang dai kaunah. Papang minikun talnin duwa kidika kau manna laihwi yaknin kidika dunamana.

⁶Krais Jisas karak aslah mailibitwi dauna kaupak maidulauna, dawak mayana makau kisang yakat witing karak yalahnin.

⁷Adika yamna ma balna kaiwarang niningkana atnin witing kulnin yamni kidika, Krais Jisas munah mayang akat.

⁸Kat Papang witing minikun talnin duwa kidika munah manna dunamana laihwi yaknin kidika, dawak bik kasak kulnin kidika munah bik. Adika dini laih manna silp yaknamana laih awaski, kaunah Papang prisantni as ki.

⁹Adika laih warkni yamna munah kaiwi kalahwaski; kaput laih muih as bik alasna dunin awaski, di as kau bik;

¹⁰kat kidika laih Papang yaklauwi yamna bahang; witing Yaklauwi Krais Jisas yakat maiyamna, wark yayamni manah yamnin yulni, baisa kau witing ta balna yamwi mayana kidika.

¹¹Kaput bahang, manna, Ju awasmana kidika, dawak bik manayuyulwa kidika “Papang sainni dis balna” manatwa kidika Ju balna (witingna laih muih muihni yakat sain duduwa kidika, dawak witingna laih yuyulwi “Papang sainni duyang balna”),

¹²ismangna kattanauh ma bayakna balna yakat manna Krais dismana dai, dawak Israel kaupak naikau mana dai, dawak Papang pranimis bik dismana dai. Adika sauni akat yalahtamana dai, Papang dis, dawak tani tahanin bik dis.

¹³Kauna waralaih, Krais Jisas aslah mana witing āni utuhna kidika yulni, manna muhnilau laih naikau mana dai kaunah waralaih yaihnit yakat mana.

¹⁴Krais laih kulnin aslah lani. Witing yaklauwi tawan aslah yamna, ju balna dawak ju awas balna karak, witingna nanitna dakna sakdai kidika bahpamna, dawak witing muihni nuhni kau waihla lani sakdai kidika yakpamna.

¹⁵Lā kidika dispamna, yamnin pakwadai kidika dawak lani āna balna kidika, dawak sihm kidika dawak bu kidika kau muih al wisam aslah yamna. Kaput laih kulnin aslah kidika yamna.

¹⁶Witing muihni nuhni karak, dispamna waihla lani sakdai kidika tawan bu kidika balna pasningna yakat, dawak pan prihni yakat dauna kidika yulni watwi Papang karak yamni kalalahna, kidika kau muihni nuhni aslah kalahna.

¹⁷Krais duaina yul yamni kidika, muih bitik yakat kulnin aslah lani, manna Papang kaupak naikau mana dai kidika dawak yaihnit kau bangkidika bik.

¹⁸Kat Krais munah mayang bitik sip mayang Papang yaihnit yakat kiunin, Spirit aslah kidika munah.

¹⁹Kidika bahang, manna laih pa ūk muihni awasmana, dawak saumana kaupak ahni yakat awasmana, kaunah waralaih tawan holi kidika karak biri biri dutamana rahmmana kidika, dawak Papang wanaihni mana.

²⁰Manna laih ū as rahni balna ukwi dulauwi yamna kapat mana, bahang kidika rahni balna kuduh apostel dawak prapit balna, dawak Jisaskrais kidika palni kuduh kipala tatuna kidika.

²¹Krais yakat, ū kidika bitik dulauwi yamwi kiwi di bitik niningyakat, dawak pīsni balna bitik kau, ban kaput kiwi Dawan niningyakat makatyulnin ūni holi karang kidika.

²²Witing yakat, manna bitik kaluduhtamana, dawak makatyulnin ūni as kaltamana, bahang kidika yakat Papang yalahwi witing Spiritni munah.