Read Mayangna Josué 22 Bible Online

Josué 22 - Mayangna bible

Josué 22

¹Kaput dawak Josué yaklau Rubén sulani balna yak yulwadai dawi Gad, Manasés sulani balna papusdak yak

²di yulwadai: “Manna Moses Dawan warkni yamyang ais yulna kaput yamna mana dawak yang yulna yang yakat, daka yamnamana.

³Warmani mani kat dawak ma balna bitik yakat wirahmana balna ruhmta datas mana dai dawak kasak palni Dawan dawi manna Papangma lani balna kat yamnamana.

⁴Waradika laih witing pranimis yulna kaput yamna dawak wirahmana balna pri lani duduna, ūmana labanni yakat nawatta yawanauh dawak Moses Dawan dini yamyang yaklau Jordán wasni kaupak ma kilwa niningkauh sau manana yakat.

⁵Di aslah manayulnik dukih yawi kidi laih Moses yaklau lā balna manana kidika yakat yamtanauh, Dawan dini yamyang, yuldarangkat, Dawan dawi Papangmana yakat dalani kaltalnauh, witing tani yakat lapaktanauh dawak lani balna kat daka yamtanauh, dawak bik usnit uita witing dini yamtanauh ismangna bitik karak.”

⁶Kidika usnit yak Josué yaklau yamni kaltalna atnin yulwadai dawak kalparaswa dawi mahka uiwadai, witingna kaluduhna atnin ūni pakna bang yak.

⁷Manasés sulani papusdak yak Moses yaklau sau diawadai Basán sauni sahyakna yak. Dawak papusdak ūk kidi Manasés sulani balna yak diawa dai, dawak Josué yaklau sau diawadai Israel balna yak bik Jordán makawa nining yak dawi pas tatuna balna yak yamni di talna atnin dawi wat nawatwi sihmukna dai

⁸dawi di yulwadai: “Manna watta waradika nawattanauh saumana yak dawi yamnin balna mahni karak, tinglau balna mahni, gol, lalah, bras dawak ayan, dawak bik asna mahni palni karak. Wanaihma balna karak dutanauh waihla balna kaupak dakyakna mana kidi.”

⁹Kaput dawa dai Rubén dawi Gad sulani balna karak kaput dawak Manasés sulani balna papusdak karak bik kidi Israel balna karak bik sahwi kalalahwadai yakmaldinin pāni as duduwadai kidika Canaán, witing pāni yakdi yamnin balna duduwadai yak watwi wiryaklawi uinin yulni. Galaad sauni pis yak, sauni pīsni duduwadai Dawan yaklau anidar diana dai kaput Moses munah.

¹⁰Rubén, Gad dawak Manasés sulani papuswayah balna kidika Jordán wasni yakat uina, kidika laih cananeo balna saunina dai, dawak waskung yakat sakripais busnin pani nuhni as yayamna.

¹¹Kaput dawak Israel ūk balna yak yulni kidi kiunadai Rubén dawi Gad dawak Manasés sulani balna kidi sakripais pāni as yayamna Canaán sauni pīsni kiwikawa yakat, Jordán wasni kung yakat Israel balna saunina pīsni yak;

¹²kaput dawak Israel balna amanglalana yakat, kal uduhna Silo yak kiwi di kalbauna atnin.

¹³Tatuna laih Fines yakat sisihna, Eleazar walanibis al yakat, Galaad yakat kiuna atnin, kidika yakat Rubén dawak Gad sulani balna bangdai, dawak Manasés sulani papauswayah kidika bik.

¹⁴Witing karak uinadai Israel tanituna nunuhni salap, witingna bitik kidika sulani balna tunan as as dai.

¹⁵Witingna bitik kau kidi Galaad yak uina, Rubén sulani balna bang dai yak dawi Gad sulani bangdai yak dawak Manasés sulani balna dai yak bik dawi di yulwadai:

¹⁶—Mayang yulbaudi Dawan tawanni balna ayangni yak. ¿Ais yamta manah la minit bayakta alas lani yamta manah Papang nining yak? ¿Ais yamta Dawan ruhmta data dawak bik witing niningkauh kulta sakripais pāni ūk yamnamanah?

¹⁷¿Peor dutni balna kidika mahni awasdai katpah, kidika karak baisa sani mailaihwa kidika, dawak kidika yulni bik Dawan tawanni muihni balna manas dadauna kidika?

¹⁸¿Yakau aitani awasyah, waralaih manna bik Dawan kaupak naikau yawanamna? Dawak manna warmani kat kulnam dutni yamtamanah Dawan niningyak, yahan mani witing kulnin daukalwarang Israel balna tawanni ula karak.

¹⁹Manna talamana kidi sauni manana kidi yamni awaskat mana bukna kat Dawan sauni yak aiwanauh, Dawan pāni holi yakat. Yangna paskingna yakat sau as dutanauh. Kaunah Dawan niningyak dutni kukulwinih dawi yangna nikingna yak bik, sakripais yamnin pāni Mapapangki Dawan dini sak kidika minityakat ūk yamta.

