Read Mayangna Colosas 1 Bible Online

Colosas 1 - Mayangna bible

Colosas 1

¹Yang, Pal, Jisaskrais aposnitel Papang isning lani kat āwanayangna kidika, wirah Timoti karak,

²parastanauh Colosas kau tawan holi pakkidika yakat, wirah balna Krais kau barangni balna kidika. Mapapangki[1] yaklauwi tingnikih kidika utuhna karang, dawak bik kulnin aslah kidika manna mamatna yakat karang.

³Manna yulmana mikitnayultayangna kidika Papang yakat tingkih kalatayangna, Madakiwan Jisaskrais Papangni kidika yakat.

⁴Manna Krais Jisas kau kasak kultamana kidika dakanayangna dawak dalani lani bik dutamana kidika Papang tawanni muihni balna bitik yakat,

⁵kidika tahanin yaklauwi kulnamna dulauna kidika, makau kisang yakat pamana ridi yamna yulni. Adika laih uman yuyulwak dakanaman yul rahm duwa kidika yul wisamni yamni yakat

⁶bahang kidika laih manna kat kaiwi kana kidika. Adika yulni laih barakwi, dawak minik bik yakwi sau bitik yakat, manna pasmangna kau kalahna kapat, Papang minikun talnin duwa kidika dakanamana kaupak, dawak bik rahmni kidika amanglanamana kaupak bik.

⁷Adika laih Epafras namangnakana, witing laih yangna karak wark kalahna, dawak manna bik Krais dini yamyang yamni as kalkultamana kidika.

⁸Witing duaina manna yulmana kidika, dawak Spirit yaklauwi dalani lani manawa kidika bik.

⁹Adika bahang yangna, dakanayangna mani kaupak, manna yulmana mikitna yultayangna kidika datasyangna, Papang yakat kalyultayangna namangnakana atnin witing kulnin lani kidika, dawak sins lani tuhni balna kidika mananin, dawak amanglanin spiritni kidika bik.

¹⁰Kaput awanama manna, Dawan muihni balna amput kidika, witing dukih kalawa kidika yamtanama, dawak wark yamni balna minik kidika yaktanama, dawak Papang yakat bik yamni amangnilatanama.

¹¹Witing yakat kalyuldi parasni nuhni yaksihn kidika kau, parasni manayamnin; kaput laih manna sip awanama wauhnin parasni awanama kulnamna laihwattanama, dawak alasna awanama

¹²Papang yakat tingkih kalatanama, witing sip manayamna kidika yaringni yakat dunamna yulni, witing yaklau dini pahni diawarang kidika witing tawanni muihni balna yakat.

¹³Papang yaklauwi puksani parasni kaupak mailaihwi yakna dawak witing Walanibis dalani kingni lani yakat maiduwi kiuna,

¹⁴witing munah laihwi yaknin kidika dudi, dawak madutki balna bik dawak disna.

¹⁵Krais kuduh Papang wayani lāih kidika, dawak bik sip taldas kidika mamikpa kau; kidika laih Walanibis tatuna al kidika, di balna yamwas tanit kaupak ban kidika.

¹⁶Witing munah di balna makau kisang dawak sau kau bangkidika bitik yamna, talda dini balna dawak taldas dini balna bik, kaput bik spirit duyang muihni balna, la muihni balna dawak parasni muihni balna kidika kauna. Kidika balna bitik witing munah yamna dawak witing dini yamna.

¹⁷Krais laih di balna bitik tanit kaupak ban ki, witing munah di balna kidika pāni kat kat ki.

¹⁸Kidika minityakat, Krais laih muihni nuhni kidika tunan, kidika kuduh suts. Witing laih tatuna kaupak ki, dawak witing tatuna dauna kaupak yaklauna, kaput laih witing kidika di bitik yakat tatuna ki.

¹⁹Kat Krais yakat kalanin kulna Papang parasni bitik kidika,

²⁰dawak witing munah Papang yaklauwi di yamna balna bitik kidika watwi yamni kalahna, witing munah pāni kat kat āna, sau kau dawak makau kisang kau kidika balna bik, kulnin aslah yamna Krais āni munah, pan prihni yakat utuhna kidika.

²¹Manna kidika muhnilau laih pa ūk muihnimana dai, dawak Papang waihnila mana dai kulnamna yakat, di dutni balna yamtamana dai kidika yulni,

²²kauna waralaih Krais yaklauwi watwi mawanaihki karak yamni maiyakna, witing sau akat kaiwi dauna kidika munah. Witing yamna, manna kidika manadunin witing muhni yakat, holi, sani laihna dis dawak pāt dis.

²³Kauna kidika laih, manna barangni atnamna ki kasak kultamana yakat, manna tahanin as dutamana kidika kaupak data alahwanamna awaski, yulni wisam yamni dakanamana kaupak. Adika yulni kuduh sau bitik yakat sumalwi awaihna kidika, dawak, yang Pal, ilp diyamtik sumaltayang.

²⁴Waralaih alasnayang manna yulmana wauhtayang kidika, kat aput laih uitik papattayang, yang muihki yakat, Krais wauhna balna kidika baisa suts yakat kiwi kawas kidika, bahang kidika kuduh witing muihni nuhni.

²⁵Papang yaklauwi yayamna yang adika suts dini yamyang atnik, witing yang akat yamnin yana kidika, manna yamni atnamna yulni, witing yulni kidika pa bitik yakat sumalnin,

²⁶yuldarangkat, warkni malnikau kidika kurih andat balna bayakwi kaina dawak sulani balna bik, bahang Papang laih malnikau duwasakdai, kaunah waradika laih tawan holi yakat niningkana.

²⁷Witingna yakat Papang yaklauwi niningnakanin kulna, ritsni yaksihni warkni balna malni kau sakkidika nisan balna bitik niningna yakat. Kidika warkni malni kau sakkidika kuduh Krais manna pasmangna yakat sakki,[2] kidika kuduh tahanin yaksihni dunamna kidika.

²⁸Mayang Krais yulni kidika sumaldi, yul manayuldi, manasumaldi sins lani tuhni kidika karak, kaput laih Krais yakat duwi kiunin barangni yamni palni.

²⁹Adika wark yulni parasni war alahwayang, Krais paraski yawa kidika karak.