Read Mayangna 1 Tesalónica 2 Bible Online

1 Tesalónica 2 - Mayangna bible

1 Tesalónica 2

¹Wanaih balna manna yamni amanglatamana yangna yawik manatalna yangna kidika dauh awas dai kidika.

²Baisa nawatkauh, manna amanglatamana karang bik, yangna laih muhnilau kau dutni yanayayamna dai Filipos sauni yakat, Papang yaklau ilp yanana witing yulni wisam yamni kidika manna yakat manayulna atnikna, kulnikna dadasni karuk dawak bik kalbaunin dadasni kidika pasyakat.

³Kat yangna laih mistik alahwas yangna dai sumaltayangna yulni kidika, dawak kulnin lani dutni karak bik yultasyangna dai dawak muih as yakat bik alas kalyulnikna yamtasyangna dai.

⁴Nawatkauh, Papang yaklau yamni yanatalwi yul wisam yamni kidika yulnikna yanayulna, dawak yangna laih kaput yultayangna. Yangna laih muih balna yamni talninna kidika yulni yamtasyangna, kaunah Papang witing isingna lakwi talwa kidika minikpa yakat yamni talnin kidika yamtayangna.

⁵Manna amanglatamana, yangna laih wat as bik manna yakat yul yayamni kidika dutik manayultasyangna dai, dawak yangna lalah dunikna yulni bik yamtasyangna. Adika dini laih Papang witnis ki.

⁶Yangna laih muih as bik risnipik lani kidika waltasyangna: manna dawak muih ūk balna risninapik bik awas.

⁷Yangna Krais aposnitel balna lakina tikini kidika manna mamatna yakat yamtiningkat dakanamna dai karang bik, manna pasmangna yakat muihbinina kapat di yamnayangna dai. Sihm muih nanang as muihbin as muhwa kapat dawak bik walanibis balna maintalwa kapat,

⁸manna yakat bik kaput dalani manataldi dukih yanana dai kaput, Papang yulni wisam yamni kidika manah bik awas, kaunah yangna palni sangkinaka kat bik. ¡Yangna laih uba palni dalani manatalna yangna!

⁹Wanaih balna, manna ismangnakatwi yangna amput wark alahwik dawak amput kalbauna yangna kidika sangka atnikna yulni. Madah dawak pukta wark alahwanayangna, manna namangna yakat truknin dini atnikna awas yulni, yangna laih Papang yulni wisam yamni kidika manasumaltayangna dai mani.

¹⁰Manna dawak Papang bik witnis, yangna laih holi, barangni dawak kulyang muihni balna mana yakat manabiltas di balna yamnayangna kidika.

¹¹Manna amanglatamana yangna lawik manna yakat kulnamna dulautik dawak walamana-ānnayangna kidika, papang as walanibis balna yakat yamwa kaput. Yangna lawik manayulnayangna Papang dini balna amput kat kaput atnamna, witing kingni lani yakat dawak alasnina yaksihni kidika yakat bik kiwi dunin yulwa kidika.

¹³Kidika bahang, yangna nikingnakauh laih, niningh ban kaput Papang yakat tingkih kalatayangna, bahang yangna lawik Papang yulni manasumaltiningkat dakanamana mani kat, Papang yulni kapat dunamana dai dawak muih yulni kapat laih awas. Dawak kidika laih rahm Papang yulni, kidika laih manna kulyang balna mana kidika pasyakat lāih kalahwi.

¹⁴Wanaihki balna manna saumana muihni balna yaklau manauhuiwakat wauhnamana kidika, Judea yakat Papang sutsni balna Jisas Krais yakat balna dikalahna kidika kapat manna yakat bik manakalahna, bahang witingna bik saunina muihni Ju balna yaklau diuhuina dai.

¹⁵Adika Ju muihni balna yaklauwi Dawan Jisas yakat ihina, muhnilau kau Prapit balna yakat ihina dai kaput, dawak yangna yakat laih yanakangwi yayakna dai. Papang yamni talnin kidika yayamwas ki, dawak di balna bitik kidika niningkauh yaklalauwi,

¹⁶Ju muihni balna awas kidika yakat yulbautiningkat witingna bik laihwi yaknin lani duna atninna yamtiningkat, sip yanadadawakat yulbautasyangna. Aput karak witingna dutnina kidika uman kulwi talna ki. Kaunah waralaih, witni kat, Papang wahni yamadangni kidika witingna minitna yakat kaina ki.

¹⁷Wanaih balna, yangna ma buas manna kaupak daktik alahwayangna mani kat, manatalasyangna karang bik, isingna yakat ban manadutayangna dai, dawak yawik manatalna atnikna dukih palni yanawa dai.

¹⁸Yawinikna traitalna yangna dai; yang Pal, wat mahni yawinik kulnayang dai, kaunah sitan yaklau nikingnakauh yaklauna dai.

¹⁹Bahang, ¿mayang matahanik, maalaskina, dawak mayang Madakiwan Jisas watwi kaiwarang kidika muhni yakat mayang manah kapat kaldakanin dini kidika waisyah? Manna awaslaih, muih ūk laih diski.

²⁰Manna laihtakat yangna isingnalak dawak bik alaskinana mana.