²⁰Kulta dakanauh Acán, Zara walanibis kidi dutni yamna Papang dini kalana bangdai yakaupak duna, kidika dutnina yulni Dawan kulnin daukalna Israel tawanni ula karak ¡Dawakat Acán alas dauwasdai dutni yamna kidi yulni!

²¹Kaput dawak Rubén, Gad dawi Manasés sulani balna kaupak Israel tatuna balna yak nangnitna lana dai:

²²—Dawan dawak Papang kidika laih dawan balna bitik Daninawan, witing amanglawi, sakripais busnin pani yamna mayang adika laih makulnik dutni dawak witing kaupak dakwi kalahnin yulni laih yamdaski. Witing amanglawi dawak manna bitik kau ismangna pakwi, adika yulni yamna ki, ¡sangkinaka kidika dutni datang disnin awaski!

²³Mayang adika sakripais pāni adika Dawan kaupak pa ūk kalahnin yulni yamda kat, awaskat di walapni buswi kalanin kat, yamni kulwi di kalana kidi awaskat biri dutnina dawak disna atnin, dawak Dawan witing palni maiyulwi dakawarang kat.

²⁴Rahm palni yuldarang kat yamna mayang kidika kuduh ma as kat manna walamanabis balna kidi mayang ma walakibis balna yak di yuyulwarang want awas mayang: ‘¿Manna Dawan dawak Israel Papangni karak ais talnin dutamanah?

²⁵Dawan yaklau Jordán wasni kidika āna sakki, mani as, maisahwi yakna atnin, Rubén dawi Gad sulani balna kaupak. Manna Dawan karak di as bik talnamna dis mana.’ Kaput karang kat yangna walakinabis balna kidi Dawan kau yuyulwa kidi dadawarang manna walamanabis balna yaklau yayamwak.

²⁶Kidika awas kulda kidi sakripais buswa pāni as yamnin, kidika kidi di walapni buswi Dawan yak kalanin yulni awaski, dawak bik di ūk sihm kapat dini balna yamnin awaski,

²⁷kidika laih ais kalahna balna kidika yulna atnin dawak kidi dini kidika biri dawak ma yulki watna sak karang dawak ma sulaki balna kau yulni kuldi, dawak mayang sip mayang Dawan dini yamna atnin dawi witing muhnit yak di walapni yamni kau dudi mawana karang, dawak ma dutki yulni kuldi sakripais duaidarang dawi kulnin wirlawi kalpakna lani kau. Kaput laihtak manna walamanabis balna kidi di bik di yulwas karang ma walakibis balna yak: ‘Manna Dawan karak di as bik talnam diski kalatnin lani kidika.’

²⁸Mayang kulda kidi muih as kapat maiyulwarang kat, ma sulaki balna yak bik kapat di yulwarangkat, mayang sip mawarang kalyulna atnin: ‘¡Talnauh! Ma muihki barak balna yaklau Dawan yak ayangni nuhni dulaunin as yamna, adika kidi di balna buswi wayani yamnin walapni Papang muhnit dukiunin awas kauna, kaunah ma yulki balna yulna mawarang manna dawi yangna karak.’

²⁹Papang yaklau witing niningkauh mayang malawana kidi pātni maikulnin awaski, dawak mayang malawi bik ruhmwi danin awaski, sakripais karauni kauna busnin kidik awaskat minit dis kalanin plawar minit busnin pāni ūk yamdi, kidik awaskat di ūk ūk sakripais yamnin pāni, sakripais busnin pāni Mapapangki Dawan dini holi pāni muhnitkau pakkidika kaupak ūk.

³⁰Sumalyang Finees kidi dawi tawan tatuna balna witing karak uiwa dai kidi dakakawadai Rubén dawi Gad dawak bik Manasés sulani balna bik yamnin tatalna dai.

³¹Kaput dawakat Eleazar walanibis Finees, di yulwadai: —Waralaih yamni amangladi, Dawan laih mayang karak ki, kat manna kuduh witing niningkauh kulnamna dutni yamtas mana dai, Dawak kaput laih manna Dawan wahni kaupak mailaihta yaknamana.

³²Kidika usnit yak Finees karak uiwa bang dai kidi di paraswa dawi uina, dawak Galaad sauni pis sahyakna yakaupak nawatna dai, Canaán yak, Israel balna bangdai yakat. Canaán kau bangdai yak di yuyulwadai sulani ūk balna bandai kidi yaklau

³³dangnit lana kidi yamni tatalwa dai, Papang ayangni nuhni yayamwadai. Kidika kaupak watwi baisa Rubén sulani balna yak kalbaunin yuyulwasdai dawi Gad niningkauh bik, saunina bik daukalnin awaski.

³⁴Rubén dawak Gad sulani balna kidika sakripais busnin pāni yakat adika ayangni uhulna “Witnis”, aput yulwinah: “Adika sakripais busnin pāni laih witnis as karang mayang mapasking akat Dawan kidika laih Papang.”