Read Mayangna Josué 24 Bible Online

Josué 24 - Mayangna bible

Josué 24

¹Josué Siquem yak Israel balna sulani bitik kau uduhna dai. Tawan muihnibararak balna, tatuna balna, wihta balna dawak kalbauyang balna taninatuna kidika kauna Dawan muhni yakat diyulwakat uina dai,

²tawan muihni balna bitik yakat aput diyulna: —Israel Papangni Dawan laih adika yulwi: ‘Sara mani kau Taré dawi walanibis Abraham dawi Nacor Sara mani kau muih mana barak balna, Éufrates wasni kung yak yalalahwadai dawak di wayani dauh balna yak minitna yuyulwadai.

³Éufrates wasni kung kaupak dutik yakna yang Abraham, dawak kalating Canaán sauni pīsni ula lik atna. Kalating nuhni palni barakna, tatuna kidika walanibis Isaac kalana,

⁴dawak Isaac yakat laih walanibis bu dianayang, Jacob dawak Esaú. Esaú yakat laih kalanayang Seir asangnipas kidika, kaunah Jacob dawak walanibis balna kidika laih Egipto yakat uina.

⁵Kaput laih yang lawik sihnayang Moses dawak Aarón kidika, dawak Egipto muihni balna kidika īnayang, manna kidika Egipto kaupak manayaknayang kat, kidika kaupak.

⁶Manna muihmana bararak balna kidika Egipto kaupak kalalahna kat, Egipto muihni balna kidika uiwi uina, kār kau, dawak aras kau, kuma pauni kat.

⁷Witingna yang akat yāyuyulna, dawak puksani nuhni laknayang dai, manna dawak Egipto muihni balna karak walsah yakat, dawak bik yamtingkat kuma kidika Egipto muihni balna minitna yakat bukna, dawak dimuklakna dai. Manna talnamana, yang Egipto yakat di yamnayang kidika. ‘Kidika usnit kat manna ma mahni bayaknamana, kauhmak wanilang yakat,

⁸amorreo balna saunina yakat manaduainayang kat, Jordán kaupak ma kilwa niningkauh yakat. Witingna namangna yakat kalbabauna, kaunah yang lawik yamtingkat tingmana yakat bubukna, dawak manna lawa minitna bayakta panina kidika dunamana.

⁹Kidika usnit kat, Zipor walanibis Balac, Moab kingni, manna namangna yakat kalbauna kaina. Balac muih sihna walna atnin Balaam, Beor walanibis kidika, manna yakat la manatuhna atnin.

¹⁰Kaunah yang datingkat la manatuhwas dai, nawatkauh laih blismanayamna. Kaput laih yang lawik manalaihtik yaknayang.

¹¹Kaput laih manna Jordán kidika daklawanamana, dawak Jericó kat yawanamana. Jericó yakat yalalahwa balna dai kidika (amorreo, ferezeo, cananeo, hitita, gergeseo, heveo dawak jebuseo) namangna yakat kalbabauna, kaunah yang lawik yamtingkat minitna bayaknamana.

¹²Amorreo kingni bu dai kidika laih minitna bayaktasmana dai, sibang kau dawak las kau bik, yang lawik witingna yakat yamadunin kidika sihnayang dai, manna tamatna yakat, kaput laih manna yawa -awasmana tanitkauh kikirana.

¹³Yang lawik mananayang, sau as wark alahwasmana yakat, dawak tawan nunuhni yamtasmana dai kidika bik. Waralaih kidika yakat yalahtanama, dawak wain dahtas, olib dahtasmana dai kaunah kastamana.’ Dawak Josué yaklau baisa minitlakwi yulna:

¹⁴—Kidika bitik yulni, Dawan yakat rispik kalatanauh, witing dini kidika yamtanauh kulnamna bitik palni. Muihmana bararak balna dawan dauh yakat minitna yuyulwa dai kidika Éufrates wasnikung yakat dawak Egipto yakat bik, kidika balna datanauh, dawak Dawan dini yamtanauh.

