Read Mayangna Josué 3 Bible Online

Josué 3 - Mayangna bible

Josué 3

¹Kidika payahwakat, mapiris palni Josué dawi Israel muihni balna kauna Sitim kaupak kalahwi Jordán wasni yakat ui'kakana dai; kaunah baisa dakyaklalawas tanitkauh kidika pāni yakat ūnina labanni papakna dai.

²Ma bas bayakwakat, tunan muihni balna kidika ū labanni yakat awawaihna dai

³dawak Israel muihni balna yakat adika yamnin diyuyulna dai: “Manna Dawan lani baksni kidika libait sumalniyang balna duwi bayayakwakat talnama minitni yakat manna bangmana yakaupak alahwa uitanama.

⁴Kaput laih manna amanglanamana angkut yawanamna kidika, kat manna kaupak as bik muhnilau kau kidika tani munah bayakwas ki. Kaunah la baksni kidika yaihnit yakat yawanamna awaski, kaunah witing dangnit kaupak naikau kilómetro as praisni wattanama.”

⁵Dawak Josué yaklau diyulna: “Maisihni dis alahwanauh, kat yahan mani Dawan yaklau di taldas dini yamwakat talnama bahang.”

⁶Sumalyang balna yakat laih diyulna: “Aslah kalahna lani baksni kidika duta muih balna tanitna yakat daklawanauh.” Sumalyang balna kidika laih rahm aslah kalahna lani baksni kidika duwi muih balna tanitna yakat dakyaklalana dai.

⁷Bahang Dawan yaklau Josué yakat kalyulna: “Warmani kaupak Israel muihni balna miniknapa yakat nuhni kalkulna muihni as mayamki ki. Kaput laih witingna tatalwarang yang laih man karak yang kidika sihm Moses karak yang dai kaput.

⁸Man namangkauh laih, sumalyang balna yakat yamnin diyultah aslah kalahnin lani baksni kidika duwi uiwang, Jordán wasni kung yakat ui'kakawarang mani kat, was pasyakat wawatwarang.”

⁹Bahang Josué yaklau Israel muihni balna yakat diyulna: “Aiwa dakanauh Dawan manna Papangmana yulwa kidika.

¹⁰Adika karak manna amanglatanama Papang sangka manna pasmangna yakat sakkidika, dawak witing yaklau manna tamatna kaupak cananeo balna, hitita balna, heveo balna, ferezeo balna, gergeseo balna, amorreo balna dawak jebuseo balna kauna yakmukwarang.

¹¹Talnauh, aslah kalahnin lani baksni sau bitik Daniwan dini manna tamatna yakat dakwarang kidika Jordán wasni yakat.

¹²Kidika bahang waralaih muih ahal 12 wal'yaktanauh, Israel sulani balna 12 kidika paskaupak as as.

¹³Sau bitik Daniwan lani baksni sumalyang balna duwi uiwa kidika was yakat kalnina ahawarang mani kat, was kidika laih sahyakna bu dakwi kalahwarang, dawak was tuna yakaupak kaiwa kidika laih murwas dawi laihwatwak daklana kapat kalwarang ki.”

¹⁴Israel muihni balna laih ūnina labanni kaupak kalalahna dai was kidika dakyaklana atnin, dawak witingna tanitna yakat laih sumalyang balna aslah kalahnin lani baksni duwi uiwa dai kidika uiwabang dai. Kaunah sumalyang balna kidika was yakat kakana kat kalnina disuihna dai was kung baini yakat (di dahwi yaknin mani balna yakat Jordán wasni kidika bahng'ilwi) tang yakaupak was murwa dai kidika laih murwas dana dai dawak Adam tawanni nuhni Saretán kalbaunin ūni parasni yaihnit kau pakkidika kaupak naikau laihwatwi daklana kapat yamna dai. Dawak kuma dauna niningkauh was murwa dai kidika laih ban murwi witna dai. Kaput Jordán wasni kidika dakwi kalahna dai, dawak Israel muihni balna laih Jericó tawanni nuhni kidika muhnit yakat dakyaklalana dai.

¹⁷Tawan muihni balna bitik laih Jordán kidika buhni manah kat dakyaklalana dai, kaunah sumalyang balna aslah kalahnin lani baksni Dawan dini duwi uiwabang dai kidika laih Jordán papus sau buhni yakat kasakni yaklauna bangdai.