Read Mayangna Josué 18 Bible Online

Josué 18 - Mayangna bible

Josué 18

¹Israel tawanni balna bitik aslah kalududuhna dai silo yakat, kidika yakat Papang karak kalpaknin ūni labanni paknin. Kidika sauni laih uman kalbauwi dakyakwi duna dai.

²Kat baisa Israel sulani balna tiaskaubu kidika sau diawas dai witingna yak.

³Bahang Josué yaklauwi Israel balna yakat aput diyulna: “¿Manna ais tahata manah Dawan yaklau sau manana kidika duna atnamna, muihmanabararak balna Papangnina yaklauwi?

⁴Manna sulani balna pas kaupak ahal bās yaktanauh dawak yang sihna awaki sauni pīsni bitik yakat awaihwi talna karang dawak yul kidik duaiwi yana atnin, kidika karak sauni kidika sahyakna atnik.

⁵Kidika muihni balna laih sauni kidika pīsni tiaskaubu sahyakna karang, dawak Judá sauni kidika laih wadah niningyakat dadana karang, dawak José sualani balna saunina laih tingpal nining yakat duduna karang.

⁶Kidika sauni pīsni tiaskaubu yayakwarang usnit yakat, witingna sauni wayani duwi aiwi yayawarang dawak yang lawik Madakiwan muhni yakat suerte āna awaki.

⁷Libait balna kidika pīsni bin as bik duduwas karang, bahang witingna yak diawarang kidika kuduh Dawan warkni yamnin pas yak bang karang. Minityak Gad dawak Rubén dawak Manasés sulani papusdak balna kidika witingna uman panina duduwi Jordán wasni ma kilwa nining yak, kidika kuduh Dawan dini yamyang Moses yaklauwi diana dai.”

⁸Sauni pīsni lakwi talwi wayahni balna kidika laih mahka kalalahna, dawak Josué yaklauwi dipakna: “Manna yawanauh sauni pīsni bitik yakat awaihta tala sahta yaktanauh, dawak dahn yamtanama kat mahka aiwanama, kaput laih yang lawik Silo yakat suerte ruhmki Dawan muhni yakat.”

⁹Kidika ahalni balna kidika ulwa dai dawak sauni pīsni bitik awawaihna dai, dawak tawan nunuhni tiaskaubu sahwi yayakna tiaskaubu, kidika bitik wauhtaya kau uhulna. Usnit kat nawatwi Silo yakat uina, Josué sakdai yakat.

¹⁰Bahang Josué yaklauwi Israel balna yak sauni kidika sahwi yakwi diayana dai, Silo yakat dawan muhni yakat suerte ruhmwi.

¹¹Wat as suerte ruruhmna Benjamín sulani kidika, dawak José sauni walsah yakat dibukna sau duna atnin.

¹²Adika sauni lainni kidika kana Jericó tingpal nining yakat kidika kaupak bayakwi kiwadai ma kama pīsni asangni pas yakat, dawak Bet-avén kauhnimak walang kat kaiwi kalahna dai.

¹³Kidika kaupak kalahwi kiwadai Luz kat (yulnin kat Betel) yak wadah nining yakat, dawak yaklauwi Atarot-adar kat Bet-horón sau kau asangni pas wadah nining kau duwa sak yakat.

¹⁴Usnit yakat, sauni lainni kidika nawatwi kaiwadai Mediterráneo kumani munah Bet-horón muhnit kau asang pas nuhni sak wadah nining kaunah, Quiriat- baal, ayangni ūk bik yuyulwi Quiriat-jearim kat, kidika kuduh Judá sulani balna duduwi. Adika kuduh ma kawa nining sauni lainni dai.

¹⁵Wadah nining sauni lainni kidika kalahwadai Quiriat-jearim yaihnit munah makawa nining yakat Neftoa wasni tuna kat,

¹⁶dawak yakaupak yaklana dai Ben-hinom sauni langni muhnit kau asangni sak yaihnit munah, Refaim sauni langni tingpal niningyakat. Usnit kat yaklauna dai Hinom sauni langni yakat, kidika munah bayakna dai Jebús asangni launi wadah niningyakat, kidika ban kiuna En-rogel wasni tuna kat,

¹⁷Usnit yak nawatwi tingpal nining munah dawak En-semes kat kaiwikalahwa dai, yakat kuduh bangkauna Gelilot kat, kidika kuduh Adumín asangni launi muhnit yakat, dawak yaklauwadai Bohán Ben-Rubén kinipala nuhni kat;

¹⁸usnit yakat bayakwadai asang launi tingpal nining Jordán sauni langni muhnit munah dawak Jordán kat yaklakna

¹⁹kidika kaupak Bet-hogla tingpal nining munah bayakna dai kidika munah Kuma Dauna sahni tingpal nining kat watna atnin yulni, yakat kuduh Jordán wasni kiuna kalahwadai. Adika kuduh sauni lainni wadah nining duwa dai.

²⁰Jordán wasni kidika sauni lainni makilwa nining. Adika sauni pīsni kidika kuduh Benjamín sulani kidi balna saunina sahwi yakat diana.

²¹Benjamín sulani balna nining yak kalbabauna dai kidika kuduh: Jericó, Bet-hogla, Emec-casis,

²²Bet-arabá, Zemaraim, Betel,

²³Avim, Pará, Ofra,

²⁴Quefar-haamoni, Ofni dawak Geba, yulnin kat tawan nunuhni 12.

²⁵Kaput bik Gabaón, Ramá, Beerot,

²⁶Mizpa, Cafira, Mozah,

²⁷Requem, Irpeel, Tarala,

²⁸Zela Elef, Jebús, (yulnin kat, Jerusalén), Gabaa, dawak Quiriat, kaput tawan nunuhni 14 tawan binina karak kidika pīsni yak apis kalbabauna. Adika sauni kidika kuduh Benjamín sulani dakni muihni balna duduna.