Read Mayangna 1 Tesalónica 3 Bible Online

1 Tesalónica 3 - Mayangna bible

1 Tesalónica 3

¹Baisa wauhnik kidika sip awas danayang bahang, kulnayang watnik, yang alas Atenas yakat,

²dawak usnit kat wanaihkina Timoti Papang warkni yamyang Krais yulni wisam yamni yulwa muihni kidika sihnikna kulnayangna dai. Sihnayangna dai kiwi manayulna atnin dawak bik rahm kulnin lani dutamana kidika dulauna atnin yulni bik,

³dawak adika tranibil yulni muih as bik kulnin bukwas atnin yulni. Bahang manna yamni amanglatamana mayang laih adika wauhnin mayang kidika.

⁴Baisa kidika minityakat, manna karak baisa bangyangna dai kidika mani, ismangna paknayangna dai kuldi kalbaudarang kidika yulni; dawak kaput kalahna, manna uman amanglatamana kaput.

⁵Kidika bahang, yang laih, sip baisa minit bayaktas, muih sihnayang dai manayulwi dakana atnin rahm kulnin lani dutamana kidika ampat mana pa, bahang yamadunayang dai traini talnin kidika yaklau traimana talwakat yangna warkkina kidika dauh kalna kuduhtik.

⁶Kaunah waralaih Timoti laih Tesalónica kaupak nawatwi kaina, dawak yul yayamni balna duaiwi yanana rahm kulnin lani dawak dalani lani dutamana kidika yulni. Yanayulna manna laih ban dalani karuk ismangnakatwa kidika yangna yulkina, dawak manna laih yangna yakat yanatalnin dukih manawi sihm yangna lawik manatalnikna dukih yanawa kaput.

⁷Kidika bahang, wanaihki balna, yangna trakinabil dawak kultik kalbautayangna balna kidika pasyakat, uba palni walaniānin dunayangna manna rahm kulnin lani yakat barangni mana kidika yulni.

⁸Manna Dawan yakat barangni mana kidika dakanayangna kat, sangka kaldakayangna.

⁹¿Mayang amput Madakiwan yakat tingkih lani minitbayak kaladarangyah manna yulmana dawak yangna bik manna yulmana witing muhni yakat alasna yangna kidika yulni?

¹⁰Madah dawak pukta yakat bik Papang kalni dinit buktayangna yanadawakat yangna palni manatalna atnikna dawak rahm kulnin lani dutamana kidika yakat baisa papatni awas kidika papatni yamna atnikna yulni.

¹¹Yangna dukih yanawi Mapapangki dawak Madakiwan Jisas yaklau ilp yananawakat yawik manatalna atnikna yulni.

¹²Dawak Dawan yaklauwi ilp manawakat baraktanama dawak baisa dalani lani dutanama biri biri dawak muih bitik yakat bik, yangna lawik manna yakat dalani manatalayangna kaput.

¹³Manna ismangna kidika barangni manayamwarang, holi dawak dutni as bik dis Mapapangki muhni yakat, Madakiwan Jisas witing dini balna bitik karak nawatwi kaiwarang mani kat. Kaput karang.