Read Mayangna 1 Tesalónica 4 Bible Online

1 Tesalónica 4 - Mayangna bible

1 Tesalónica 4

¹Waralaih, wanaih balna, manna kalmana dinit buktayangna dawak adika dini Dawan ayangni usnit yakat yamnin manayultayangna: manna tamatna yakat di balna kidika yamta yawanauh (uman yamtamana kaput) yangna lawik manna yakat manasumalnayangna kaput Papang yamni talna atnin yulni.

²Manna yamni amanglatamana yangna lawik manasumalnayangna dini kidika Dawan Jisas parasni kau.

³Papang dukih kalawa kidika laih manna sangmanaka kidika holi atnin, dawak muih as bik la dis kaldunin awas

⁴dawak muih bitik kidika witingna silp yalnina[2] kat kat amput atninna kidika kaput kawang holi lani kat dawak rispik lani karuk bik,

⁵dukih lani karak bik awas dawak kulnin dutni lani karak bik awas sihm Papang yakat amanglalawas balna yayamwa kapat.

⁶Muih as bik witing wanaihni yakat dutni kalyamnin awaski dawak bik alas kalyulnin awaski adika yulni,[3] kat Dawan yaklau wah parasni mayawi, uman ismangna paknayangna kaput.

⁷Bahang Papang laih maisihni karuk yalahnin maiyulwas ki, kaunah holi atnin.

⁸Kaput bahang, angdika muihni adika lani balna yakat dutni yamwarang kidika laih sau muihni as yakat bik dutni kalyamwas ki, kaunah Papang witing spiritni holi manana kidika yakat dutni kalyamwi.

⁹Wanaih balna pasyakat dalani lani kidika niningkauh laih, manna yakat wauhtaya manaulnikna dini bik awaski, kat Papang witing palni manasumalna biri biri dalani kaltalna atnin.

¹⁰Bahang manna kaput yamtamana Macedonia yakat wanaih balna yalalahwa kidika bitik yakat. Kaunah wanaih balna kalmana dinit buktayangna, dalani lani dutamana kidika baisa barakwang ma balna bitik yakat.

¹¹Manna traitala alasna yalahtanauh dawak manna silp warkmana balna yakat yamtanauh, tingmana karak wark yamnin manayulnayangna kaput,

¹²ahni muihni balna kidika yaklau rispik manayamna atninna yulni dawak manna bik di as dis atnamna awas.

¹³Wanaih balna, yangna dukih yanawas ki manna amanglatas atnamna muih dadauna balna karak ais kalahwa kidika, manna muih ūk balna kulninna bukwa kat tahanin lani dis kidika kapat atnamna awas yulni.

¹⁴Jisas dauwi watwi yaklauna kulda kidika, sihm kaput kuldi Papang dawak Jisas karak watwi dulalauwarang kidika witing yakat kulwīnah dadauna balna yakat.

¹⁵Kidika yulni manna yakat Dawan lani balna kidika manayuldi, yangna laih, Dawan watwi kaiwak kat sangka awanaki kidika, muih dadauna balna kidika tanitna yakat bayaktas awanaki ki.

¹⁶Kat yamnin yulni as, insal yulni as dawak Papang trumnipit yulni kidika bik kalahwarang ki, dawak Dawan witing palni kisang kaupak yaklakwarang ki. Dawak Krais yakat kulwīnah dadauna balna kidika laih, witingna tatuna yaklalauna karang ki;

¹⁷usnit kat, sangka watnamayang kidika laih maiduwi kiuna karang ki, witingna karak aslah, mukus balna yakat, wing yakat Dawan karak kalpakna atnin yulni; dawak kaput laih Dawan karak ban kaput mawarang ki.

¹⁸Bahang kulnamna dulautanauh, biri biri adika yulni balna karak.