¹⁵Kaunah Dawan dini yamkih manawas kat, waradika lāih alahwanauh wais dini yamtanamayah: muihmana bararak balna Éufrates wasni kung yakat dawan dauh kau minitna yuyulwadai yakat, kidika awas kat adika sauni akat amorreo balna daninawan yakat dini yamtanamayah. Yang laih walakibis balna bitik kalpaktik Dawan dini yamtanaki ki.

¹⁶Kaput laih tawan yaklauwi yulna: —¡Dawan yanadawak, dawan dauh dini yamnikna awas ki!

¹⁷Dawan yaklauwi kuduh yanayakna, dawan yangna muihkina bararak balna bik Egipto kaupak, kidika yakat muih dini yamyang dai kidika miniknapa yakat, dawak ta pas yakat bik nakitnadakna dai kidika, tawan manas pasmunah bayaktining kat.

¹⁸Witing yaklau takinapas kau tawan balna dai kidika bitik kangwi yakna, dawak amorreo balna akat yalalahwa dai kidika bitik. Kidika bitik yulni laih Dawan dini yamtanaki, kat witing laih yangna Papangkina bahang.

¹⁹Kaunah Josué yaklau yulna: —Manna sip Dawan dini yamtas awanama, kat witing laih Papang holi bahang, dawak bik minit anyang bahang, manna dutni yamtamana kidika ban dawak yamtas awanama.

²⁰Manna witing kidika dapamta dawan dauh yakat dini yamtamana kat, Dawan laih manna yakat dutni kidika duaiwarang, dawak manadismukwarang manna di yamni yamnamana dai karang bik.

²¹Tawan yaklauwi nangnitlana: —Kaput kalahwas karang. Yangna Dawan dini yamtanaki.

²²Kaput laih Josué yaklauwi diyulna: —Manna alas witnis āwanama, Dawan dini yamnin alahwanamana kidika. —Witnis yangna —witingna kaput yuyulna.

²³Josué yaklauwi diyulna: —Manna pasmangna kau dawan dauh dutamana kidika bitik yaktanauh, dawak ismangna bitik karak nawatta aiwanauh Dawan dawak Israel Papangni yakat.

²⁴Dawak tawan yaklauwi nangnitlana: —Yangna Papangkina Dawan dini yamtanaki, dawak witing yaklau ais yanayulwarang kidika yamtanaki.

²⁵Sihm kidika mani, Siquem yakat, Josué yaklauwi pramis as yamna tawan kidika karak, dawak lā balna kidika diana,

²⁶dawak kidika balna laih Papang lāni wauhnitaya yakat ulna dai. Kidika usnit kat kipala nuhni as duwi kirah panan dinit yakat lakna dai, bahang kidika panan laih Dawan pāni holi kidika yakat sakdai,

²⁷dawak tawan muihni balna yakat diyulna: —Adika kinipala laih mayang mayulki karang, dawak bik witnis karang Dawan yaklauwi yul balna maiyulna bitik yakat. Adika laih manna namangna yakat yul yulna karang, Papang niningyakat alas muihni atnamna awas yulni.

²⁸Kidika usnit kat Josué yaklauwi sihna dai saunina kat kat.

²⁹Kidika usnit kat, naini awas kat Nun walanibis Josué kidika dauna, Dawan dini yamyang, kurihni 110 duwadai yakat.

³⁰Witing sauni yakat nununa, Timnat-sera yakat, kidika laih Efraín asangnipas yakat ki, Gaas asangni kaupak tingpal niningkauh yakat.

³¹Israel balna Dawan dini yayamna, Josué sangka mani balna yakat, dawak kidika usnitkauh bik muihbararak balna Dawan di yamwak tatalna dai kidika sangka bangdai mani balna yakat bik.

³²José muihni nuhni Egipto kaupak duahaina dai kidika Israel balna, Siquem yakat nununa, Jacob yaklauwi bakanna dai kidika lalah[16] andat minit, Hamor walanibis balna kaupak, Siquem papangni, dawak kidika usnit kat José sulani balna dinina kalna.

³³Aarón walanibis Eleazar dawak, witing walanibis Finees asangni ubulni yakat nununa, kidika laih Efraín asangnipas yakat kalana.