Read Mayangna Josué 23 Bible Online

Josué 23 - Mayangna bible

Josué 23

¹Israel balna yakat pri lani diana waihnila balna kaupak, usnit yak ma mahni palni diawa dai Dawan yaklau, dawak Josué kidika pāt muih barak dai,

²Josué yaklau Israel balna bitik yakat yulwi duwi kiuna tawan muihni barak balna, tatuna balna, tawan tunan duyang wihta balna yak bik di yulwadai: “Yang uman muihbarak yang, dawak kurihki balna kidika tikini ki.

³Manna bik talamana, adika tawanni balna Dawan niningkauh dai balna yak as di yamwa kidika, witing kuduh man yulma kat kalbauwadai.

⁴Yang lawik sauni adika sahyaktik mananayang, sulani balna bitik kau. Sauni kidi sahyaktasyang dai minit bayakwi duna kamanah, kauna baisa minit bayaknin bang kidi balna bik, Jordán wasni ma kilwa niningkauh, dawak kuma nahas kau kawa saitni yak.

⁵Dawan yaklau muih balna akat yalalahwa kidi yakmukna karangki dawak manna dutanama amput Papangma Dawan pramis yamna kaput.

⁶“Manna rahm palni Moses lani balna bitik kau yamta awanauh; amput yulwa kaput.

⁷Muih ūk balna karak kalbahanin awaski, baisa manna paskau bangkidika balna karak. Dawan dauh duduwa balna yakat mamatna yuyulwinih, yulni bik dakakawinih, kidika daniwan dauh ayangni bik yuyulwinih, kidika ayangni kau bik yakwi yuyulwinih.

⁸Ban kaput Papangmana Dawan usnit uitanauh, war manikat yamna mana kaput.

⁹Dawan yaklauwi manna muhmana yakat ruhmlakna ki, tawan nunuhni balna dawak bik pararasni, warmani kat muih as bik namangna yakat yaklaunin sip awaski.

¹⁰Manna kaupak muih aslah sip ki muih tausin as yakat diyamwakat kirinin, kat Papangma Dawan laih manna ilpmana kalbauwa bahang, witing pramis yamna dai kaput.

¹¹Manna amung talnauh, dawak Papangmana Dawan yakat dalani talnauh.

¹²Yang want yang kidi adika amanglatanauh: Papang kau naikau alahwa adika muihni balna karak kalbahatanama kat manna kauna bang kidi balna, dawak biri kal duduwi, Papangma Dawan yaklau adika muihni balna kidi manna muhmana kaupak yakwas karangki, dauh kauh laih witingna mana laihna atnin yayamwarangki trabil yak buktanama, dawak dauh manawisnin lani kapat, dawakat wakal kapat mamaknapa yak, manna kaupak muih as bik adika sauni yak watwas karang kat, sau yamni palni Papangmana Dawan yaklau manana.

¹⁴“Yang mahka dauki kat, kauna baisa tanit yak mahna amanglatanama want yang kulnamna bitik kau, dawak sangmanaka bitik kau bik. Dawak Dawan pramis yamna balna kidika as bik bayakwaski.

¹⁵Kaunah, Dawan yaklau di yayamni balna yamnin pramis kalahwi yamna kaput, witing yaklau sihm kaput manna mamatna yakat wah satni balna bitik duaina karang, sau yamni manana akat manna kaupak as bik dis dawarang ki,

¹⁶Dawan yaklau manna karak pramis yamna kidika kaput yamtas awanama kat. Manna yawa dawan dauh yakat mamatna yultanama kat, witing yaklauwi sau yamni manana adika kaupak manadismukwarang.”