Read Mayangna Josué 2 Bible Online

Josué 2 - Mayangna bible

Josué 2

¹Sitim kaupak, Josué yaklau pakwi talnin muihni bu malwi sihna, dawak diyulna dai: “Yawa Jericó sauni kidika dawak tawanni nuhni kidika bik lakta talnauh.” Witingna uina dai, dawak ahal manas karak kalpakwa yalni as Jericó kaupak ayangni laih Rahab, kidika ūni yakat uikawi payayahna dai.

²Kaunah muih as yaklau Jericó kingni yakat yul kalyulna, aput kalyulna dai: —Adika puknita Israel muihni balna buas aina sau adika lakwi talna atnin.

³Bahang king yaklau Rahab yakat yul kalsihna: —Muih ahal matalna aina kat ūma yakat bangkidika yaktah, kat witingna laih pakwi talyang muihni balna.

⁴Kaunah yal kidika laih malna dawi diyulna dai: —Rahm muih ahal buas laih aiwi yatatalna dai, kaunah amanglatasyang dai witingna kidika angkaupak dai pa.

⁵Puklakwakat mahka uina dai, kat kidika awarni yakat tawan nuhni dūrni putwa kidika yulni, dawak amanglatasyang angkat uina pa. Kaunah manna dangnitna kaupak uita yawanamakat sip karang ki uita laihna atnamna.

⁶Rahm kidika laih, yal kidika yaklau ū tuna yakat ilmukna dai, dawak kidika yakat yakmaldana bangdai, linin banimak sitwi lakna kat buhwabangdai kidika walsah yakat.

⁷King ahalni balna kidika laih uhuina dai Jordán wasni kidika niningyakauh, was baini balna kat. Kalbauyang muihni balna kidika sirihni palni kalalahna bahang, tawan nuhni dūrni kidika putna dai.

⁸Bahang, pakwi talyang muihni balna kidika baisa kakamas tanitkauh yakat, Rahab laih ū tuna yakat kilwi diyulna:

⁹—Yang amanglatayang Dawan yaklau adika sauni manna yakat manana kidika, kat witing yaklau yamna yangna kidika manna yakat uba palni yamamana duna atnikna. Akat yalalahwa muihni balna bitik laih uba palni yamaduna bangki manna yulmana.

¹⁰Amanglatayangna manna Egipto kaupak alahwanamana mani kaupak, Papang yaklau kuma pauni wasni kidika buhni yamna dai, manna daklawana atnamna yulni. Manna lawa amorreo balna kingnina Sehón dawak Og, Jordán wasni nakas yakat bangkat imuknamana kidika bik amanglatayangna.

¹¹Amanglanayangna mani kat uba palni yamadunayangna, muih as bik manna namangna yakat yaklaunin kulwas ki. Kat Dawan, Manna Papangmana kidika laih, kisang yakat Papang dawak sau akat bik Papang.

¹²Kidika bahang akat Dawan ayangni kau pramis yamnamna yulni manayultayang, yang walakibis balna yakat yamni diyamtanama kidika, yang lawik manna yakat yamni manayamnayang kaput. Manna di rahm yultamana dini kidika as nikingkatanauh,

¹³dawak yang papangki, nanangki, wirahki ahal balna, wirahki yayal balna sangninaka kidika ban datanauh, dawak witingna dinina balna bitik kidika bik datanauh. ¡Daunin kaupak yanalaihta yaktah!

¹⁴Witingna yaklau nangnitlalana: —Yangna sangkinaka kidika ātayangna manna sangmanaka kidika yulni, man lawa di as bik yultas awamakat adika yulni. Dawan yaklau adika sauni mayawarang mani kat, yangna lawik man yakat yamni mayamtanaki ki kulnin yamni karuk.

¹⁵Rahab laih tawan nuhni daklana kidika minit yakat ū as yamna kat kidika yakat yalahwa dai bahang, wah labuna as diawakat windar munah yaklalakna dai.

¹⁶Dawak aput diyulna: —Asangpas yakat yawanauh, manawawalwa muihni balna kidika manayayakwas atnin yulni. Kidika yakat ma bas maldanauh, witingna watwi nawatwi tawan nuhni yakat uiwarang kat. Usnit kat manna sip awanama tamatna yakat yawanamna.

¹⁷Dawak witingna yaklau nangnitlalana: —Yangna laih man lawa yanayultang kat pramis mayamnayangna yakat yamtanaki ki.

¹⁸Kaunah sau yakat mahawarang mani kat, man lawa adika wahni labuna pauni adika windar yakat alahwitma windar as yanatangkat lakwanayangna yakat. Bahang man ūma yakat papangma, nanangma, wirahma ahal balna dawak papangma walanibis balna bitik uduhma.

¹⁹Witingna kaupak as man ūma kaupak kalahwarang laih, dauwarang bik witing silp tunan yakat karangki; kidika laih yangna pātkina awas karang. Kaunah muih as yaklau man ūma yakat man karak raumana kidika yakat uswarang laih, yangna tunakina yakat karang.

²⁰Kaunah man lawa adika yulni di as yulma karang kat, yangna lawik man yakat pramis mayamnayangna kidika yamtas awanaki ki.

²¹Yal kidika yaklau nangnitnalana: —Kaput yamniyah. Bahang diparaswa dawi mahka sihmukwakat uina dai. Usnit kat yal witing wah labuna pauni kidika winnidar yakat sitwitna dai.

²²Pakwi talyang muihni balna bu kidika laih asangpas yakat uiwi ma bas yakmamaldana dai, dawak kalbauyang muhni balna kidika laih ban yayakwas pa balna bitik yakat wawalwadai, witni kat watwi Jericó yakat nawatwi uina dai.

²³Bahang pakwi talyang muihni balna kidika asangpas kaupak kalahwi, was kidika dakyaklawi nawatwi uina dai Josué sakdai pāni yakat, bahang witing yakat kalyuyulna dai ais dikalahna dai kidika bitik.

²⁴Aput kalyuyulna dai: “Dawan yaklau sau kidika bitik mayang matingki yakat ana. Yangna yulkina kidika sauni yakat yalalahwa muihni balna bitikkau yamaduna bangki.”