Read Mayangna Colosas 2 Bible Online

Colosas 2 - Mayangna bible

Colosas 2

¹Dukih yawi manna amanglanamna, manna yulmana parasni kalbautayang, Laodicea balna yulnin dawak ūk balna yatatalwas balna kidika yulnina bik.

²Yang kalbautayang witingna kulninna dulaunin yulni, kaput laih dalani lani yakat aslah atnin, dawak di amanglanin barangni kidika manawak Papang warkni balna malni kau kidika namangna kanin, bahang kidika laih Krais yakat sakki;[3]

³kat witing yakat kuduh sins tuhni dawak amanglanin kidika bik duwa sakkidika.

⁴Adika laih manna yakat manayultayang, bahang muih as bik yul dauh balna kidika kau alas manayulnin awas yulni.

⁵Yang muihki nuhni adika manna karak awasyang kaunah, spiritki kau laih manna karak yang, dawak alasnayang manna yamni mana kidika yulni, dawak Krais yakat kasak kultamana kidika yulni bik.

⁶Kaput bahang, Jisaskrais kidika manna Damanawan kapat dunamana, bahang Krais dini balna amput kidika kaput atnamna ki, manna bik,

⁷rikmana kidika witing yakat pasluihni anamna ki, witing yakat atnamna ki kasak kulnin karak, manasumalna kaput, dawak nining ban kaput Papang yakat tingkih kalyulnin.

⁸Amungtalnauh, datanangkat manaduwi kiunin awaski, yul dauh balna kau alas manayulnin yayamwa kidika, witingna laih Krais yakat wawalwaski, kaunah muih kulnin kidika wawalwi, dawak adika sauni parasni duwa yakat wawalwi.

⁹Kat Papang kidika bitik laih lāih palni ki Krais yakat,

¹⁰dawak witing yakat Papang parasni kidika bitik kalawi, kat Krais laih spirit duwa balna dawak parasni duduwa balna kidika bitik taninatuna.

¹¹Dawak witing munah manna Papang sainni dunamana, kaunah muih al yaklauwi Papang sainni yamwa kapat laih awaski, kaunah mayang Krais karak kalpakdak Papang sainni mayawa kidika, dawak mamuihki dutni yamwa kidika bitik dapamnin.

¹²Was manautuh'yakwak, manna laih Krais karak mananuna ki, dawak bik witing karak dauna kaupak watwi manadulauna, kat Papang parasni yakat kulnamana bahang, watwi dauna kaupak manadulauna.

¹³Manna, ma ūk balna yakat, spirit niningkauh laih daunamana dai, dutni yamnamana kidika yulni, dutni yamtamana kidika kaupak dakta alahwasmana dai bahang; kaunah waralaih Krais karak manalibitwi sangmanaka manana, dawak dutmana balna bitik dāwak disna.

¹⁴Papang yaklauwi, mayang tras dudadai kidika bitik dauh yampamna, kidika yaklauwi maitaihwadai kidik; kidika laih pan prihni yakat pawi dispamna.

¹⁵Papang yaklauwi spirit parasni balna kidika bitik dakyakna, dawak Krais munah[4] sau yakat lakmukna, muih bitik muhnina yakat silak kau duwi kiuna, witing minit bayakna mani kat.

¹⁶Kaput bahang, muih as bik dutni yamtanangkat yulmana yulnin awaski, yuldarangkat alasna mani balna, waiku wisam mani, kidika awasbik yakurupdinin mani[5] satni balna kidika.

¹⁷Adika bitik laih puksani as kaiwarang kidika yulni, kaunah di as rahm kidika laih Krais.

¹⁸Datanangkat dutni yakat manatuk'anin awaski, muih limahni kapat yayamwa balna kidika yaklauwi, dawak kidika balna laih insal balna yakat prininaias yayamwi, dawak bik amana kapat bik tatalwi atwi, dawak witingna manah kapat kaldakakawi sinsnina lani duduwa kidika yulni.

¹⁹Witingna laih tunan karak libitni awaski, kidika yaklauwi yamwak muihni bitik barakwa kidika di bayahwak, dawak muihni pīsni balna kidika libitnin Papang warkni yamnin kulwa kaput.

²⁰Manna laih Krais karak daunamana, bahang adika sauni parasni kidika laih manalaihwaski. ¿Bahang amput dawak adika sauni muihni balna kapat yalahdamanah, kidika lani dinit yakat manah:

²¹“Adika laihwinih, kidika kaswinih, tingma balna kidika laihwinih”?

²²Adika lani balna bitik laih talnin karangki yus yayamwa kidika, kidika laih muih kulnin lani manah ki.

²³Rahm kidika laih, adika dini balna adik sins tuhni duwakapat ki, kat Dawan lani kapatki, kat limahni atnin bik yulwi, mamuihki nuhni kidika wark parasni ānin, kauna kidika dini balna laih muih as bik rispik kalawas ki, kat kidika laih mamuihki nuhni dukih kalawa kidika manah kalawa bahang.