Read Mayangna Josué 13 Bible Online

Josué 13 - Mayangna bible

Josué 13

¹Josué uman muih barak palni kalna mani kat, Dawan yaklauwi kalyulna: “Man uman kurihma kana, dawak baisa sau balna kawi dunin mahni palni bangki.

²Filisteo dawak gesureo balna sauni bitik kidika watna

³kidika kuduh Sihor wasni kiwa kaupak Egipto ma kilwa nining kaupak Ecrón sauni lainni kat, tingpal nining yakat, kidika kilwi talnin kat cananeo balna saunina; yakat kuduh filisteo balna tunan singka bangki, kidika kuduh Gaza tunan muihni, Asdod, Ascalón, Gat dawak Ecrón tunan muihni balna. Sihm kaput bik aveos sauni pīsni yak bik baisa watwi,

⁴wadah nining yakat, cananeo balna sauni bitik yakat sidonio tawannina nunuhni kaupak,[5] Afec kat, amorreo balna saunina lainni kat.

⁵Kaput bik baisa giblita balna saunina bik watwi dawak Líbano bitik ma kilwa nining yakat, Baal-gad kaupak, Hermón asangni kaupak Hamat yakat kiwi kawa kata.

⁶Israel balna tanitna yak ahana dai sidonio balna dawak asang pas kau watwa bang balna bitik kau yak, dawi Líbano kaupak Misrefot-maim kat. Adika sauni Israel balna yak sahyakta panina diatah, yang lawik yamnin mayulnayang kaput.

⁷Adika sauni kidika sahta yakta sulani tiaskauarungka yakat diatah dawak Manasés sulani papusdak yak bik.”

⁸Rubén dawak Gad dawak bik Manasés sulani papusdak balna kidika Moses yaklauwi saunina Jordán ma kiwa nining kauh diana dai.

⁹Witingna duduna kidika Aroer sauni pīsni kaupak, Arnón wasni kung munah dawak sau langni papus kau tawan nuhni pakkidika dawak Medeba asangni ubulni kat bangkidika bitik Dibón kat,

¹⁰pasyakat Sehón tawanni balna bitik, amorreo kingni Hesbón yak, amonita sauni lainni kat.

¹¹Sihm sat kaput bik Galaad dawak gesureo sauni bik witingna niningna yak dawak maacateo balna bik, minit yak baisa Hermón asangni bik, Basán sauni bitik, Salca kat,

¹²pas yakat Og bik, Basán kingni, witing king kana sak dai Astarot dawak Edrei, kidika refaítas balna kaupak las dai, Moses yaklauwi minit bayakna dawak pāni kaupak apamna.

¹³Gesur balna dawak Maaca kidika balna yakaupak yakwas dadana, kaput kaunah ban Israel balna karak yalalahna ban warmani kat.

¹⁴Leví sulani balna kidika Moses yaklau panina diawas dana, bahang witingna niningna yak laih Dawan dawak Israel balna Papangnina ayangni kau minit dis kalanin dini busnin kidika witingna karang, witing palni kaput yulna dai.

¹⁵Moses yaklauwi sau balna Rubén sulani yakat diana ampus tawanni duwa yakarak,

¹⁶kaput laih sauni pīsni kidika Aroer kat dai, Arnón wasni kung, dawak sau langni papus kau tawan nuhni kidika, dawak Medeba asangni balna tuna kat,

¹⁷Hesbón kat, dawak asang kau tawan bangkidika bitik: Dibón, Bamot-baal, Bet-baal-meón,

¹⁸Jahaza, Cademot, Mefaat,

¹⁹Quiriataim, Sibma, Zaret-sahar, sau langni kau sakkidika,

²⁰Bet-peor, Bet-jesimot dawak Pisga asangni as dauh sak kidika,

²¹yuldarang kat asang nunuhni bang kau tawanni balna dawak Sehón kingni balna bitik kau, Amorreo kingni Hesbón yak, kidika Moses yaklauwi minit bayakna dai Sehón yak dawak Madián muihni nunuhni balna: Evi, Requem, Zur, Hur dawak Reba yak bik.

²²Sihm kaput bik Israel balna yaklauwi, yul baisa kaiwi kalahwas kau amanglawa alni Balaam kidika ihina, Beor walanibis dai kidika, dawak ūk balna bik mahni ihina.

²³Rubén sulani sauni kidika sahyakna yakat duyawa dakni yapak duwa yakat, adika tawanni nunuhni dawak pāni binina kidika Jordán wasni kung kat kiuna.

²⁴Sihm kaput bik Gad sulani balna yakat saunina sahwi yakwi diana Moses, witing sulani pasyak dakwi ampus mahni duwa kaput.

²⁵Witingna duduna Jazer dawak Galaad tawanni balna bitik dawak amonita balna saunina papustirh, Aroer tawanni kat kidika Rabá muhnit palni yakat ki.

²⁶Adika sauni pīsni kidika sakki Hesbón, Ramat-mizpa dawak Betonim walsah yakat dawak Mahanaim dawak Debir sauni lainni walsah yakat.

²⁷Sau langni yakat laih witingna duduna Bet-aram, Bet-nimra, Sucot dawak Zafón kidika kuduh dis aslah Sehón kingni watna dai, Hesbón kingni. Kaput bahang witing sauni kidika duna dai Jordán wasni nakas ma kilwa nining kaupak Cineret lakunni wadah nining yaihnit kat.

²⁸Kidika tawanni balna dawak tawanni binina kidika Gad sulani balna yak diana dai, witing sulani pas yak dakni ampus duwa dai yakat.

²⁹Sihm kaput bik Manasés sulani papusdak balna dai yak bik Moses yaklauwi sau diana witing sulani dakni ampus dai yakat sahwi yakwi diana.

³⁰Muhnilau Basán kingni Og, sakdai kidika witingna yak diana, yuldarang kat, Basán bitik Mahanaim kaupak tawan 60 Jair kau dini dai kidika,

³¹Galaad papusdak dawak Astarot dawak Edrei tawanni balna. Kidika bitik laih Maquir sulani balna duduna dai, Manasés walanbis, sulani balna ampus kat kaput duduna.

³²Adika sauni balna kuduh Moses yaklauwi Moab walanbis dinina diayana dai, Jordán wasni makilwa nining Jericó muhnit yakat.

³³Kaunah Leví sulani balna laih sau diawasdai, kaunah witingna yak aput diyulna: “Dawan dawi Israel balna Papangnina kidika manna dimana.”