Read Mayangna Filipos 3 Bible Online

Filipos 3 - Mayangna bible

Filipos 3

¹Waralaih, wirah balna, Dawan yak alasna awanauh. Yang nikingkauh laih dutni dakanik dini diski wattik manaulna atnik, dawak manna namangnakauh laih ilp ki.

²Amung talnauh muih dudutni balna kidika,[1] wark dutni yayamwa kidika, muihnina nuhni yakat dakwi daukakalwa kidika;

³kat rahm palni Papang sainni duna balna kidika kuduh mayang, Papang ayangni nuhni yamda kidika Spirit munah,[2] dawak mayang alasna dudi Krais Jisas mayang bahang, mayang di dauh balna yakat makulnik ādi dudaski.

⁴Yang bik kidika yakat kulnin ātik dutayang. Muih as bik diski yang kultayang kapat kulnin:

⁵batandanayang ma tiaskaubās kat Papang sainni yayana, yang laih Israel ninisan yang, dawak Benjamín sulaniyang, hibru muihni as yang, hibru walanibisyang. Ju lāni tanka balna walwi yaknin niningyakat laih Parisi pasyakat yang dai;

⁶yang laih minit anyang as yang dai, suts muihni balna yakat laihkuhtik uinayang; lā kat yamnin kidika yulni kidika laih sip-awasdai laihwatna atnin.

⁷Kauna adika bitik, muhnilau laih nuhni dai yang nikingyakat, kaunah waralaih, Krais yulni, kidika balna bitik laih dauh kalna.

⁸Baisa minityakat, minitdis talayang libittik talingkat Dakiwan Krais Jisas di yamni nuhni kidika karak. Krais yulni di bitik dis alahwanayang, dawak di bitik kidika bubuh kapat talayang witing kidika dunik yulni,

⁹dawak witing karak aslah atnik yulni; yang alas lāki kat yamnik laih awaski, lā kidika kaupak dutik, kaunah Krais yakat kasak kulnin munah lakat atnin kidika, dawak Papang bik yaklauwi mayawa kidika kasak kulnin munah.

¹⁰Dukih yāwa kidika laih Krais kidika amangnilanik, yang yakat kaldakanik dauna kaupak watwi yaklaunin kidika parasni, dawak wauhnin yakat aslah kalahnin, witing dauna kapat yang bik dauna atnik,

¹¹dauna kaupak yaklalauwarang yakat āwakih yawi.

¹²Yang yultasyang bitik laih yaknayang, dawak bik barangni awasyang; kaunah ban takit yakat yawayang laihna atnik yulni, kat Krais tatuna yalaihna bahang.

¹³Wirah balna, yultasyang yang laih uman laihnayang; kaunah yamtayang kidika laih di bayakna balna kidika dating dikitkahwi, dawak takit kau sakkidika laihnik yulni parasni yamtayang,

¹⁴laihnin kulnayang yakat yawik āwinik, dawak makau kisang prisantni kidika dunik, Papang maiyulwa kidika mawi dunin Krais Jisas munah.

¹⁵Mayang bitik kasak kulnin lani parasni duda kidika, aput kulnin ki. Di as kat manna satuk kultamana kat, Papang yaklauwi adika bik namangna kawarang ki.

¹⁶Kaunah, mayang mayalahnin ki uman di balna amanglanamayang kidika kaput.

¹⁷Wirah balna, yang amputyang kidika kaput awanauh, dawak bik talnauh kidika balna amput yalalahwa kidika manna yakat namangnakana mayang kidika.

¹⁸Wat wat manayulnayang, dawak waralaih mikwas karuk manayultayang, manas palni laih yalalahwi Krais panan prihni kidika waihninala kapat,

¹⁹dawak witni kat laih disnin yakat didukiwi. Witingna daninawan kidika laih kaskih diawa kidika ki, asalni dakanin dini dai kidika witingna manah kapat kaldakakawi waralaih. Adika sauni dini manah kukulwi.

²⁰Kaunah mayang laih makau kisang kidika muihni balna mayang, dawak tahadi makau kisang kidika kaupak kaiwarang mailaihwi yaknin kidika, Dawan Jisaskrais,

²¹mamuihki dutni adika satuk yamwarang, sihm witing muihni nuhni alasna yaksihn kapat. Witing parasni nuhni duwa kidika kau yamna karang di bitik minit bayakwi taihnin yulni.