Read Mayangna 1 Tesalónica 1 Bible Online

1 Tesalónica 1 - Mayangna bible

1 Tesalónica 1

¹Pal, Silvano dawak Timoti kauna kalpaktik adika wauhnitaya ultayang wanaih balna Tesalónica tawanni nuhni sutsni muihni balna, Papang Jisas Krais karak aslah bangkidika yakat. Papang witing minikun talnin lani duwa kidika dawak kulnin aslah lani duwa kidika manna mamatna yakat lakna karang.[1]

²Yangna laih ban kaput Papang yakat tingkih kalatayangna manna yulmana, dawak bik manakultinah mikitna yultayangna.

³Yangna ma bitik yakat kultik dakayangna Mapapangki muhni yakat manna rahm kulnin lani dutamana kidika karak ampus wark yamnamanah, dalani lani ampus karak witing dini yamnamanah dawak manna tahanin lani Jisas Krais yakat dutamana kidika ais amput ilp mananayah dadasni karuk sip wauhna atnamna wauhnin balna yakat.

⁴Wanaih balna, Papang laih manna yakat dalani manatalwi, dawak yangna amanglatayangna witing yaklau manawalwi yakna kidika.

⁵Bahang yangna lawik yul wisam yamni kidika manayulnayangna mani kat, yul manah bik awasdai, kaunah Papang parasni karak dawak Spirit Holi warkni karak bik yamtik namangnakana yangna dai, minikun talnin lani kidika minitbayak karak. Manna yamni amanglatamana manna pasmangna yakat amput di balna yamtayangna dai kidika, manna yamni atnamna kidika waltinah.

⁶Manna, namangnakauh laih, yangna di yamnayangna kidika dawak Dawan di yamna balna kidika yakat bik usnit uinamana dai, dawak yul yamni kidika laih Spirit Holi yaklau wauhnin balna pasyakat alasna manawa kidika karak dunamana dai.

⁷Aput karak laih manna kidika talnin as kapat alahwanama Macedonia dawak Acaya sauni muihni kulyang balna kidika niningna yakat.

⁸Manna kaupak, Dawan yulni kidika pa balna bitik yakat kawi yaklana, Macedonia dawak Acaya kidika yakat manah bik awas, kaunah pa balna bitik yakat, dawak muih balna bitik amanglalawi manna laih Papang yakat rahm kulnin lani dutamana kidika, waralaih yangna lawik yulnikna dini bik awaski.

⁹Nawatkauh, witingna sip yuyulwi yangna manna yakat yawanayangna kidika yulni dawak manna amput wayani dauh balna kidika ruhmta data Papang sangka rahm kidika yakat dini yamnamana kidika yulni bik yuyulwi.

¹⁰Papang walanibis Jisas watwi kisang kaupak kaiwarang kat amput tahatamana kidika bik yuyulwi, Papang yaklau watwi dulauna kidika. Jisas yaklau mailaihwi yakwi wah yamadangni kaiwa kidika kaupak.