Read Mayangna Josué 17 Bible Online

Josué 17 - Mayangna bible

Josué 17

¹Adika sauni balna kidika Manasés sulani balna yak di watna, José walanbis barakni kidika, Maquir war alni as dai, adika kidi Manasés walanbis tuna dai dawi Galaad papangni dai, kidika Galaad sauni kidi witing duna dawak Basán kidika kuduh Jordán ma kilwa nining yak dai.

²Kaput bik saunina kidi ampus di watwarang pa tatalna muih ampus yalahwa yakarak tawanni yakat, dawak Manasés walanbis balna ūk karak: Abiezer, Helec, Asriel, Siquem, Hefer dawi Semida, Manasés walanbis balna dai kidi dawi José mani balna.

³Kaunah Zelofehad, Hefer walanibis dai dawak Galaad mani, Maquir walanibis dawi Manasés mani kidi walabis al as bik duwas dai walabis yayal manah singka duna, kidika balna kidi kuduh Maala, Noa, Hogla, Milca dawi Tirsa.

⁴Adika balna kidi sumalyang Eleazar yak uiwi tatalna dawi Josué yak bik dawi tawan tani tunan balna yakat bik, dawi di yulwadai: “Dawan yaklau Moses yak sihna dai sau yanana atnin, sihm kaput bik yangna wanaihkina balna yakat bik.” Kaput dawak Josué yaklauwi sau diana papangni wanaihni balna yakat, Dawan yaklauwi amput yamnin kalyulna dai kidika kaput.

⁵Kaput dawakat Manasés sulani balna sau pis salap praisni duduna, sihm kaput, Galaad dawak Basán sauni bik duduna. Jordán ma kilwa nining kau bang yakat,

⁶kat kidika kuduh Manasés walanbis yayal kidika bik sau diayana sihm ahal kaput. Galaad sauni pīsni kidika Manasés sulani ūk balna dinina dai.

⁷Manasés sulani balna saunina kidika kuduh Aser kaupak Micmetat kat dai, Siquem muhnit kau kidika, dwak kaputm laih wadah nining yak kiwadai, Tapuah wasnituna muhnit kat.

⁸Tapa sauni pīsni kidika Manasés sulani balna dinina dai karang bik, sihm kaput bik Tapa tawanni palni kidika bik Manasés sauni lainni yak sakdai Efraín sulani balna saunina dai.

⁹Kidika lainni kiwi watta kidika wadah niningyakauh kiuna Caná wasni kat, Efraín tawanni nunuhni balna kidika laih Manasés tawanni nunuhni balna walsah yakat dai, sauni lainni tingpal kuma yakat kiwi kalahwa kidika Manasés kauh dini dai kaunah.

¹⁰Efraín kidika wasni kidi wadah saitni yak watwa dai, Manasés laih tingpal nining yak dawi Mediterráneo kumani kidi lainnina kapat duduna dai, dawak Aser sulani balna kidi tingpal saitni yak dawi Isacar kidi ma kilwa nining yak duduna dai.

¹¹Sihm kaput bik Manasés yak adika tawanni balna duduna dai Isacar sauni pas kaupak dawak Aser sauni balna bupak, dawak yaihnit tawanni binina bik: Bet-seán, Ibleam, Dor, Endor, Taanac, dawak Meguido, dawak bik asangni balna[11] bāspak.

¹²Kaunah Manasés sulani balna kidika adika tawanni balna yamnin kidi duduwas dadana dai, ampat dawak kat, cananeo balna parasni niningna yak yaklalauna dawi witing bik yakat wawatna.

¹³Usnit yak Israel balna kidi baisa parasni niningkau yaklalauna, dawak cananeo balna yak dipakwak minitlauna atnin yakat bangkidika tunanina minit.

¹⁴José sulani balna yaklauwi Josué yak kalyuyulna: —¿Ampadawak yangna kau sau pis aslah yanamayah, muih mahni yangna dawak Dawan blisyanayamna kidika?

¹⁵Josué yaklauwi nangnitna lawana: —Kat manna kuduh mahnimana dawak Efraín asangni kidika sip mana laihwaski, bahang asangpas yak yawa bautanauh ferezeo balna saunina yakat dawak refaítas balna saunina yakat bik.

¹⁶Dawak witingna yaklauwi yuyulwadai: —Rahm laih adika asangnipas balna kidika yangna kau yanalaihwaski. Kaunah cananeo balna walang kau yalalahwa kidika witingna ayan trukni duduwi, sihm kaput Bet-seán kau bang kidika bik, dawak tawannina binina Jezreel sauni langni kau bang kidika bik.

¹⁷Bahang Josué yaklauwi José sulani yakat aput nangnitna lawa dai, yulnin kat, Efraín dawak Manasés sulani balna yakat: —Manna mahni palni mana dawak parasmana mahni duta mana, yuldarang kat manna kau sau pis apis bin manah laih dutas awanama,

¹⁸kaput kaunah kidika asang pas nuhni sak kidika bik manna dimana karang, dawak manna asangni pas kau yamnin dutanama. Cananeo balna kidika manna lawa kaput usyaktanama, witingna wiswak parasni karang bik dawak ayan trukni duwa karang bik.