Read Mayangna Filipos 1 Bible Online

Filipos 1 - Mayangna bible

Filipos 1

¹Pal dawak Timoti, witingna Jisas Krais dini yamyang balna, adika wauhnitaya ultayangna Filipos tawanni nuhni kau tawan holi muihni balna Krais Jisas karak aslah bangkidika yakat, yuldarangkat, tawan muihni balna bitik suts tanituna nunuhni balna karak, dawak suts dini yamyang balna bik.

²Mayang Mapapangki dawak Dawan Jisaskrais karak tingninakih kidika dawak kulnin aslah kidika ututuhwang mamatna yakat.

³Kulnin yakat manakultayang mani kat yang mikityultayang Papang yakat;

⁴yang mikityultayang kat, alasna yultayang manna yulmana;

⁵bahang mayang aslah kalpakdi wauhna mayang yul yamni wisam kidika yulni, ma tatuna kaupak warmani kat.

⁶Yang rahm kultayang Papang, witing warkni yamni yamna kidika manna yakat, ban yamwi duwi kiwarang witni kat, Jisas Krais wat kaiwarang kat.

⁷Kidika laih yamni ki yang kaput kultayang kidika manna yulmana, kat kulnik pasyakat manadutayang bahang, dawak bik manna bitik yang karak mana bahang, Papang kulnin minikun talwa kidika nikingkana kaupak, silak yakat sak awaki, kidika awaskat lā muihni balna muhnina yakat nanitdaknik yul wisamni yamni sumaltayang kidika.

⁸Kat Papang laih amanglawi ampat kulnik buknayah manna bitik yulmana, Krais Jisas yaklauwi kulnik yakat dalani talnin āwa kidika yulni.

⁹Mikityultayang yakat yultayang, dalani talnin dutamana kidika baisa baraknin, dawak Papang yaklauwi sins nuhni dawak di amanglanin kidika bik mananin,

¹⁰kaput laih manna di yamni laihwi dunin kidika amanglata atnamna. Kaput laih sangmanaka kidika klin yalahtanama, dawak Krais nawatwi kaiwarang mani kat manabilwas karang;

¹¹kaput laih manna minik yayamni manas bahtanama, Jisaskrais tingnikih munah, Papang risnipik dawak ayangni nuhni yamnin yulnin.

¹²Wirah balna, dukih yawi manna amanglanamna, yang akat di yakalahna balna kidika ilp yana yul wisamni yamni kidika sumalna atnin.

¹³Kat silak āwanayang kidika yulni witnis yulnik dai muih bitik yakat Krais yulni kidika, king ūni kau muih bangyakat, dawak muih ūk balna kidika bitik.

¹⁴Dawak yang silak yakat yang kat talwi, wirah balna mahni kauh kidika yul wisamni yamni kidika sumamalna, yamaduwas, dawak kulninna kidika Dawan yakat awi duduna.

¹⁵Rahm kidika muih buas Krais yulni sumamalwi tumnin dawak wanaihni niningkauh kidika yulni bik, kauna ūk balna laih kulnin yamni karak yayamwi.

¹⁶Buas laih Krais yulni sumamalwi dalani lani karak, bahang amanglalawi Papang yaklauwi akat yahana kidika yul wisamni yamni kidika nanitdaknin yulni;

¹⁷kauna muih ūk balna laih di dukih diawa kidika yulni yayamwi, dawak kulninna kidika alas dis laih awaski, kaunah nawatkauh laih baisa pāt yāyamnin yayamwi silak yakat sakyang kidika yulni.

¹⁸Kauna, ¿ais kulkiyah? Kaunah kidika bitik pasyakat, alas yulwaspa, yulwapa kaunah Krais yulni sumamalwi; bahang kidika yulni alasna kultayang. Kauna baisa alasna dunayang,

¹⁹kat amanglatayang, kidika bitik yulni yang yalaihwi yakna karang, tingkih kultayang manna yang yulki mamatnayultamana kidika dawak Jisaskrais Spiritni ilp yāwa kidika bik.

²⁰Yang tahatayang Papang yadapamwak dutni kaltas awaki, kaunah waradika kapat, tanit yakat ban kaput, yang akat lāih yakna karang muih muhnina yakat Krais nuhni kidika, sangka yang dawak daunayang karang bik.

²¹Kat yang nikingyakat laih, Krais yakat ban sangka atnik, dawak daunik kidika laih dunik dini as ki.

²²Dawak adika muihki nuhni akat sangka atnik kidika, yang warkki balna kidika minik yaknin sipki, kaput bahang amanglatasyang angdika laihtik dunik pa.

²³Yang nikingkauh dadasni ki angdika dunik pa, bu kidika kaupak: ūk yakat talayang kidika laih dautik Krais karak atnin kauh yamni talayang, kat kidika laih tanit yamni bahang yang nikingyakat;

²⁴kauna, ūk yakat talki kat, manna yulmana baisa sangka atnik ki.

²⁵Dawak kidika yamni amanglatayang bahang, amanglatayang baisa manna karak awaki ki; ilp manating tamatna yakat yawanamna, dawak kasak kultaman kidika yakat baisa alasna dunamna.

²⁶Kaput laih manna pasmangna yakat paisa yadutanama, dawak yamting kat baisa barakwarang Krais Jisas witing manah kapat kaldakanin kidika.

²⁷Adika manah: manna yalahtamana kidika laih Krais yul wisamni duaina kidika kaput kawang. Kaput karang, yawik manatalki dawak yawik manatalasyang karang bik, manna yulmana dakakih yawi aslah palni mana kat, kalpakta kasak kulnin kidika kau kalbautanama kat yul wisam yamni kidika yulni,

²⁸datanangkat waihmanala kidika bilmanalaunin awaski. Kidika laih sain as lāih palni ki witingna laih bahwidis kalnin yakat uiwa kidika, dawak sihm kaput bik manna laih laihwi yaknin yakat yawamana. Dawak kidika laih Papang kaupak kaiwi.

²⁹Krais yulni, manna witing yakat kasak kulnin manah manawas ki, kaunah wauhnin bik manana, witing yulni.

³⁰Manna dawak yang karak, sihm kidika kalbaunin yakat mayang. Uman talnamana amput kalbaunayang kidika, dawak waradika bik yul dakamana amput kalbautayang kidika.