Read Mayangna 1 Tesalónica 5 Bible Online

1 Tesalónica 5 - Mayangna bible

1 Tesalónica 5

¹Wanaih balna, ma balna āna kidika dawak ma balna kidika niningkauh laih, manna yakat wauhtaya manaulnikna dini bik awaski.

²Manna yamni amanglatamana Dawan watwi kaiwarang kidika mani laih ismangnakattas mana kat kiwi kawarang ki, sihm di malyang as pukta kiwi kāwa kapat.

³Muih balna kidika aput yuyulwarang mani kat: “Di bitik laih kulnin aslah lani dawak alasna karak bik ki”, bahang kaldakadas kat witingna minitna yakat daukalnin kidika kaiwarang ki, sihm muih yal as muih karuk kat dalani balna dakawa kapat; dawak sip kiri yaklalawas karang.

⁴Kaunah wanaih balna manna laih, puksani yakat awasmana, Dawan kaiwarang mani kidika kaldakas mana kat manalaihna atnin sihm di malyang as kapat.

⁵Manna bitik mana laih yaringni dawak madah dini mana. Mayang laih pukta dawak puksani dini awas mayang;

⁶kidika bahang mayang laih muih ūk balna kakama kapat atnin awaski, kaunah sahmuhni atnin ki mamuihki yamni karak.

⁷Kakama muihni balna kidika laih, pukta yakat kakami, dawak wasak dadauwa balna kidika laih, pukta yakat wasak dadauwi;

⁸kaunah mayang laih madah muihni mayang kidika, mamuihki yamni atnin ki ma balna bitik yakat ban kaput. Kalmuknin ki rahm kulnin lani dawak dalani lani kidika karak bik, dawak muihni yakat nanitdaknin dini kidika kau bik manakitdakna atnin, laihwi yaknin lani kidika duna atnin yulni.

⁹Kat Papang yaklau wah dunin yulni maisihwaski, kaunah laihwi yaknin lani kidika laihna atnin Madakiwan Jisas Krais munah.

¹⁰Jisas Krais laih mayang mayulki dauna, sahmuhni atnin kidik awaskat dauna atnin, witing karak aslah yalahna atnin yulni.

¹¹Kidika bahang, kulnamna dulautanauh dawak parasni kaltanauh biri biri, uman yamtamana kaput.

¹²Wanaih balna, kalmana dinit buktayangna manna pasmangna yakat wark yayamwa balna kidika yakat rispik yamna atnamna yulni, tunan duwi Dawan yulni balna manayuyulwa kidika.

¹³Uba palni dalani kaltalnamna ki, wark yayamwa kidika yulni. Biri biri kulnin aslah lani karak yalahtanauh.

¹⁴Wanaih balna di ūk bik yamnin manayuldi, wark kalalahwas muihni balna yakat biltanauh, kulninna bukna muihni balna kidika kulninna dulautanauh, parasnina dis muihni balna kidika yakat parasnina diatanauh dawak muih balna bitik yakat kulnamna laihwattanauh.

¹⁵Manna amung talnauh muih as bik muih ūk yakat dutni yulni dutni kalyamnin awaski. Nawatkauh, yamni kidika yamnin traitalnauh, manna pasyakat dawak muih balna bitik yakat bik.

¹⁶Ban kaput alasna awanauh.

¹⁷Minit bitik yakat mamatna yultanauh.

¹⁸Di balna bitik yulni Papang yakat tingkih kalatanauh, kat witing manna Jisas Krais yakat kulyang muihni mana kidika kaupak dukih kalawa kidika laih kidika ki.

¹⁹Spirit kuhnipau kidika pipiwinih.

²⁰Papang yuldibauwakat yul yuyulwa balna yulni kidika ruhmwi dadawinih.

²¹Bitik traini talnin yakat ātanauh dawak yayamni balna kidika laihwattanauh.

²²Di dudutni balna bitik kaupak naikau alahwanauh.

²³Kulnin aslah Papangni kidika yaklau, manna yakat holi manayamwarang, dawak muihmana nuhni bitik, spiritmana, sangmanaka kidika bik manana karang, dutni as bik dis, Madakiwan Jisas Krais kaiwarang kidika yulni.

²⁴Kiunin yulna muihni kidika laih barangni ki, dawak adika dini bitik kaput yamna karang ki.

²⁵Wanaih balna yangna yulkina bik mamatna yultanauh.

²⁶Wanaih balna bitik yakat umnin holi as karak parastanauh.

²⁷Yamnin manayultayang, Dawan parasni kau, wanaih balna bitik yakat adika wauhnitaya ulna adika yulta tala diatanauh.

²⁸Madakiwan Jisas Krais yaklau manna mamatna yakat witing minikun talnin lani duwa kidika manana karang.